Maʼañic. Joñon lojon maʼañic mic taj lojon j coltʌntel cheʼ mic chaʼlen lojon subtʼan ti jujumpʼejl otot (Efesios 2:8). ¿Chucoch?

 Laʼ cu lac ñaʼtan chaʼan juntiquil wiñic am bʌ i pʼuntaya mi yʌl chaʼan mi caj i yʌqʼuen jumpʼejl ñuc bʌ majtañʌl tiʼ pejtelel jiñi muʼ bʌ i cʼotelob yaʼ baqui mi yʌl yicʼot ti jiñi tsic cheʼ bajcheʼ tsiʼ yʌlʌ. Mi jiñi wiñic tsiʼ yʌqʼueyonla i tʼan chaʼan mi lac ñopben chuqui mi yʌl, ¿ñomach chaʼan mucʼʌch caj lac majlel yaʼ baqui tsiʼ yʌlʌ? I mach cojic jach jiñi, mi caj lac subeñob lac familia yicʼot la camigojob chaʼan mi majlelob jaʼel. Pero maʼañic majqui miʼ mejlel ti aqʼuentel jiñi majtañʌl chaʼan jach miʼ jacʼbeñob i tʼan jiñi wiñic, come jiñi majtañʌl mach cheʼic jach mi lac toʼol taj.

 Cheʼ lajal jaʼel, jiñi i testigojob Jehová mi lon c ñop chaʼan Dios mucʼʌch caj i tsʼʌctesan jiñi i tʼan chaʼan mi caj i yʌqʼuen i cuxtʌlel mach bʌ añic miʼ jilel jiñi muʼ bʌ i jacʼbeñob i tʼan (Romanos 6:23). Mic chaʼlen lojon wersa ti subtʼan chaʼan jiñi yambʌ quixtañujob miʼ tajob jaʼel jiñi majtañʌl. Pero cujil lojon chaʼan tiʼ melob ili eʼtel maʼañic mi caj i yʌqʼuen lojon j coltʌntel (Romanos 1:17; 3:28). Tiʼ sujmlel, mi juntiquilic to quixtañu an cabʌl chuqui mi’ mejlel i mel chaʼan miʼ taj jiñi ñumen ñuc bʌ majtañʌl tilem bʌ ti Dios. Jiñi Biblia miʼ ñumen tsictesan iliyi: «Tsiʼ coltayonla. Mach chaʼañic toj bʌ lac melbal pero chaʼan tiʼ pʼuntaya tsiʼ coltayonla» (Tito 3:5).