Maʼañic mij cʌy c pejcan lojon jiñi muʼ bʌ i cʌyob subtʼan yicʼot jiñi muʼ bʌ i cʌyob i tempañob yaʼ ti congregación, anquese tsaʼix i chʼʌmʌyob jaʼ bajcheʼ i testigojob Jehová. Muʼ bʌ lon c mel jiñʌch cheʼ mij coltan lojon chaʼan miʼ cʼotel i chaʼ melbeñob i yeʼtel Dios yicʼot chaʼan miʼ chaʼ sujtel i tempañob i bʌ.

 Mi juntiquil testigo chʼʌmʌlix bʌ i chaʼan jaʼ miʼ mel tsʌts bʌ mulil, miʼ mejlel ti chojquel loqʼuel o miʼ chaʼlentel ti expulsar yaʼ ti congregación. Pero ili mach yomic yʌl chaʼan ti ora mi caj i chojquel loqʼuel. Mi jiñi wiñic o xʼixic miʼ chʌn ñusan ti pʼis jiñi mandar tac tsʼijbubil bʌ yaʼ ti Biblia, i mi maʼañic miʼ qʼuextan i melbal, miʼ chojquel loqʼuel yaʼ ti congregación yicʼot maʼañix mi caj i pejcʌntel. Jiñi Biblia mi yʌl: «Chocola loqʼuel ti laʼ tojlel jiñi xjontolil» (1 Corintios 5:13).

 ¿Chuqui miʼ yujtel cheʼ bʌ juntiquil wiñic miʼ chojquel loqʼuel yaʼ ti congregación, pero mi jiñi yijñam yicʼot i yalobil chʌn i testigojob to Jehová? Anquese mach chʌn lajalix miʼ cajel jiñi i chʼujutesayajob, pero chʌn lajalʌch mi caj i yajñelob bajcheʼ familia. Jiñi i cʼuxbiya am bʌ i chaʼan tiʼ tojlel i piʼʌl yicʼot ti i yalobilob maʼañic mi caj i lajmel, cheʼʌch mi cajel i chʌn mel cheʼ bajcheʼ ñʌmʌl i mel.

 Jiñi tsaʼ bʌ chojquiyob loqʼuel yaʼ ti congregación miʼ mejlelob ti cʼotel yaʼ baqui mic tempan lojon c bʌ, mi cheʼʌch yomob miʼ mejlel i chʼʌmob jiñi coltaya muʼ bʌ i yʌcʼob jiñi ancianojob yaʼ ti congregación. Com bʌ lojon jiñʌch chaʼan miʼ chaʼleñob wersa chaʼan miʼ chaʼ sujtelob ti i testigojob Jehová. Jiñi chojquemoʼ bʌ loqʼuel yaʼ ti congregación muʼ bʌ i pʌsob chaʼan mucʼʌch i tsʼaʼleñob jiñi tsʼiʼlel yicʼot jiñi muʼ bʌ i pʌsob chaʼan yomʌch i chaʼ chumtañob jiñi principio tac loqʼuem bʌ ti Biblia, miʼ mejlelob ti chaʼ ochel bajcheʼ i testigojob Jehová.