Come mij cʌcʼ lojon ti ñuc jiñi ticʼojel am bʌ ti Biblia baqui miʼ yʌl chaʼan mach yomic mic jacʼ lojon cheʼ jajayajl mic jopʼbentel lon c mul o mic wajlentel lojon. Jumpʼejl ejemplo, jiñi Biblia miʼ yʌl: «Jini muʼ bʌ i ticʼ jini xwajleya miʼ taj i tsʼaʼlentel» (Proverbios 9:​7, 8; 26:4). Maʼañic mic mulan lon c tech tʼan tiʼ contra yambʌlob chaʼan mic pʌs lojon chaʼan mach isujmic woli bʌ i yʌjlel, com bʌ lojon jiñʌch chaʼan utsʼat mi lon j cajñel tiʼ tojlel Dios (Salmo 119:69).

 Tiʼ sujm, añʌch «i yorajlel mi lac ñʌjchʼel» yicʼot «an i yorajlel mi lac chaʼlen tʼan» (Eclesiastés 3:7). Jin chaʼan, cheʼ bʌ an majqui yom i cʌn i sujmlel mucʼʌch c suben lojon, pero maʼañic mic toʼol tech lojon leto. Cheʼ bajcheʼ ili, woli c tsajcʌben lojon i melbal Jesús yicʼot jiñi ñaxam bʌ xñoptʼañob.

•   Jesús maʼañic chuqui tsiʼ yʌlʌ cheʼ bʌ tsaʼ jopʼbenti i mul tiʼ tojlel Pilato (Mateo 27:11-​14; 1 Pedro 2:​21-​23). Cheʼ bʌ tsaʼ subenti ti xquixñijel yicʼot ti xwoʼlel, ñʌchʼʌl jach tsaʼ ajñi jaʼel. Tsaʼ bʌ i mele jiñʌch cheʼ tsiʼ yʌcʼʌ chaʼan miʼ cʌjñel tiʼ melbal, cheʼʌch bajcheʼ miʼ yʌl jiñi principio chaʼan ti lac melbal miʼ cʌjñel jiñi wem bʌ lac ñaʼtʌbal (Mateo 11:19). Pero tsaʼʌch i chaʼle tʼan cheʼ bʌ i cʼʌjñibalʌch tsiʼ qʼuele tiʼ caj tsaʼ bʌ i techeyob jopʼtʼan (Mateo 15:​1-3; Marcos 3:​22-​30).

   Jesús tsiʼ cʌntesa jiñi xcʌntʼañob i chaʼan chaʼan mach yomic miʼ tajob i chʼijiyemlel cheʼ mi toʼol jopʼbentelob i mul. Tsiʼ yʌlʌ: «Tijicñayetla cheʼ miʼ tsʼaʼleñetla winicob cheʼ miʼ ticʼlañetla, cheʼ miʼ pʌqʼuetla ti jujunchajp jontolil chaʼan tsaʼ laʼ ñopoyon» (Mateo 5:​11, 12). Tiʼ subeyob jaʼel chaʼan tajol jiñi wocol jiñʌch muʼ bʌ i mejlel i coltañob chaʼan miʼ tajbeñob i yorajlel subtʼan. Ti jiñi bʌ ora, Jesús miʼ tsʼʌctesan tsaʼ bʌ i yʌlʌ: «Mi caj cʌqʼueñetla tʼan muʼ bʌ caj laʼ sub yicʼot laʼ ñaʼtʌbal mach bʌ mejlic i contrajintel» (Lucas 21:12-​15).

•   Jiñi apóstol Pablo tiʼ sube jiñi xñoptʼañob chaʼan mach yomic miʼ toʼol techob leto, «come lolom jach pejtelel iliyi. Maʼanic i cʼʌjñibal» (Tito 3:9; Romanos 16:17, 18).

•   Jiñi apóstol Pedro tiʼ sube jiñi xñoptʼañob chaʼan miʼ coltañob i bʌ cheʼ mucʼʌch i mejlelob (1 Pedro 3:​15). Cheʼ bajcheʼ ili tsiʼ pʌsʌ chaʼan jiñi lac melbal ñumen an i pʼʌtʌlel cheʼ bajcheʼ lac tʼan. Tiʼ tsʼijbu: «Mi laʼ mel chuqui wen chaʼan mi laʼ ñʌchʼtesʌbeñob i tontojlel jini winicob mach bʌ añobic i ñaʼtʌbal» (1 Pedro 2:​12-​15).