Cʌylem jax 15 minuto chaʼan miʼ taj a las 7 cheʼ ti sʌcʼan yaʼ ti Tuxedo (Nueva York), i wen jamʌl jiñi pañimil. Tiʼ tʼejl jiñi otot am bʌ chʌmpʼejl piso i chanlel baqui woliʼ yochel wiñicob xʼixicob añoʼ bʌ i pislel chaʼan eʼtel, an jumpʼejl joyol bʌ jaʼ am bʌ hielo tiʼ pam. Sʌcʼan jach tsaʼ loqʼuiyob tiʼ yotot tac o yaʼ baqui jijlemob. An lʌcʼʌl jach bʌ tilemob, i an ñajt bʌ tilemob, cheʼ bajcheʼ ti Patterson, Wallkill yicʼot Brooklyn, am bʌ 80 kilómetro (50 milla) i ñajtlel yaʼ ti estado i chaʼan Nueva York.

Mach yaʼic luʼ chʼoyolob ti Nueva York, tilemob ti yan tac bʌ tejclum i chaʼan Estados Unidos o ñumen ñajt to. Loqʼuemob tiʼ pusicʼal cheʼ miʼ melob jiñi eʼtel. An muʼ bʌ caj i cʌytʌlob jumpʼejl semana, yañoʼ bʌ 6 semana, i an ñumen jal bʌ mi caj i cʌytʌlob. Tsiʼ bajñel tojoyob i ñumib chaʼan miʼ cʼotelob i maʼañic mi caj i tojtʌlob. Pero wen tijicñayob chaʼan miʼ cajelob ti eʼtel ilayi.

An 120 tsaʼ bʌ tiliyob ti eʼtel loqʼuemoʼ bʌ tiʼ pusicʼal, pero ti jiñi talto bʌ uw tac ñumen on mi caj i tilelob. Xucʼul miʼ yochelob yaʼ baqui miʼ yujtel uchʼel, ti jumpʼejl mesa 10 miʼ buchtʌlob i ti jujuntiquil miʼ chʼʌmob i cajpeʼ. Pero yaʼ baqui miʼ chajpʌntel uchʼibʌl miʼ loqʼuel wen sumuc jax bʌ i yujtsʼil: Woli i chajpʌntel tumut yicʼot tocino. Ti a las 7 cheʼ ti sʌcʼan, miʼ tejchel ti qʼuejlel jumpʼejl texto loqʼuem bʌ ti Biblia muʼ bʌ i ñusʌntel ti televisión tac. Cheʼ bʌ ñumeñix jiñi 15 minuto, miʼ yʌjqʼuel ñumel jiñi uchʼibʌl yaʼ ti mesa tac. I mach jiñic jach miʼ yʌjqʼuel jiñi tumut yicʼot tocino, miʼ yʌjqʼuel jaʼel caxlan waj yicʼot avena. ¡Wen sumuc jax bʌ uchʼibʌl!

Cheʼ bʌ miʼ mejlel oración chaʼan bʌ i yujtibal, miʼ luʼ majlelob ti eʼtel. Cheʼ bʌ woli to i lʌpob jiñi i casco, jiñi muʼ bʌ i cʼʌn i cuchob i yeʼtijib, jiñi i lentejob yicʼot i chalecojob muʼ bʌ i coltan chaʼan maʼañic chuqui miʼ chaʼleñob jiñi mucʼo bʌ ti eʼtel tiʼ melol otot, wen tijicña woliyob ti tʼan.

¿Chuqui woliʼ melob ilayi? Woliʼ chaʼ tojʼesañob jiñi otot muʼ bʌ i cʼʌn jiñi empresa muʼ bʌ i mel jun ti wajali i cʼabaʼ Paper Company yaʼ baqui mi caj i qʼuejlel jiñi eʼtel chaʼan i melol jiñi tsijiʼ bʌ central mundial i chaʼan i testigojob Jehová. Ili central mundial mi caj i mejlel ti jumpʼejl solar am bʌ ti Warwick, lʌcʼʌl bʌ an baqui woliʼ mejlel ili eʼtel. Ila ti Tuxedo, woliʼ chajpʌntel cuarto tac, oficina tac, baʼ miʼ mejlel eʼtel tac yicʼot baqui miʼ lojtel eʼtijibʌl tac. Cheʼ ti martes 12 i chaʼan marzo, 2013, jiñi yumʌlob muʼ bʌ i qʼuelob chaʼan bajcheʼ miʼ caj ti mejlel jiñi eʼtel tsiʼ yʌcʼʌyob i tʼan chaʼan mucʼʌch i mejlel i melob.

¿Bajcheʼ miʼ pijtʌntelob jiñi xʼeʼtelob muʼ bʌ i cʼotelob ti eʼtel? William chʼoyol bʌ ti Nueva Jersey, woli bʌ i cʌytʌl ti jumpʼejl otot i chaʼan bʌ jiñi Testigojob, mi yʌl: «Cheʼ bʌ maʼ cʼotel, jiñi hermanojob miʼ subeñet baqui bʌ a cuarto, miʼ subeñet jaʼel bajcheʼ maʼ mejlel ti cʼotel baqui tac a wom majlel, bajcheʼ maʼ mejlel a cʼʌn a llave... tiʼ pejtelel chuqui a wom a ñaʼtan. Wen utsob. I cheʼ bʌ yaʼix añet ti Tuxedo cheʼ bʌ tsaʼix ujti jiñi uchʼel ti sʌcʼan, maʼ majlel a qʼuel jiñi am bʌ tiʼ wenta jiñi eʼtel chaʼan miʼ subeñet chuqui mi caj a mel».

¿Bajcheʼ yilal jiñi eʼtel ilayi? Yajaira yicʼot i ñoxiʼal tilemoʼ bʌ ti Puerto Rico, mucʼob ti eʼtel baqui miʼ cʼʌjñel tac jiñi yeso. Mi yʌl: «Mi lon c tejchel ti las 4:30 cheʼ ti sʌcʼan. Luʼ tojʼesʌbil mi lon j cʌy yaʼ baqui mi lon j cʼaj coj, mi lon c jap cajpeʼ i cheʼ jiñi, mi lon c pʌjyel majlel yaʼ baqui mic chaʼlen lojon troñel. Wen boʼyemoñix lon cheʼ bʌ mic sujtel lojon. Pero maʼañic mij cʌcʼ lojon ti ñuc come wen tijicña tsaʼ c ñusa lojon ti jiñi qʼuin. Tiʼ pejtelel jiñi quixtañujob wen tijicñayob ilayi».

Jumpʼejl xñujpuñel chʼoyol bʌ ti jiñi estado i chaʼan Minnesota, i cʼabaʼ Zach yicʼot Beth, mucʼob ti eʼtel tiʼ chajpʌntel jiñi lum am bʌ yaʼ ti mateʼel i chaʼan Warwick. Cheʼ bʌ tsaʼ cʼajtibentiyob chucoch tsiʼ ñaʼtayob tilel ti eʼtel, Beth tsiʼ yʌlʌ: «Jiñʌch ñumen utsʼat bʌ tiʼ melol i yeʼtel Jehová. Tsaʼ c ñaʼta lojon j cʼʌn jiñi cujil bʌ lojon tiʼ melol chuqui miʼ mulan Jehová».