Jiñi Watch Tower Bible and Tract Society of Pennsylvania jiñʌch jumpʼejl organización mach bʌ añic miʼ chaʼlen ti ganar taqʼuin tsaʼ bʌ tejchi ti 1884, i cheʼʌch tsaʼ waʼchoconti bajcheʼ miʼ yʌl jiñi mandar am bʌ i chaʼan jiñi estado yaʼ ti Pennsylvania (Estados Unidos). Jiñi i testigojob Jehová miʼ cʼʌñob ili organización cʌmbil bʌ ti yumʌl chaʼan miʼ coltañob jiñi eʼtel muʼ bʌ i melob tiʼ petol pañimil, cheʼ bajcheʼ jiñi Biblia muʼ bʌ i melob yicʼot yan tac bʌ jun loqʼuem bʌ ti Biblia.

 Cheʼ bajcheʼ waʼchocobil i chaʼañob, jiñi Watch Tower miʼ cʼʌjñel tiʼ «chaʼan bʌ Dios, ti cʌntesa yicʼot ti coltaya». Jiñi ñumen ñuc bʌ chaʼan jiñi Watch Tower jiñʌch i subol «jiñi wen tʼan yicʼot cʌntesa chaʼan bʌ i Yumʌntel Dios am bʌ tiʼ wenta Jesucristo chaʼan miʼ yuman». Cojach jiñi pʌybil bʌ miʼ mejlel ti ochel yaʼi, mach yʌlʌyic jaypʼejl taqʼuin tsiʼ yʌcʼʌ loqʼuem bʌ tiʼ pusicʼal. Jiñi ochemoʼ bʌ yicʼot jiñi añoʼ bʌ tiʼ wenta ili organización miʼ coltañob jiñi Junmojt muʼ bʌ i pʌsob bij i chaʼan i testigojob Jehová.

 Mach cojach miʼ cʼʌjñel jiñi Watch Tower Bible and Tract Society of Pennsylvania, jiñi i testigojob Jehová an cabʌl bajcheʼ cʌmbilob ti yumʌl ti yambʌ país tac. An muʼ bʌ i cʼʌñob tiʼ cʼabaʼ bajcheʼ «Watch Tower», «Watchtower» o an muʼ bʌ i chaʼleñob ti traducir iliyi.

 Cʼʌlʌl cheʼ bʌ tsaʼ waʼchoconti ili organización tac cʌmbil bʌ ti yumʌl, an cabʌl chuqui tajbil lon c chaʼan, cheʼ bajcheʼ tac iliyi:

•   I tsʼijbuntel yicʼot i pucol jun tac. An lon c pucu cheʼ bʌ 220 millón Biblia tac yicʼot lʌcʼʌ cheʼ bʌ 40 mil millón jun tac loqʼuem bʌ ti Biblia, i ñumen ti 700 tʼan tac miʼ mejlel iliyi. Wocolix i yʌlʌ jiñi página jw.org, ñumen ti 120 tʼan tac miʼ mejlel ti pejcʌntel jiñi Biblia yaʼ ti Internet, i mach tojbilic chaʼan miʼ pejcʌntel yicʼot ti tajbentel i jacʼbal cʼajtiya tac cheʼ bajcheʼ «¿Chuqui jiñi i Yumʌntel Dios?».

•   Cʌntesa. Mi cʌcʼ lojon cʌntesa tac loqʼuem bʌ ti Biblia. Jumpʼejl ejemplo, cʼʌlʌl ti 1943, jiñi Cʌntesʌntel loqʼuem bʌ ti Biblia i chaʼan Galaad de la Watchtower an i colta chaʼan ñumen ti 8 mil i testigojob Jehová miʼ chaʼleñob subtʼan bajcheʼ misionero o chaʼan miʼ pʼʌtʼesañob jiñi eʼtel chaʼan bʌ subtʼan tiʼ petol pañimil yicʼot chaʼan luʼ wen miʼ loqʼuel. Millón quixtañujob, cabʌl mach bʌ Testigojobic, miʼ chʼʌmob i cʌntesʌntel yaʼ ti tempa bʌ tac muʼ bʌ i mejlel ti jujumpʼejl congregación tiʼ pejtelel semana. Cheʼ jaʼel, mi lon c pʌs clase chaʼan i pejcʌntel jun yicʼot tsʼijb, i melbil lon c chaʼan jumpʼejl jun ti 110 tʼan tac chaʼan miʼ cʌn i pejcañob jun yicʼot tsʼijb jiñi quixtañujob.

•   Coltaya. Mi lon cʌqʼuen chuqui i cʼʌjñibal i chaʼañob jiñi muʼ bʌ i ñusañob tsʌts bʌ wocol tiʼ caj jiñi quixtañujob o tiʼ caj tsʌts tac bʌ icʼ jaʼal. Jumpʼejl ejemplo, tsaʼ lon j colta jiñi quixtañujob tsaʼ bʌ i yilayob wocol tiʼ caj jiñi jisaya tsaʼ bʌ ujti yaʼ ti Ruanda cheʼ ti 1994 yicʼot cheʼ bʌ tsaʼ ñumi jiñi tsʌts bʌ i yujquel lum yaʼ ti Haití cheʼ ti 2010.

 Isujmʌch, cabʌl chuqui tajbil chaʼan ili organización tac cʌmbil bʌ ti yumʌl, pero cheʼ machic an jiñi, mucʼʌch lon chʌn mel jiñi eʼtel chaʼan bʌ subtʼan. Ti jujuntiquil xñoptʼan an tiʼ wenta chaʼan miʼ sub yicʼot i cʌntesan quixtañujob ti jiñi wen tʼan am bʌ ti Biblia (Mateo 24:14; 28:19, 20). Mi lon c wen ñop chaʼan Dios choncol i coltan jiñi lon queʼtel yicʼot mi caj i chʌn coltan chaʼan miʼ bej colel (1 Corintios 3:6, 7).