Jiñi historia chaʼan i testigojob Jehová ti ili ora tsaʼ tejchi cheʼ bʌ woliʼ yujtel majlel jiñi jabil 1,800. Ti jiñi bʌ jabil, junmojt xPejcaya bibliajob yaʼ ti Pittsburgh (Pensilvania, Estados Unidos) tsaʼ caji i wen pejcañob majlel jiñi Tsʼijbujel. Junchajp tsaʼ bʌ i meleyob jiñʌch cheʼ tsaʼ caji i lajiñob jiñi cʌntesa muʼ bʌ pʌsob yambʌ ñopbalʌl tac yicʼot jiñi muʼ bʌ i pʌs tiʼ sujmlel jiñi Biblia. Ti wiʼil, tsaʼ caji i yʌlob jiñi tsaʼ bʌ cʼoti i cʌñob. Tsiʼ meleyob libro tac, tiʼ tsʼijbuyob temaj tac chaʼan miʼ loqʼuel ti periódico yicʼot tsiʼ meleyob jiñi revista cʌmbil bʌ lac chaʼan ili ora bajcheʼ La Atalaya. Anunciando el Reino de Jehová.

 Junticlel xPejcaya Biblia jiñʌch jiñi Charles Taze Russell. Jiñʌch tsaʼ bʌ i ñaxan teche i mel jiñi La Atalaya yicʼot jiñi eʼtel chaʼan bʌ cʌntesa loqʼuem bʌ ti Biblia, pero mach jiñic yom yʌl chaʼan jiñʌch tsaʼ bʌ i teche jiñi tsijiʼ bʌ ñopbalʌl. Yom bʌ Russell yicʼot jiñi yambʌ xPejcaya bibliajob (cʼabaʼ tsaʼ bʌ i bajñel otsʌbeyob i bʌ), jiñʌch chaʼan miʼ yʌcʼob ti cʌñol jiñi i cʌntesa Jesucristo yicʼot chaʼan miʼ chʌn lajiñob majlel jiñi congregación i chaʼan xñoptʼañob am bʌ cheʼ ti ñaxam bʌ siglo. Come Jesús jiñʌch tsaʼ bʌ i ñaxan teche eʼtel bajcheʼ xñoptʼan ti wajali, jin chaʼan, mi’ yʌqʼueñon lojon c chʼʌmben isujm chaʼan jiñʌch tsaʼ bʌ i teche lon organización (Colosenses 1:18-20).