Maʼañic, come jujuntiquil an ti lac wenta mi laj com lac melben i yeʼtel Dios (Romanos 14:12). Jiñi i testigojob Jehová miʼ cʌntesañob i yalobilob ti jiñi principio tac am bʌ ti Biblia. Pero cheʼ bʌ jiñi i yalobilob tsaʼix i tajayob i colel, yom miʼ bajñel yajcañob mi yomob sujtel ti Testigo jaʼel (Romanos 12:2, TNM; Gálatas 6:5).

 Cabʌl tatʌlob yomob chaʼan jiñi i yalobilob miʼ tajob i wenlel, i cheʼʌch miʼ melob jaʼel jiñi tatʌlob i testigojoʼ bʌ Jehová. Miʼ cʌntesañob muʼ bʌ i mejlel i coltañob tiʼ cuxtʌlelob, cheʼ bajcheʼ yom miʼ pʌsob i melbal yicʼot bajcheʼ miʼ mejlel i pʌsob i ñopoñel ti Dios. Jiñi i testigojob Jehová yujilob chaʼan jiñi an tac bʌ ti Biblia jiñʌch muʼ bʌ i mejlel i coltañonla chaʼan wen bajcheʼ mi lac chumtʌl. Jin chaʼan, miʼ chaʼleñob wersa chaʼan miʼ cʌntesañob i yalobilob cheʼ bʌ miʼ comol chajpañob jiñi Biblia yicʼot cheʼ miʼ tem majlelob ti tempa bʌ muʼ bʌ i melob jiñi i testigojob Jehová (Deuteronomio 6:6, 7). I cheʼ bʌ tsaʼix i tajayob i jabilel, jiñi i yalobilob añobix i ñaʼtʌbal chaʼan mi yajcañob mi yomob sujtel ti Testigo jaʼel cheʼ bajcheʼ jiñi i tatob.

•  ¿Muʼ ba i yʌcʼob ti chʼʌmjaʼ i yalobilob jiñi i testigojob Jehová cheʼ tsaʼ jaxto chʼocʼa?

•  ¿Mach ba yomix i qʼuelob i yalobil jiñi i testigojob Jehová cheʼ bʌ jiñi xcolel miʼ yʌl chaʼan mach yomic i chʼʌmjaʼ?

•  ¿Chucoch mi pʌyob majlel i yalobilob ti subtʼan jiñi i testigojob Jehová?

•  ¿Muʼ ba i melob jiñi i testigojob Jehová jiñi qʼuiñijel tac muʼ bʌ i melob jiñi lac piʼʌlob?

•  ¿Bajcheʼ yubil mi yubiñob i bʌ i yalobilob jiñi i testigojob Jehová?

 Maʼañic. Yaʼ ti Biblia maʼañic baqui mi lac taj chaʼan yom miʼ yʌcʼob ti chʼʌmjaʼ jiñi tsaʼ jaxto bʌ chʼocʼa. Jumpʼejl ejemplo, miʼ yʌl chaʼan jiñi xñoptʼañob ti ñaxam bʌ siglo, cheʼ maxto chʼʌmʌlobic i chaʼan jaʼ, tsiʼ ñʌchʼtayob jiñi wen tʼan, ‹tsiʼ jacʼʌyob› i tsiʼ chaʼ ñaʼtayob i bʌ chaʼan tsaʼ bʌ i meleyob (Hechos 2:14, 22, 38, 41). Ili yom i yʌl chaʼan mi an majqui yom i chaʼlen chʼʌmjaʼ, yom miʼ chʼʌmben i sujm chuqui miʼ yʌl jiñi Biblia, miʼ ñop chuqui yaʼ tsʼijbubil, i miʼ chumtan cheʼʌch bajcheʼ miʼ yʌl jiñi cʌntesʌntel. I la cujil chaʼan juntiquil tsaʼ jaxto bʌ chʼocʼa maʼañic miʼ mejlel i ñaʼtan cheʼ bajcheʼ jiñi.

 Cheʼ bʌ jiñi xbiʼtal wolix i colel majlel miʼ mejlel i cʼotel i chʼʌmjaʼ. Chaʼan miʼ mejlel i mel, yomʌch miʼ ñaxan ñaʼtan chaʼan jiñi chʼʌmjaʼ wen ñuc i cʼʌjñibal.

 Maʼañic. Anquese jiñi tatʌlob chʼijiyem miʼ yubiñob mi an juntiquil i yalobil mach bʌ yomic ochel tiʼ ñopbal, mach tiʼ caj jiñi miʼ cʌy i pʌsbeñob cʼuxbiya. I maʼañic miʼ cʌy i pejcañob tiʼ caj chaʼan mach yomic sujtel ti Testigo.

 An cabʌl chucoch miʼ pʌyob majlel ti subtʼan. a

•   Jiñi Biblia mi yʌl chaʼan jiñi tatʌlob yom miʼ subeñob i chaʼan bʌ Dios jiñi i yalobilob yicʼot miʼ cʌntesañob i chʼujutesan (Efesios 6:4). I chʼujutesʌntel Dios yom i yʌl mi lac suben jiñi lac piʼʌlob jiñi ñopol bʌ lac chaʼan, jin chaʼan jiñi subtʼan jiñʌch ñuc bʌ i cʼʌjñibal ti laj cʌntesʌntel ti jiñi lac ñopbal (Romanos 10:9, 10; Hebreos 13:15).

•   Jiñi Biblia miʼ suben jiñi xcolelob chaʼan yom miʼ yʌqʼueñob i «ñuclel lac Yum» (Salmo 148:12, 13). Junchajp bajcheʼ mi la cʌqʼuen i ñuclel Dios jiñʌch cheʼ mi la cʌcʼ ti cʌñob jiñi Dios. b

•   Jiñi xbiʼtalob cabʌl chuqui miʼ cʌñob cheʼ mi loqʼuelob ti subtʼan yicʼot i tatob. Jumpʼejl ejemplo, miʼ cʌñob bajcheʼ yom miʼ pejcañob jiñi lac piʼʌlob, miʼ cʌñob i pʌs i pʼuntaya, miʼ qʼuelob ti ñuc jiñi yañoʼ bʌ yicʼot miʼ tajob wem bʌ i melbal, i maʼañic miʼ pijtañob chaʼan miʼ chaʼ sutqʼuibentelob. Cheʼ jaʼel, miʼ ñumen cʌñob jiñi Biblia i miʼ ñumen pʼʌtʼañob i ñopoñel ti Dios.

 Jiñi i testigojob Jehová maʼañic miʼ melob qʼuiñijel tac muʼ bʌ i tsʼaʼlen Dios, i mach yʌlʌyic miʼ chaʼan jiñi ñopbal tac o baqui jach bʌ (2 Corintios 6:14-17; Efesios 5:10). c Jumpʼejl ejemplo, maʼañic mi lon c mel jiñi cumpleaño yicʼot navidad come mach loqʼuemic ti Biblia.

 Mic mulan lojon ajñel quicʼot lon c familia yicʼot mi lon cʌqʼuen lojon i majtan jiñi lon j calobil. I maʼañic mic chʼʌm lojon ti ñuc chuqui miʼ yʌl jiñi calendario chaʼan jala yom mic tempan lon bʌ bajcheʼ familia yicʼot chaʼan yom miʼ cʌqʼuen lon c bʌ majtañʌl. Muʼ bʌ c mel lojon jiñʌch mic tempan lon c bʌ cheʼ com lojon yicʼot mi cʌqʼuen lon c bʌ majtañʌl ti baqui jach bʌ qʼuin ti jiñi jabil.