Toʼol tʼan jach bʌ: Jiñi i testigojob Jehová maʼañic miʼ sʌclañob i tsʼʌcʌntel ti doctor come maʼañic miʼ ñopob jiñi tsʼac tac.

 Isujmʌch bʌ: Joñon lojon bajcheʼ i testigojob Jehová mi lon chaʼlen wersa chaʼan mic sʌclan lojon wem bʌ tsʼʌcʌntel ti doctor. Cheʼ bʌ miʼ cʼamʼan juntiquil lon piʼʌl o juntiquil ti lon c familia yom bʌ miʼ chaʼlentel ti operar, mic sʌclan lojon doctorob yicʼot wen yujilob i melol operación tac mach bʌ añic miʼ cʼʌñob chʼichʼ. I mi lon j qʼuel ti ñuc jiñi woli tac bʌ ti cʼʌjñel chaʼan ili tsʼʌcʌntel. Cheʼ jaʼel, jiñi tsʼʌcʌntel baqui maʼañic miʼ cʼʌjñel chʼichʼ muʼ bʌ i cʼʌñob jiñi i testigojob Jehová miʼ cʼʌjñel jaʼel ti yan tac bʌ país chaʼan miʼ tsʼʌcʌntel yambʌ quixtañujob. Ti ili ora, majqui jach miʼ mejlel i cʼajtin tsʼac tac mach bʌ yicʼotic chʼichʼ, come jiñi muʼ bʌ i yotsʌbentel chʼichʼ miʼ mejlel i taj cʼamʌjel tac, tajol i bʌcʼtal mach weñic mi caj i yubin cheʼ bʌ miʼ yotsʌbentel yambʌ chʼichʼ yicʼot miʼ mejlelob ti ñajʌyel jaʼel jiñi muʼ bʌ i cʼʌñob o i yʌcʼob chʼichʼ.

 Toʼol tʼan jach bʌ: Jiñi i testigojob Jehová miʼ chaʼleñob tsʼʌcaya yicʼotob i chʼujbiya ti Dios.

 Isujmʌch bʌ: Maʼañic baʼ c wis chaʼle lojon tsʼʌcaya yicʼot bʌ lon c chʼujbiya ti Dios.

 Toʼol tʼan jach bʌ: Jiñi tsʼʌcʌntel cheʼ bʌ maʼañic miʼ cʼʌjñel chʼichʼ wen lets i tojol.

 Isujmʌch bʌ: Anquese lets i tojol miʼ loqʼuel cheʼ maʼañic mi lac chʼʌm chʼichʼ, pero ñumen an i wenlel. a

 Toʼol tʼan jach bʌ: Cabʌl Testigojob añobix bʌ i jabilel yicʼot xbiʼtalob miʼ chʌmelob ti jujumpʼejl jab ti’ caj chaʼan maʼañic miʼ chʼʌmob chʼichʼ.

 Isujmʌch bʌ: Ili tʼan maʼañic baqui chucul. Ti ili ora, cabʌl doctorob miʼ melob operación tac ti lac pusicʼal o jiñi ortopédica bʌ i cʼabaʼ yicʼot miʼ mejlel i locʼob am bʌ lac chaʼan ti lac malil chaʼan mi’ yotsañob ti yambʌ, i maʼañic miʼ cʼʌñob chʼichʼ. b Jiñi mach bʌ añic miʼ chʼʌmob chʼichʼ lajalʌch miʼ lajmelob i cʼamʌjel cheʼ bajcheʼ jiñi muʼ bʌ i chʼʌmob chʼichʼ, anquese alʌ chʼitoñob to. c Maʼañic majqui miʼ mejlel i yʌl chaʼan juntiquil cʼam bʌ mi’ caj ti chʌmel ti’ caj chaʼan maʼañic miʼ chʼʌm chʼichʼ o cuxul mi caj i yajñel mi mucʼʌch i chʼʌm.

 Tiʼ caj chaʼan jiñi ñopoloʼ bʌ i chaʼan ti Dios, i mach tiʼ caj jiñi tsʼac tac. Jiñi Antiguo yicʼot jiñi Nuevo Testamento miʼ subeñonla chaʼan mach yomic cheʼ mi laj cʼux jiñi chʼichʼ (Génesis 9:4; Levítico 17:10; Deuteronomio 12:23; Hechos 15:​28, 29). Cheʼ jaʼel, chaʼan Dios, jiñi chʼichʼ i símbolojlel laj cuxtʌlel (Levítico 17:14). Jin chaʼan, joñon lojon bajcheʼ i testigojob Jehová mi lon c chʼujbin jiñi mandar loqʼuem bʌ ti Biblia muʼ bʌ i yʌl chaʼan mach yomic cheʼ mi laj cʼux jiñi chʼichʼ, come mi lon j qʼuel ti ñuc jiñi Dios tsaʼ bʌ i yʌqʼueyonla laj cuxtʌlel.

 Ti wajali jiñi doctorob tsiʼ ñaʼtayob chaʼan wen wocol ti melob jiñi tsʼʌcaya mach bʌ yicʼotic chʼichʼ, i tsiʼ yʌlʌyob chaʼan jiñi muʼ bʌ i cʼajtiñob ili tsʼʌcʌntel baqui maʼañic miʼ cʼʌjñel chʼichʼ lajalix cheʼ bajcheʼ woliʼ cʼajtiñob i tsʌnsʌntel. Pero ti ili jabil tsaʼix bʌ ñumi tilel tsaʼix qʼuextʌyi jiñi ñaʼtʌbil bʌ i chaʼan jiñi doctorob. Jumpʼejl ejemplo, cheʼ ti jabil 2004 tsaʼ loqʼui jumpʼejl revista muʼ bʌl i yʌl chaʼan tsʼac tac, i tsiʼ yʌlʌ ili tʼan: «Jiñi tsʼʌcʌntel tac muʼ bʌ i melbentelob jiñi i testigojob Jehová jiñʌch muʼ bʌ caj i mejlel jaʼel ti jiñi jabil tac muʼ to bʌ caj i tilel». d Yicʼot cheʼ ti jabil 2010, jiñi libro am bʌ i cʼabaʼ Medicina transfusional tsiʼ yʌlʌ chaʼan wocolix i yʌlʌ jiñi tsʼʌcaya tac muʼ bʌ i mejlel, come «jiñi tʼan cʌmbil bʌ cheʼ bajcheʼ ‹operación mach bʌ añic miʼ cʼʌjñel chʼichʼ› mi caj i mejlel i wen cʼʌñob cheʼ bajcheʼ jiñi ñʌmʌl bʌ tiʼ melol».

 Cabʌl doctorob añoʼ bʌ tiʼ pejtelel pañimil an chuqui tac miʼ cʼʌñob chaʼan maʼañic miʼ sʌtob cabʌl chʼichʼ cheʼ bʌ miʼ melob wocol tac bʌ operación. Jiñi tsʼʌcaya cheʼ bʌ bajcheʼ iliyi mucʼʌch i mejlel jaʼel ti yan tac bʌ país baqui maʼañic cabʌl i taqʼuiñob, i yonlel quixtañujob mach bʌ i testigojobic Jehová miʼ cʼajtiñob ili tsʼʌcʌntel jaʼel.