Joñon lojon bajcheʼ i testigojob Jehová maʼañic mi lon c majlel ti guerra, i chaʼañʌch tiʼ caj iliyi:

1.   Come i mandarʌch Dios. Jiñi Biblia tsiʼ wʌn alʌ chaʼan maʼañix mi caj i chʌn ñopob guerra jiñi i wiñicob, come «jiñi eʼtijibʌl chaʼan guerra mi caj i sujtel ti eʼtijibʌl chaʼan cholel» (Isaías 2:4).

2.   Come i mandarʌch Jesús. Jesús tsiʼ sube jiñi apóstol Pedro: «Chaʼ otsan a machit tiʼ yotot come jiñi muʼ bʌ i chucob machit mi caj i jilelob ti machit» (Mateo 26:52). Cheʼ bʌ Jesús tsiʼ yʌlʌ ili tʼan, tsiʼ yʌcʼʌ ti cʌñol chaʼan jiñi xcʌntʼañob i chaʼan mach yomic cheʼ miʼ chʼʌmob jiñi eʼtijibʌl tac chaʼan bʌ guerra.

    Cristo tsiʼ yʌlʌ jaʼel chaʼan «mach i chaʼañobic pañimil» jiñi xcʌntʼañob i chaʼan. Jin chaʼan, maʼañic miʼ wis otsañob i bʌ tiʼ chaʼan bʌ política (Juan 17:16). Cheʼ jaʼel, mach weñic cheʼ miʼ yotsañob i bʌ ti chuqui jach tac miʼ melob jiñi soldadojob yicʼot maʼañic mi caj i mʌctañob jiñi yambʌ quixtañujob mi yom i temob i tʼan yicʼot jiñi soldadojob.

3.   Come jiñi xñoptʼañob yom miʼ cʼuxbiñob i piʼʌlob. Jesús tsiʼ subeyob jiñi xcʌntʼañob i chaʼan: «Mi cʌqʼueñetla tsijib mandar: Cʼuxbin laʼ bʌ» (Juan 13:34, 35). Jiñi isujm bʌ xñoptʼañob temel añob cheʼ bajcheʼ hermanojob tiʼ petol pañimil, i maʼañic baqui ora mi caj i cʼʌmbeñob i bʌ eʼtijibʌl tac chaʼan bʌ guerra (1 Juan 3:10-12).

4.   Come jiñi ñaxam bʌ xñoptʼañob maʼañic tsajñiyob ti guerra. Jiñi libro i cʼabaʼ Encyclopedia of Religion and War mi yʌl chaʼan «maʼañic tsiʼ chaʼleyob coltaya ti guerra jiñi tsaʼ bʌ i ñaxan tsajcayob Jesús yicʼot mi jiñic to tsiʼ meleyob jiñi servicio militar», come yujilob chaʼan «mach lajalic yicʼot jiñi cʼuxbiya tsaʼ bʌ cʌntesʌntiyob ti Jesús yicʼot jiñi mandar muʼ bʌ i yʌl chaʼan yom miʼ cʼuxbiñob i contra». Yicʼot ti jiñi Historia de la decadencia y caída del Imperio romano tsaʼ bʌ i tsʼijbu jiñi Edward Gibbon chʼoyol bʌ ti Gran Bretaña, tsiʼ yʌlʌ: «Wen wocol chaʼan miʼ sujtelob ti soldado jiñi xñoptʼañob [...] come mach mejlobic i cʌy jiñi chʼujul bʌ i yeʼtelob».

 Joñon lojon cheʼ bajcheʼ i testigojob Jehová mi lon j coltan jiñi quixtañujob, i maʼañic mi lon c mel mach bʌ weñic muʼ bʌ mejlel i yotsan ti wocol jiñi país yaʼ baqui añon lojon. Cheʼ jaʼel, mi lon j qʼuel ti ñuc jiñi xʼeʼtelob i chaʼan bʌ yumʌl, come mic chʼujbin lojon ili mandar tac loqʼuem bʌ ti Biblia.

•   «Jacʼbenla i tʼan jiñi añoʼ bʌ i yeʼtel ti pañimil.» (Romanos 13:1.)

•   «Aqʼuenla César i chaʼan bʌ César. Aqʼuenla Dios i chaʼan bʌ Dios.» (Mateo 22:21.)

 Jin chaʼan, mic chʼujbin lojon jiñi mandar tac am bʌ i chaʼan jiñi yumʌlob, mic toj lojon jiñi impuesto tac yicʼot mij coltan lojon jiñi yumʌlob cheʼ bʌ mic jacʼben lojon i tʼan chaʼan wen miʼ yajñelob tiʼ pejtelel jiñi quixtañujob.