Cheʼ bʌ ti jabil 1999 cʼʌlʌl ti 2015, jiñi i testigojob Jehová tsiʼ meleyob ñumen ti 5,000 i Yotlel Tempa bʌ ti Centroamérica a yicʼot México. I anto yom miʼ mejlel ñumen ti 700 i Yotlel Tempa bʌ chaʼan miʼ mejlel i tempañob i bʌ jiñi jumpʼejl millón Testigojob chumuloʼ bʌ ti jiñi país tac.

Ti wajali, wen wocol chaʼan jiñi congregación tac miʼ melob i Yotlel Tempa bʌ ti jiñi país tac. Jumpʼejl ejemplo, ti México cabʌl Testigojob tsiʼ tempayob i bʌ ti ototʌl tac. ¿Chucoch? Junchajp, come jiñi yumʌlob ti cabʌl jabil maʼañic tsiʼ yʌcʼʌyob i taj i lum jiñi ñopbalʌl tac. Pero cheʼ ti 1990 majlel, tsaʼ qʼuextʌyi i tsaʼix mejli i melob i Yotlel Tempa bʌ tac jiñi i testigojob Jehová. I wocolel jin cheʼ cabʌl uw miʼ jalijel chaʼan miʼ mejlel jumpʼejl.

Jiñi eʼtel ñumen ora tsaʼ caji ti mejlel cheʼ ti 1999, jiñʌch cheʼ bʌ jiñi muʼ bʌ i melob i Yotlel Tempa bʌ tsaʼ cajiyob ti eʼtel jaʼel yaʼ baqui mach wen añobic i taqʼuin, bajcheʼ ti México yicʼot yaʼ ti yambʌ 7 país i chaʼan Centroamérica. Cʼʌlʌl cheʼ ti 2010 tiʼ pejtelel jiñi eʼtel yaʼʌch woliʼ qʼuejlel yaʼ ti sucursal am bʌ ti México.

Jiñi yajcʌbiloʼ bʌ chaʼan miʼ melob i Yotlel Tempa bʌ mucʼʌch i ñusañob wocol baqui tac miʼ chojquelob majlel. Cheʼʌch tsaʼ ujti tiʼ tojlel añoʼ bʌ ti Panamá, cheʼ bʌ uxpʼejl ora tsiʼ xʌñʌyob ti lancha chaʼan miʼ cʼotelob yaʼ baqui miʼ cajel jiñi eʼtel. Yaʼ ti Chiapas, jumpʼejl estado i chaʼan México, tsiʼ cʼʌñʌyob jumpʼejl avioneta chaʼan miʼ mejlel i yotsañob jiñi eʼtijibʌl tac.

An mach bʌ Testigojobic tsaʼ bʌ i mulayob i qʼuel jiñi tsijiʼ bʌ i Yotlel Tempa bʌ yaʼ tiʼ lumalob. Ti Honduras, juntiquil wiñic tsiʼ yʌlʌ chaʼan cheʼ bʌ maxto mejli i Yotlel Tempa bʌ ti jumpʼejl solar am bʌ yaʼ baqui chumul, an cabʌl tsaʼ bʌ i mulayob chaʼan miʼ melob jumpʼejl otot baʼ miʼ chojñel lembal yicʼot baʼ miʼ yujtel son. Pero jiñi wiñic maʼañic tsiʼ mulaj. Cheʼ bʌ jiñi i testigojob Jehová tsiʼ subeyob chaʼan yom i melob i Yotlel Tempa bʌ, tsiʼ yʌlʌ: «¡Weñʌch mi cubin!»

Ti cabʌl parte, jiñi quixtañujob miʼ wen mulañob bajcheʼ miʼ chaʼleñob tsʌts bʌ troñel jiñi Testigojob. Juntiquil wiñic ti Guatemala tsiʼ yʌlʌ: «Ti lon j cultura jiñi xʼixicob cojach miʼ chaʼleñob troñel ti otot. Pero cheʼ tsaʼ laʼ mele jiñi i Yotlel Tempa bʌ, tsiʼ chaʼleyob troñel wiñicob yicʼot xʼixicob. Toj sajtel c pusicʼal cheʼ mij qʼuel bajcheʼ jiñi xʼixicob miʼ cʌchob jiñi varilla yicʼot bajcheʼ miʼ chaʼleñob ti repellar jiñi otot. ¡Wen utsʼatax!» Jiñi lʌcʼʌl bʌ chumulob tsiʼ mʌñʌyob bʌlñʌcʼʌl yicʼot chuqui tac miʼ jajpel chaʼan jiñi woliyoʼ bʌ ti troñel.

An cabʌl muʼ bʌ i mulañob i yotlel lon c tempa bʌ. Ti Nicaragua, juntiquil ingeniero tsiʼ sube jiñi presidente municipal chaʼan wen utsʼatax jiñi i Yotlel Tempa bʌ yicʼot chaʼan wen melbil. Tsiʼ yʌlʌ chaʼan maʼañic yambʌ yaʼ tiʼ lumal wen melbil bʌ bajcheʼ jiñi i Yotlel Tempa bʌ.

Jiñi i testigojob Jehová miʼ wen mulañob cheʼ utsʼatax yaʼ baqui miʼ chʼujutesañob Dios. An i qʼueleyob chaʼan jiñi woli bʌ i cʌntesʌntelob chaʼan Biblia miʼ ñumen mulañob majlel ti tempa bʌ cheʼ tsijib melbilto jiñi i Yotlel Tempa bʌ. Jiñi testigojob ti jumpʼejl congregación yaʼ ti México tsaʼ bʌ i coltayob jiñi hermanojob tiʼ melol jumpʼejl i Yotlel Tempa bʌ tsiʼ yʌlʌyob: «Mi cʌqʼuen lon wocolix i yʌlʌ Jehová cheʼ tsiʼ yʌqʼueyon lon c mel ili utsʼatax bʌ i Yotlel Tempa bʌ chaʼan mi cʌqʼuen lon i ñuclel».