Harold Corkern, juntiquil xcoltaya i chaʼan jiñi Junmojt muʼ bʌ i pʌsob bij, woliʼ yʌcʼ jumpʼejl discurso am bʌ i temajlel: «Chaʼlenla wersa baqui jaxʌl mejletla». Miʼ ñusʌntel discurso tac yaʼ ti Warwick chaʼan miʼ pʼʌtʼesʌntel jiñi xʼeʼtelob.

Jiñi sʌsʌc bʌ lona miʼ coltañob jiñi xʼeʼtelob chaʼan maʼañic miʼ yubiñob tsʌñal yicʼot chaʼan miʼ mejlel i yujtesañob jiñi eʼtel tac. Ti ili otot mi caj i mejlel jumpʼejl baqui miʼ yujtel yicʼot i chajpʌntel uchʼel, jumpʼejl cuarto baqui miʼ wujtsʼejl pisil yicʼot baqui miʼ qʼuejlel jiñi cʼamoʼ bʌ.

Jiñi wen yujiloʼ bʌ tiʼ melol luz woliʼ chajpañob i bʌ chaʼan miʼ chaʼleñob ti instalar cable tac. Ñumeñix ti 12 mil metro tsiʼ chaʼleyob ti instalar jiñi cable tac. Jiñi eʼtel chaʼan bʌ mel luz yaʼ ti Warwick tsaʼ tejchi cheʼ bʌ maxto wajali mʌjñi jiñi lum, i mi caj i bej mejlel iliyi cʼʌlʌl to miʼ yujtel jiñi eʼtel.

Juntiquil xʼeʼtel woliʼ bʌcʼ ti cinta jiñi i pam otot chaʼan miʼ yʌqʼuen impermeabilizante. I pam jiñi otot yaʼ ti cojix bʌ piso miʼ bojñel ti polimetilmetacrilato (PMMA), ili jiñʌch muʼ bʌ i cʼʌjñel chaʼan maʼañic miʼ yochel jaʼ yaʼ ti otot. Ili polietileno metacrilato pemel bajcheʼ jaʼ pero ora jach miʼ tiquin cheʼ mi cʼʌjñel.

Juntiquil tatʌl yicʼot i yixicʼal wen yujiloʼ bʌ i melol luz, woliʼ chaʼleñob ti instalar cable tac chaʼan miʼ cʼotel jiñi luz yaʼ ti cuarto tac.

Jiñi xʼeʼtelob woliʼ cʼuxob i waj yaʼ baqui miʼ yujtel uchʼel. Ñumen ti 2 mil uchʼibʌl miʼ lujchel ti jujumpʼejl qʼuin.

Junmojt xʼeʼtelob woliʼ yotsañob varilla tac yaʼ ti pam jiñi otot baʼ mi caj i tojʼesʌntel jiñi mach tac bʌ weñic.

Carta tac chaʼan alobob baqui miʼ yʌjlel chaʼan miʼ qʼuejlel ti ñuc i yeʼtel jiñi hermanojob. An xʼeʼtelob mach bʌ cabʌlic qʼuin miʼ yajñelob ti coltaya. Miʼ cʼotel tsijiʼ bʌ xʼeʼtelob ti jujumpʼejl semana, lʌcʼʌ cheʼ bʌ 500 miʼ cʼotelob. Ti febrero, lʌcʼʌ cheʼ 2,500 tsaʼ cʼotiyob ti coltaya yaʼ ti Warwick ti jujumpʼejl qʼuin.

Tsʼʌctiyemix ti 60% jiñi eʼtel tac. Cheʼ ti enero yicʼot ti abril i chaʼan 2015 tsaʼ ujti ti mejlel jiñi cuarto tac, jiñi oficina tac yicʼot jiñi otot baʼ miʼ qʼuejlel jiñi yom bʌ miʼ mejlel yaʼ ti central mundial. Ti jiñi bʌ uw, tsiʼ teche i chaʼleñob ti instalar i yoyel jiñi otot baʼ miʼ tojʼesʌntel jiñi mach tac bʌ weñic, tsiʼ meleyob banqueta tac chaʼan miʼ cʼotel ti jiñi otot tac yicʼot tsiʼ chaʼ tojʼesayob jiñi presa o jiñi pemel jach bʌ jaʼ i chaʼan Sterling Forest (Blue Lake).

