Jiñi i testigojob Jehová an i cʼʌñʌyob cabʌl traducción tac chaʼan miʼ pejcañob jiñi Biblia. Pero miʼ wen qʼuelob ti ñuc jiñi Traducción del Nuevo Mundo de las Santas Escrituras, am bʌ ti cabʌl tʼan tac, come miʼ chʼʌm tilel i cʼabaʼ Dios, tsʼʌcʌlʌch yicʼot mucʼʌch i chʼʌmbentel isujm.

•   Miʼ chʼʌm tilel i cʼabaʼ Dios. Mach tiʼ pejtelelic jiñi muʼ bʌ i chaʼleñob ti imprimir jiñi Biblia miʼ yʌcʼob ti ñuc jiñi tsaʼ bʌ i yʌcʼʌ ti tsʼijbuntel. Jumpʼejl ejemplo, an jumpʼejl traducción muʼ bʌ i yʌl ñumen ti 70 cʼabaʼʌl tsaʼ bʌ i chaʼleyob coltaya chaʼan miʼ mejlel jiñi Biblia pero maʼañic miʼ chʼʌm tilel mi junsujtelic to i cʼabaʼ Jehová, jiñi tsaʼ bʌ i yʌcʼʌ ti tsʼijbuntel jiñi Biblia.

   Pero jiñi Traducción del Nuevo Mundo, ñumen ti mil miʼ chʼʌm tilel i cʼabaʼ Dios cheʼʌch bajcheʼ ti jiñi jun tsaʼ bʌ tsʼijbunti ti wajali, i cheʼ jaʼel, maʼañic miʼ pʌs i cʼabaʼ jiñi tsaʼ bʌ i chaʼleyob ti traducir.

•   Tsʼʌcʌlʌch. An traducción tac chaʼan jiñi Biblia mach bʌ tsʼʌcʌlic mi yʌl jiñi tʼan cheʼ bajcheʼ ti jiñi jun tsaʼ bʌ tsʼijbunti ti wajali. Jumpʼejl ejemplo, ti jumpʼejl traducción mi yʌl yaʼ ti Mateo 7:13: «Ochenla ti chʼoʼchʼoc bʌ i tiʼ, come colem i tiʼ, ñuc i bijlel muʼ bʌ i majlel ti toj mulil». Pero ti jiñi tʼan baʼ tsaʼ ñaxan tsʼijbunti ti wajali maʼañic mi yʌl «toj mulil», mi yʌl «jisʌntel». Tajol jiñi tsaʼ bʌ i chaʼleyob ti traducir tsiʼ ñaʼtayob chaʼan mi caj i tojob i mul ti cʼajc tiʼ pejtelel ora jiñi jontoloʼ bʌ. Pero jiñi Biblia mach cheʼic mi yʌl bajcheʼ jiñi. Jin chaʼan, jiñi Traducción del Nuevo Mundo mi yʌl «jisʌntel» cheʼʌch bajcheʼ tsaʼ ñaxan tsʼijbunti ti wajali.

•   Miʼ chʼʌmbentel isujm. Isujmʌch chaʼan jumpʼejl traducción yom wen tsʼʌcʌl chuqui mi yʌl, pero yom miʼ chʼʌmbentel isujm jaʼel. Laʼ laj qʼuel jumpʼejl ejemplo. Cabʌl Biblia miʼ chaʼlen ti traducir ti literal jiñi tʼan am bʌ ti Mateo 5:3, muʼ bʌ i yʌl cheʼi: «Tijicña jiñi muʼ bʌ i ñaʼtañob maʼañic i bajñel wenlel tiʼ pusicʼal». Pero ili tʼan maʼañic miʼ chʼʌmbentel isujm ti ili ora, jin chaʼan jiñi Traducción del Nuevo Mundo miʼ chaʼlen ti traducir ili versículo cheʼ bajcheʼ iliyi: «Tijicña jiñi muʼ bʌ i ñaʼtañob chaʼan ñucʌch i cʼʌjñibal i chaʼan bʌ Dios».

 Jiñi Traducción del Nuevo Mundo miʼ yʌcʼ ti ñuc i cʼabaʼ Dios, tsʼʌcʌlʌch yicʼot mucʼʌch i chʼʌmbentel isujm, pero an to yambʌ chuqui miʼ yʌcʼ ti cʌjñel jiñi Traducción come maʼañic miʼ chojñel cheʼ bʌ miʼ yʌqʼuentel jiñi quixtañujob. Ili miʼ coltan millón quixtañujob chaʼan miʼ pejcañob jiñi Biblia ti jiñi tʼan yujiloʼ bʌ, anquese maʼañobic i taqʼuin chaʼan miʼ mʌñob i chaʼan.