Cheʼ ti julio i chaʼan 2009, jiñi i testigojob Jehová tsiʼ mʌñʌyob jumpʼejl lum am bʌ 102 hectárea i colemlel yaʼ ti tejclum Nueva York chaʼan yaʼ miʼ melob jiñi oficina tac i chaʼan jiñi central mundial. Jiñi lum tsaʼ bʌ mʌjñi an 80 kilómetro i ñajtlel yaʼ tiʼ nortejlel jiñi central am bʌ ti ili ora yaʼ ti Brooklyn, tsaʼ bʌ mejli cheʼ ti 1909.

Yaʼ ti tsijiʼ bʌ central mundial ñaʼtʌbil chaʼan mi caj i chumtʌlob yicʼot i chaʼleñob eʼtel cheʼ bʌ 800 Testigojob, mi caj i mejlel colem bʌ otot chaʼan oficina tac, jumpʼejl chaʼan muʼ bʌ i qʼuel jiñi subtʼan yicʼot chʌmpʼejl chaʼan bʌ chumlibʌl tac. Cheʼ jaʼel, mi caj i mejlel jumpʼejl alʌ museo baqui mi caj i pʌstʌl jiñi historia chaʼan bʌ jiñi testigojob Jehová ti ili ora.

Tiʼ pejtelel jiñi lum tsaʼ bʌ mʌjñi cojach mi caj i cʼʌjñel 18 hectárea chaʼan miʼ mejlel jiñi otot, jiñi teʼel tac yicʼot jiñi jaʼ am bʌ ti joytilel jiñi lum mi caj i cʌytʌl. Jiñi pʌcʼʌbʌl tac maʼañic mi caj i wen chʼʌjlel, jin jach mi caj i chaʼ cʼʌjñel jiñi mateʼel tac am bʌ yaʼi chaʼan wen miʼ qʼuejlel.

Junmojt arquitectojob tsiʼ chajpayob bajcheʼ yilal mi caj i mejlel jiñi otot tac chaʼan maʼañic miʼ wen cʼʌjñel luz yicʼot taqʼuin, ili mi caj i coltan chaʼan maʼañic miʼ ñumen asiyel ili pañimil yicʼot chaʼan mach wen letsic miʼ loqʼuel cheʼ bʌ miʼ mejlel jiñi eʼtel tac. Jumpʼejl ejemplo, tiʼ pam jiñi otot mi caj i yʌjqʼuel mateʼel tac chaʼan mach wocolic ti cʌntʌntel, chaʼan miʼ chʼʌchʼ (tsʼuʼ) jiñi jaʼal yicʼot chaʼan wen jach i tsʌñʌlel o i ticwʌlel jiñi otot tac. Yaʼ ti oficina tac mi caj i ñumen cʼʌjñel i sʌclel jiñi qʼuin. Cheʼ jaʼel, maʼañic mi caj i wen jisʌntel jiñi jaʼ.

Pero ¿chucoch mi caj i mejlel ti yambʌ parte jiñi central mundial? Ti wajali an jumpʼejl imprenta yaʼ ti Brooklyn muʼ bʌ i chocben majlel Biblia tac yicʼot jun tac jiñi i testigojob Jehová tiʼ pejtelel pañimil. Ti ili ora, añix yan tac bʌ sucursal muʼ bʌ i chaʼleñob coltaya chaʼan miʼ mejlel ili eʼtel. Cheʼ ti 2004, yaʼ ti Wallkill (Nueva York) tsaʼ tejchi ti mejlel jiñi eʼtel chaʼan bʌ impresión yicʼot cheʼ miʼ chojquel majlel jiñi jun tac loqʼuem bʌ ti Biblia ti baqui jach, mach yaʼix ti Estados Unidos, cheʼ bʌ 145 kilómetro i ñajtlel yaʼ ti Brooklyn.

Yambʌ tsaʼ bʌ ñaʼtʌnti jiñʌch cheʼ wen lets miʼ tojtʌl chuqui tac miʼ cʼʌjñel yicʼot chaʼan miʼ mejlel ti cʌntʌntel jiñi otot tac yaʼ ti Brooklyn. Jin chaʼan, cheʼ miʼ mejlel ti yambʌ parte jiñi oficina tac, miʼ ñaʼtʌntel chaʼan mi caj i ñumen cʼʌjñel ti wen jiñi taqʼuin chaʼan miʼ bej ajqʼuel jiñi cʌntesʌntel loqʼuem bʌ ti Biblia.

Cheʼ bʌ muʼto caj i yʌjqʼuel permiso chaʼan miʼ mejlel jiñi eʼtel, ñaxan miʼ wen qʼuelob mi maʼañic mi caj i wen ticʼlan jiñi Pañimil. Mi weñʌch miʼ loqʼuel tiʼ pejtelel ili woli bʌ ti chajpʌntel, jiñi eʼtel mi caj i tejchel cheʼ ti 2013, i ti chʌmpʼejl jab yom ujtemix jiñi eʼtel.

Mach cojach an jiñi imprenta ti Wallkill, cheʼ jaʼel jiñi i testigojob Jehová añob i chaʼan baqui miʼ yʌcʼob cʌntesa tac loqʼuem bʌ ti Biblia yaʼ ti Patterson (Nueva York) yicʼot an i chaʼañob yambʌ sucursal tac ti cabʌl país. Ñumen ti 7.5 millón añob i testigojob Jehová tiʼ pejtelel pañimil.