Foto yaʼ ti escalera tac. Tsaʼ tojle yambʌ quixtañujob chaʼan miʼ melbeñob i chaxtʌlel jiñi otot am bʌ 5 piso i chanlel, i jiñi testigojob tsiʼ melbeyob i yoyel tac jiñi otot.

Cheʼ tiʼ yorajlel tsʌñal, junmojt xʼeʼtelob tsiʼ chaʼleyob ti instalar jiñi varilla yaʼ ti ñaxam bʌ piso. Lʌcʼʌ cheʼ bʌ 127 centímetro i tʌntʌlel tsaʼ yajli hielo cheʼ ti enero yicʼot ti marzo yaʼ ti Warwick. Tsaʼ cʼʌjñi máquina tac chaʼan miʼ locʼsʌntel jiñi hielo yicʼot tsiʼ meleyob ajñibʌl tac baqui miʼ mejlel i ñusañob tsʌñal jiñi xʼeʼtelob.

Tsaʼ cʼʌjñi lámina tac melbil bʌ ti metal chaʼan miʼ mejlel i pam jiñi otot. Cheʼ tiʼ yujtibal abril, lʌcʼʌ cheʼ bʌ tiʼ pejtelel tsaʼ ujti ti melbentel i pam jiñi otot tac. Tiʼ xiñil junio yom miʼ yujtel tiʼ pejtelel i pam jiñi otot tac B.

Foto i chaʼan jiñi otot B tsaʼ bʌ locʼsʌnti yaʼ ti grúa.

Jiñi yujiloʼ bʌ i tojʼesʌntel baʼ miʼ ñumel jaʼ woliʼ qʼuelbeñob i dibujolel yaʼ baʼ miʼ cotchocoñob i carro jiñi yaʼ bʌ chumulob ti jiñi otot tac. Ñumen ti 3,400 dibujo tac tsaʼ chaʼlenti ti aprobar chaʼan miʼ mejlel jiñi eʼtel tac.

Jiñi xcoltayajob woliʼ bʌcʼob ti plástico jiñi otot yaʼ ti chan. Miʼ mejlel tempa bʌ tac baqui miʼ chajpʌntelob jiñi muʼ bʌ i ñijcañob jiñi grúa tac yicʼot yan tac bʌ máquina, i miʼ subentelob jaʼel chaʼan yom tsajilob. Miʼ pʌsbentelob bajcheʼ yom miʼ cʌntañob i bʌ cheʼ bʌ miʼ cʼʌñob jiñi elevador tac, bajcheʼ yom miʼ cʌntañob i bʌ chaʼan maʼañic miʼ yajlelob, bajcheʼ yom miʼ cʼʌñob jiñi japob icʼ, bajcheʼ yom mi jacʼob jiñi tʼan tac am bʌ yaʼ ti letrero tac yicʼot yan tac bʌ.

Ili jiñʌch jiñi otot tac. Cheʼ bajcheʼ mi laj qʼuel ti ili foto, cheʼ ti yujtibal abril, tsaʼ pʼojli cabʌl eʼtel yaʼ ti otot A, B yicʼot D. Yaʼ ti otot C, mach bʌ tsiquilic ti ili foto, tsaʼ tejchi ti bojñel, ti chaʼlentel ti instalar jiñi azulejo yicʼot tabla roca.

Chaʼtiquil xcoltayajob yaʼ bʌ añob ti elevador woli bombeñob i pat jiñi otot. Lʌcʼʌ cheʼ bʌ chaʼpʼejl uw miʼ jalʼan ti bojñel ti jujumpʼejl otot.

Jiñi xʼeʼtelob woliʼ melbeñob i tsʼajquilel jiñi otot. Ti ili otot yaʼʌch baqui mi caj i cʼotel jiñi carro tac chaʼan miʼ juʼsan i cuch yicʼot yan tac bʌ.

Juntiquil tojbil bʌ xʼeʼtel woliʼ qʼuextan jiñi ñoxix bʌ válvula yaʼ ti Blue Lake. Wʌle cojach miʼ pejtsʼel jumpʼejl botón chaʼan miʼ tʼox locʼsʌntel jiñi jaʼ cheʼ bʌ miʼ tilel i yorajlel tsʌts bʌ icʼ jaʼal chaʼan maʼañic miʼ bujtʼel jiñi jaʼ.