Maʼañic. Jiñi i testigojob Jehová maʼañobic tiʼ contra jiñi vacuna tac. Miʼ ñaʼtañob chaʼan jujuntiquil xñoptʼan mi caj i ñaʼtan mi mucʼʌch caj i jojchʼel o maʼañic. Cabʌl testigojob mucʼʌch bʌ i chʼʌmob jiñi vacuna tac.

 Mi lon c sʌclan wem bʌ doctorob chaʼan mi lon j coltʌntel i mij qʼuel lojon ti ñuc pejtelel chuqui woliʼ mel jiñi ciencia chaʼan miʼ sʌclan tsʼac tac chaʼan jiñi tsʌts tac bʌ cʼamʌjel. Mi lon c wen qʼuel ti ñuc jiñi i yeʼtelob yicʼot bajcheʼ miʼ chaʼleñob wersa jiñi doctorob, ñumento cheʼ bʌ an tsʌts bʌ wocol.

 Jiñi i testigojob Jehová miʼ jacʼob muʼ bʌ i yʌlob jiñi añoʼ bʌ i yeʼtel chaʼan bajcheʼ yom mi laj cʌntan lac bʌ. Jumpʼejl ejemplo, cʼʌlʌl bajcheʼ tsaʼ tejchi jiñi pandemia chaʼan COVID-19, ti ili página chaʼan internet, jiñi i testigojob Jehová an i yʌlʌyob ti cabʌl tʼan chuqui yom miʼ melob jiñi lac piʼʌlob chaʼan miʼ bej jacʼob muʼ bʌ i yʌlob jiñi añoʼ bʌ i yeʼtel. An i yʌlʌyob chaʼan yom mi lac chʼʌm ti ñuc muʼ bʌ i yʌjlel chaʼan jiñi cuarentena yicʼot bajcheʼ tac yom mi lac tempan lac bʌ, yicʼot an i cʼajtesʌbeyonla chaʼan ñuc i cʼʌjñibal cheʼ maʼañic mi lac wen ñochtan yambʌlob, mi lac poc laj cʼʌb yicʼot mi laj cʼʌn cubreboca yicʼot yan tac bʌ am bʌ i yʌlʌyob jiñi añoʼ bʌ i yeʼtel (Romanos 13:1, 2).

 Jiñi i testigojob Jehová, cabʌlix jab cajel i pʌsob tiʼ jun tac ili principio tac:

•   Jujuntiquil yom miʼ ñaʼtan bajcheʼ mi caj i cʌntan i bʌ (Gálatas 6:5).

   «[Ili revista] maʼañic miʼ yʌl chuqui ti tsʼac o tratamiento ñumen wen yicʼot maʼañic miʼ subeñonla chuqui yom mi lac mel. Mucʼ jach i yʌl chuqui tac miʼ yujtel i miʼ cʌy chaʼan jujuntiquil miʼ ñaʼtan chuqui yom miʼ mel» (¡Despertad!, 8 chaʼan febrero, 1987).

   «Jujuntiquil mi caj laʼ ñaʼta mi mucʼʌch caj laʼ chʼʌm vacuna yicʼot laʼ walobilob» (¡Despertad!, 8 chaʼan diciembre, 1965).

•   Mi la cajñel ti doctor come mi laj qʼuel ti ñuc laj cuxtʌlel (Hechos 17:28).

   «Jiñi i testigojob Jehová miʼ cʼʌñob chuqui yujiloʼ bʌ jiñi doctorob chaʼan miʼ tsʼʌcʌntelob. Miʼ cʼuxbiñob i cuxtʌlel i mi chaʼleñob wersa chaʼan bej jal cuxulob pero maʼañic miʼ ñusañob ti pʼis muʼ bʌ i yʌl jiñi Biblia» (La Atalaya, 1 chaʼan mayo, 1976).

   «Mach lecojic cheʼ mi lac majlel ti doctor chaʼan cʼocʼ mi la cajñel yicʼot chaʼan bej jal cuxulonla. Jiñi i testigojob Jehová mach lecojic miʼ qʼuelob cheʼ bʌ miʼ chʼʌmob jumpʼejl tratamiento. Cheʼ bajcheʼ Lucas, juntiquil doctor xñoptʼan bʌ cheʼ ti ñaxam bʌ siglo, an Testigojob doctoroʼ bʌ jaʼel [...]. Jiñi i testigojob Jehová miʼ wen qʼuelob ti ñuc bajcheʼ miʼ coltʌntelob ti doctorob i miʼ yʌqʼueñob wocolix i yʌlʌ chaʼan bajcheʼ miʼ chaʼleñob wersa tiʼ yeʼtelob» (La Atalaya, 1 chaʼan febrero, 2011).