I testigojonbʌlon Jehová mi lon c tsictesʌben chuqui miʼ yʌl jiñi Biblia majqui jach, cheʼ to jaʼel jiñi am bʌ i yʌlʌyob chaʼan maʼañic miʼ mulañob. ¿Chucoch? Come mi lon j cʼuxbin Dios yicʼot jiñi quixtañujob (Mateo 22:37-​39). Jiñi lon j cʼuxbiya ti Dios miʼ ñijcañon lojon c jacʼben i mandar i yalobil chaʼan mi lon c suben jiñi wiñicob xʼixicob (Hechos 10:42; 1 Juan 5:3). Jin chaʼan, maʼañic mi lon j cʌy lon c sub muʼ bʌ i yʌl jiñi Biblia cheʼ bajcheʼ tsiʼ meleyob jiñi xʼaltʼañob ti wajali (Jeremías 25:4). Cheʼ jaʼel, jiñi lon j cʼuxbiya am bʌ lon c chaʼan tiʼ tojlel jiñi quixtañujob jiñʌch muʼ bʌ i ñijcañon lojon chaʼan mi lon c sub jiñi wen tʼan chaʼan yumʌntel, cheʼ to jaʼel jiñi mach bʌ yomobic come miʼ mejlel i coltañob chaʼan maʼañic miʼ jisʌntelob (Mateo 24:14).

 Cheʼ bʌ mi lon c chaʼ julaʼtañob tiʼ yotot jiñi mach bʌ yomobic, tajol miʼ mejlel ti loqʼuel juntiquil yom bʌ i ñʌchʼtan. Jin tacʌch chaʼan iliyi:

•   Tajol miʼ cʼotel ti chumtʌl yambʌ quixtañujob.

•   An quixtañujob muʼ bʌ i mulan i ñʌchʼtan.

•   Jiñi quixtañujob miʼ yʌñob i pensar. Jiñi wocol tac muʼ bʌ i qʼuelob ti ili pañimil o i bajñel wocol an i yʌqʼueyob chaʼan miʼ yʌñob i pensar i an cʼotem i ñaʼtañob «chaʼan ñucʌch i cʼʌjñibal i chaʼan bʌ Dios» (Mateo 5:3, Traducción del Nuevo Mundo [TNM]). Cheʼ to jaʼel jiñi muʼ bʌ i contrajiñob jiñi wen tʼan miʼ mejlelob ti yʌjñel i pensar cheʼ bajcheʼ tsaʼ ujti tiʼ tojlel jiñi apóstol Pablo (1 Timoteo 1:​13).

 Maʼañic mi lon c xicʼ chaʼan jiñi quixtañujob miʼ wersa ñʌchʼtañon lojon (1 Pedro 3:​15). Come mi lon c ñaʼtan chaʼan ti jujuntiquil an tiʼ wenta chaʼan miʼ yajcan i ñopbal (Deuteronomio 30:19, 20).