Jiñi i testigojonbʌlon Jehová maʼañic mi lon c mel jiñi cumpleaño tac come mi lon c ñop chaʼan Dios mach weñic miʼ qʼuel. Anquese jiñi Biblia maʼañic miʼ jamʌ al chaʼan maʼañic mi lon c mel jiñi cumpleaño tac, añʌch muʼ bʌ i coltañon lon c ñaʼtan chaʼan bajcheʼ yilal miʼ qʼuel Dios. Laʼ laj qʼuel chʌnchajp yicʼot jiñi cʌntesa tac am bʌ ti Biblia muʼ bʌ i taj i bʌ yicʼot.

1.   Jiñi cumpleaño tac loqʼuem ti jiñi mach bʌ i sujmic ñopbalʌl tac. Jumpʼejl diccionario miʼ yʌl chaʼan mi juntiquil maʼañic miʼ mel jiñi i cumpleaño miʼ mejlel ti tʌcʼlʌntel ti jontol bʌ espíritujob, i mi mucʼʌch i mel maʼañic mi caj i tʌcʼlʌntel come jiñi muʼ bʌ i cʼotelob ti jiñi qʼuiñijel miʼ poj ñaʼtʌntel chaʼan miʼ mejlel i cʌntañob. Yambʌ libro miʼ yʌl chaʼan ti wajali miʼ tsʼijbuntel chuqui ti tsic tiʼ yila pañimil juntiquil chaʼan miʼ melbentel i horóscopo, i chucul jaʼel ti jiñi astrología chaʼan miʼ ñaʼtʌntel bajcheʼ yilal miʼ cajel. I jin jach bʌ libro miʼ chaʼ al: «Miʼ ñaʼtʌntel chaʼan jiñi vela an i pʼʌtʌlel miʼ tsʼʌctesan chuqui muʼ bʌ i cʼajtintel» (The Lore of Birthdays).

    Pero jiñi Biblia miʼ tsʼaʼlen jiñi magia, adivinación, espiritismo yicʼot «yan tac bʌ cheʼ bʌ bajcheʼ ili» (Deuteronomio 18:14,TNM; Gálatas 5:19-21). Junchajp chucoch Dios tsiʼ yʌqʼue i toj i mul jiñi tejclum Babilonia ti wajali jiñʌch tiʼ caj cheʼ miʼ cʼʌñob jiñi astrología, junchajp bajcheʼ miʼ poj ñaʼtañob chuqui muʼ bʌ caj i yujtel (Isaías 47:11-15). Anquese jiñi i testigojonbʌlon Jehová maʼañic mi lon c wen qʼuel baqui tilem jujunchajp qʼuiñijel o costumbre tac, mucʼʌch c chʼʌm lon ti ñuc muʼ bʌ i jamʌ al jiñi Biblia chaʼan jiñi tilem tac bʌ ti xiba.

2.   Jiñi ñaxam bʌ xñoptʼañob maʼañic tsiʼ meleyob cumpleaño. Jumpʼejl libro miʼ yʌl chaʼan jiñi ñaxam bʌ xñoptʼañob «tsiʼ qʼueleyob jiñi cumpleaño bajcheʼ jumpʼejl qʼuiñijel loqʼuem bʌ ti jiñi mach bʌ i sujmic ñopbalʌl» (The World Book Encyclopedia). Jiñi Biblia miʼ pʌs chaʼan jiñi apóstolob yicʼot yambʌ xñoptʼañob tsaʼ bʌ cʌntesʌntiyob ti Jesús, tsiʼ pʌsʌyob cʌytʌl bajcheʼ yilal yom jiñi xñoptʼañob (2 Tesalonicenses 3:6).

3.   An jach jumpʼejl qʼuiñijel tsaʼ bʌ subenti i melob jiñi xñoptʼañob: Jiñʌch chaʼan miʼ cʼajtesañob cheʼ bʌ tsaʼ chʌmi Jesús (Lucas 22:17-​20). Jiñi Biblia miʼ yʌl chaʼan «jini qʼuin cheʼ mi lac chʌmel ñumen tijicñayʌch bajcheʼ jini qʼuin cheʼ mi laj qʼuel pañimil» (Eclesiastés 7:1). Cheʼ bʌ Jesús tsajñi wʌʼ ti pañimil wen tsiʼ mele jiñi i yeʼtel i wen tsaʼ qʼuejli ti Dios, jin chaʼan ñumen ñuc bʌ i cʼʌjñibal jiñʌch cheʼ bʌ tsaʼ chʌmi i mach jiñic cheʼ bʌ tsiʼ yila pañimil (Hebreos 1:4).

4.   Jiñi Biblia maʼañic miʼ yʌl chaʼan jiñi i wiñicob Dios ti wajali tsiʼ meleyob i cumpleaño. Mach yʌlolic maʼañic tsaʼ otsʌnti yaʼ ti Biblia, come mucʼʌch i taj ti tʼan chaʼpʼejl cumpleaño tsaʼ bʌ i meleyob jiñi mach bʌ añic miʼ chʼujutesañob Dios, pero mach utsʼatic tsaʼ bʌ ujti ti jiñi qʼuiñijel tac (Génesis 40:20-22; Marcos 6:21-29).

 Jiñi tatʌlob testigojoʼ bʌ mucʼʌch i cʼuxbiñob i yalobilob, jin chaʼan baqui jach ora miʼ yʌqʼueñob i majtan o miʼ chajpañob alʌ qʼuiñijel chaʼan miʼ ñusañob i bʌ. Miʼ ñop i lajiñob Dios come miʼ yʌqʼuen chuqui tac wem bʌ jiñi i wiñicob (Mateo 7:11). I yalobilob jiñi Testigojob maʼañic miʼ ñaʼtañob chaʼan an chuqui wem bʌ woliʼ sʌtob. Laʼ laj qʼuel chuqui miʼ yʌlob:

•   «Ñumen tijicñayon cheʼ bʌ mi cʌqʼuentel c majtan cheʼ bʌ mach pijtʌbilic c chaʼan» (Tammy, am bʌ 12 i jabilel).

•   «Jiñi c papá yicʼot c mamá miʼ yʌqʼueñoñob c majtan pero mach jiñic cheʼ tij cumpleaño, i jiñi mic wen mulan» (Gregory, am bʌ 11 i jabilel).

•   «Jiñi qʼuiñijel tac baqui mucʼ jach i cʼuxtʌl pastel yicʼot miʼ yujtel cʼay, maʼañic mic mulan. Ñumen wento muʼ bʌ i mejlel ti cotot» (Eric, am bʌ 6 i jabilel).