Cheʼ ti sábado 1 i chaʼan marzo, 2014, wen tijicña tsiʼ tempayob i bʌ 823 i testigojob Jehová ti jumpʼejl i Yotlel colem tempa bʌ ti tejclum Benín (Nigeria) chaʼan miʼ melob jumpʼejl ñuc bʌ Tempa bʌ. Ti 1999 tsaʼ waʼchoconti jumpʼejl programa chaʼan miʼ mejlel i Yotlel Tempa ti país tac baqui maʼañic cabʌl taqʼuin, cʼʌlʌl ili ora tsaʼix mejli 3 mil i Yotlel Tempa bʌ ti jiñi país.

Ti ili tempa bʌ, tsaʼ cʼajtesʌnti tiʼ pejtelel jiñi eʼtel tsaʼ bʌ mejli yaʼ ti Nigeria cʼʌlʌl cheʼ ti 1920, chaʼan jiñi congregación tac añʌch baqui miʼ tempañob i bʌ chaʼan miʼ chʼujutesañob Jehová. Ti ñaxan, ti ototʌl tac miʼ tempañob i bʌ o miʼ tojob yambʌ otot tac. Jiñi ñaxam bʌ i Yotlel Tempa bʌ tsaʼ bʌ mejli yaʼ ti tejclum Ilesha cheʼ ti 1935 jiñʌch tsaʼ bʌ caji ti cʼʌjñel chaʼan miʼ mejlel tempa bʌ tac. Cheʼ ti 1938 cʼʌlʌl cheʼ ti 1990, jiñi congregación tac tsaʼ ñumen cʼʌjqui, ti ñaxan an 14 congregación i tsaʼ cʼoti ti 2,681. Yonlel maʼañic bʌ miʼ tajob baqui yom miʼ tempañob i bʌ. An Yotlel Tempa bʌ baqui miʼ tempañob i bʌ cheʼ bʌ 6 congregación. Ti yan tac bʌ parte an Yotlel tempa bʌ baqui maʼañix miʼ yochelob come wen chʼoʼchʼoc jax, jin chaʼan ti jumpat jax miʼ waʼtʌlob o miʼ yajñelob yaʼ ti ventana chaʼan miʼ mejlel i ñʌchʼtañob. Yambʌ congregación tac miʼ tempañob i bʌ ti ototʌl tac o ti escuela.

Cheʼ ti 1990, jiñi sucursal i chaʼan i testigojob Jehová tsaʼ caji i yʌqʼuen ti majan taqʼuin jiñi congregación tac chaʼan miʼ melob i Yotlel Tempa bʌ. Cheʼ ti 1997, jiñi Comité Regional chaʼan Construcción añix i colta 105 congregación tac o chaʼan miʼ tojʼesʌntel. Cheʼ ti 1997 cʼʌlʌl ti 1999 tsaʼ mejli 13 i Yotlel Tempa bʌ, ti jujumpʼejl tsaʼ jalʼa ti melol cheʼ bʌ 7 o 15 qʼuin.

Anquese ti ora tsaʼ caji ti mejlel i Yotlel Tempa bʌ, pero yom to miʼ mejlel yambʌ come wen cabʌlob jiñi Testigojob yaʼ ti Nigeria. Cheʼ ti abril ti 1998, jiñi sucursal tsiʼ yʌlʌ chaʼan anto yom miʼ mejlel 1,114 i Yotlel Tempa bʌ ti jiñi país.

Ti jiñi ñuc bʌ tempa bʌ tsaʼ bʌ mejli yaʼ ti Benín, juntiquil hermano chaʼan jiñi Comité i chaʼan Sucursal yaʼ ti Nigeria i cʼabaʼ Don Trost, tsiʼ yʌlʌ: «¡Jiñʌch jumpʼejl ñuc bʌ eʼtel! ¿Bajcheʼ mi caj lac mel? Cheʼ tsaʼ c ñaʼta lojon». Tsaʼ ajqʼui i jacʼbal jiñi cʼajtiya cheʼ ti 1999, cheʼ bʌ 6 u 8 hermanojob mucʼob bʌ ti eʼtel tiʼ melol i Yotlel Tempa bʌ tsaʼ caji i coltañob jiñi congregación tac añoʼ bʌ ti jiñi país. Come jiñi i Yotlel tempa bʌ tac mach wen wocolic bajcheʼ tsaʼ ñaʼtʌnti miʼ mejlel, ti jiñi 14 jab ñumeñix bʌ tsaʼ mejli cheʼ bʌ 17 i Yotlel tempa bʌ ti jujumpʼejl uw.

Cheʼ bʌ jiñi hermano Don Trost tsiʼ sube jiñi yaʼ bʌ tempʌbilob chaʼan weñʌch tsaʼ bʌ i meleyob, tsiʼ yʌlʌ jaʼel chaʼan an cabʌl yom to bʌ miʼ mejlel. Cheʼ ti 2013, ñumen ti 8 mil quixtañu tsaʼ sujtiyob ti Testigo yaʼ ti Nigeria. Don Trost tsiʼ yʌlʌ: «Yom to miʼ mejlel 100 i Yotlel Tempa bʌ ti jujumpʼejl jab chaʼan miʼ coltʌntel jiñi yañoʼ bʌ ti talto bʌ qʼuin ». Cheʼ ti 2013 an 351 mil Testigojob yaʼ ti Nigeria, i an ñumen ti 5,700 congregación.