Maʼañic mi lon c ñop. Anquese joñon lojon bajcheʼ i testigojob Jehová mi lon c ñop chaʼan Dios tsiʼ mele tiʼ pejtelel chuqui tac an, pero maʼañic mi lon c ñop chaʼan jiñi pañimil tsaʼ jach mejli ti 6 qʼuin muʼ bʌ i jalʼan 24 ora ti jujumpʼejl qʼuin. ¿Chucoch? Come an tʼan tac muʼ bʌ i contrajin jiñi Biblia. Laʼ laj qʼuel chaʼchajp muʼ bʌ i yʌjlel chaʼan jiñi.

1.   I jalʼan jiñi 6 qʼuin cheʼ bʌ tsaʼ mejli jiñi Pañimil. An muʼ bʌ i ñopob chaʼan ili Pañimil tsaʼ mejli ti 6 qʼuin muʼ bʌ i jalʼan 24 ora ti jujumpʼejl qʼuin cheʼ bajcheʼ cʌmbil bʌ lac chaʼan ti ili ora. Pero yaʼ ti Biblia, jiñi tʼan qʼuin miʼ mejlel i yʌcʼ ti ñaʼtʌntel cabʌl jabil (Génesis 2:4; Salmo 90:4).

2.   I jabilel Pañimil. An muʼ bʌ i yʌlob chaʼan an jaxto chaʼpʼej uxpʼejl mil jab tsaʼ mejli ili Pañimil. Pero jiñi Biblia mi yʌl chaʼan wʌn añix jiñi panchan yicʼot jiñi Pañimil cheʼ bʌ Dios tsiʼ mele tiʼ pejtelel chuqui tac an ti 6 qʼuin (Génesis 1:1). Jin chaʼan, joñon lojon bajcheʼ i testigojob Jehová mi lon j qʼuel ti ñuc cheʼ bʌ jiñi científicojob miʼ yʌlob chaʼan añix cabʌl millón jab tsaʼ mejli ili Pañimil.

 I sujmʌch chaʼan joñon lojon bajcheʼ i testigojob Jehová mic lon c ñop chaʼan tsaʼʌch mejli tiʼ pejtelel chuqui an tac, pero maʼañic mi lon c contrajin muʼ bʌ i yʌl jiñi científicojob. Mi lon ñop muʼ bʌ i yʌlob jiñi científicojob, come an cʼotem i cʌñob jaʼel chaʼan jiñi muʼ bʌ i cʌntesañonla jiñi Biblia lajalʌch cheʼ bajcheʼ yujiloʼ bʌ jaʼel.