Maʼañic, joñon lojon bajcheʼ i testigojob Jehová maʼañic mi lon j cʌcʼ jiñi diezmo. Jiñi queʼtel lojon miʼ coltʌntel ti taqʼuin loqʼuem bʌ tiʼ pusicʼal wiñicob xʼixicob. Pero ¿baqui tsaʼ loqʼui tilel jiñi costumbre chaʼan miʼ yʌjqʼuel jiñi diezmo yicʼot chucoch cheʼ maʼañic miʼ yʌcʼob jiñi i testigojob Jehová?

 Jiñi Mandar tsaʼ bʌ aqʼuenti jiñi israelob ti wajali mi yʌl chaʼan yom miʼ yʌqʼueñob diezmo, o yom miʼ tsʼitaʼ aqʼueñob i chubʌʼan jiñi motomajob. Jiñi Biblia jamʌl tsiquil mi yʌl chaʼan jiñi xñoptʼañob mach xicʼbilobic chaʼan miʼ jacʼob jiñi Mandar. Jiñi chaʼan, ti ili ora maʼañic majqui xicʼbil chaʼan miʼ yʌcʼ jiñi diezmo (Hebreos 7:​5, 18; Colosenses 2:​13, 14).

 Joñon lojon bajcheʼ i testigojob Jehová maʼañic mi cʌcʼ lojon wersa xicʼbil bʌ diezmo o yan tac bʌ ofrenda, come cheʼʌch mic mel lojon bajcheʼ jiñi ñaxam bʌ xñoptʼañob ti wajali. Tsiʼ coltayob jiñi congregación ti chaʼchajp: Tsiʼ yʌcʼʌyob i taqʼuin loqʼuemoʼ bʌ tiʼ pusicʼal, i tsiʼ chaʼleyob subtʼan yicʼot tsiʼ chaʼleyob cʌntesa loqʼuem bʌ ti Biblia mach bʌ tojbilic.

 Ili lajalʌch yicʼot jiñi principio loqʼuem bʌ ti Biblia, muʼ bʌ i yʌl: «Ti jujuntiquil laʼ i yʌcʼ cheʼ bajcheʼ tsiʼ ñaʼta tiʼ pusicʼal, mach tiʼ chʼijiyemlelic, mach chaʼañic xicʼbebil jach. Dios miʼ cʼuxbin jiñi muʼ bʌ i yʌcʼ tiʼ tijicñʌyel i pusicʼal» (2 Corintios 9:7).