Odval jiñʌch juntiquil xʼixic chumul bʌ ti Mongolia. Mach yujilic jaypʼejl i jabilel come maʼañic miʼ wen ñaʼtan chuqui ti jab tsiʼ yila pañimil. Miʼ ñaʼtan chaʼan tsiʼ yila pañimil ti 1921. Mach yujilic i pejcʌntel jun come jumpʼejl jach jab tsajñi ti escuela. Cʼʌlʌl cheʼ bʌ chut to tsaʼ caji i coltan i tat i cʌntan i wacax. Maxto cabʌl ora ñumen, tsiʼ chʼʌmʌ jumpʼejl folleto wen am bʌ i dibujolel baqui tsiʼ cʌñʌ i chaʼan bʌ Dios yicʼot jiñi pijtaya am bʌ i chaʼan jiñi muʼ bʌ i ñʌchʼtan yicʼot miʼ jacʼben i tʼan. Tsiʼ wen aqʼue i tijicñʌyel cheʼ tsaʼ cʼoti i ñaʼtan iliyi.

Jiñi folleto melbil bʌ i chaʼan i testigojob Jehová ti 2011, an chaʼpʼejl bajcheʼ tsaʼ mejli. Tiʼ chaʼpʼejlel chʼʌmʌl tilel i chaʼan wen utsʼatax bʌ i dibujolel, pero an jumpʼejl wen am bʌ i letrajlel i jiñi yambʌ mach cheʼiqui.

Jiñi ñumen am bʌ i letrajlel i cʼabaʼ Ñichʼtan Dios i chumlen ti pejtelel ora, i jiñi yambʌ jiñʌch Ñichʼtan Dios. Tiʼ chaʼpʼejlel ñusʌbil ti cabʌl tʼan. Mach wen jalix, jiñi ñaxam bʌ mi caj i loqʼuel ti 583 tʼan, i jiñi yambʌ ti 483. Ili folleto jinto ñumen ñusʌbil bʌ ti yambʌ tʼan tac bajcheʼ jiñi jun am bʌ i chaʼan jiñi Naciones Unidas i cʼabaʼ Declaración Universal de Derechos Humanos tsaʼ bʌ loqʼui ti 413 tʼan cheʼ ti octubre i chaʼan 2013. Cheʼ jaʼel, jiñi chaʼpʼejl folleto añix pujquem cheʼ bʌ 80 millón.

Ti Brasil, juntiquil xʼixic añix bʌ i jabilel tsaʼ aqʼuenti jiñi folleto Ñichʼtan Dios. Wen tijicña tsiʼ chʼʌmʌ i tsiʼ yʌlʌ: «Weñʌch cheʼ an quixtañu muʼ bʌ i ñaʼtan jiñi yañoʼ bʌ bajcheʼ joñon. Maʼañic mic chʼʌm jiñi laʼ jun tac come mach cujilic pejcʌntel jun. Pero iliyi mucʼʌch c chʼʌm».

Brigitte, juntiquil xʼixic chumul bʌ ti Francia mach bʌ yujilic pejcʌntel jun jaʼel, tsiʼ yʌlʌ: «Tiʼ pejtelel ora mij qʼuelben i dibujolel ili folleto».

Juntiquil i testigo Jehová ti Sudáfrica tsiʼ yʌlʌ: «Mij cʌl chaʼan ili folleto jiñʌch muʼ bʌ mejlel i ñumen coltan jiñi quixtañujob yujiloʼ bʌ tʼan ti chino chaʼan miʼ cʌñob jiñi i sujmlel am bʌ ti Biblia. An j cʼʌñʌ j cʌntesañob jiñi ajñemoʼ bʌ ti qʼuel jun ti universidad, cheʼ jaʼel tiʼ tojlel jiñi mach bʌ yujilobic i pejcʌntel jun. Jiñi folleto Ñichʼtan Dios i chumlen ti pejtelel ora miʼ coltañon chaʼan maʼañic mic wen jalijel ti cʌntesa. Ti media ora jach miʼ mejlel lac waʼchocon jumpʼejl estudio loqʼuem bʌ ti Biblia».

Ti Alemania, chaʼtiquil xsubtʼañob tiʼ pejtelel bʌ ora, miʼ yʌqʼueñob estudio loqʼuem bʌ ti Biblia jumpʼej xñujpuñel tsaʼ bʌ i wen chaʼleyob clase. Jiñi wiñic tsiʼ wen mulaj jiñi folleto i tsiʼ cʼajti: «¿Chucoch mach ti orajic tsiʼ chʼʌmbeyoñob tilel ili folleto? Ili ora muqʼuix c ñumen chʼʌmben isujm chuqui ujtem bʌ yicʼot tʼañʌl tac muʼ bʌ i yʌl jiñi Biblia».

Juntiquil xʼixic xcojc bʌ ti Australia, tiʼ tsictesa: «Cabʌl jab tsaʼ ajñiyon ti jumpʼejl convento i chaʼan monjajob. Wen camigojob jiñi ñuc tacoʼ bʌ i yeʼtel yaʼ ti Iglesia. Pero maʼañic majqui tsiʼ cʌntesayon chaʼan bʌ i Yumʌntel Dios. Wocolix i yʌlʌ jiñi dibujo tac am bʌ ila ti folleto, tsaʼix cʼoti c ñumen chʼʌmben isujm chuqui yom yʌl jiñi tʼan am bʌ ti Mateo 6:​10».

Jiñi sucursal i chaʼan i testigojob Jehová yaʼ ti Canadá, tiʼ tsʼijbu: «An cabʌl quixtañujob ilayi tilemoʼ bʌ ti Sierra Leona. Cheʼ bʌ tsiʼ qʼueleyob chaʼan jiñi folleto añix ti jiñi tʼan krío, jiñi tʼan yujiloʼ bʌ, cabʌl tsiʼ yʌlʌyob chaʼan jiñi i testigojob Jehová woliyobʌch ti wersa i yʌcʼob jiñi cʌntesa am bʌ ti Biblia. An cʼotem bʌ i yʌlob: ‹Jatetla mi la qʼuel ti ñuc jiñi quixtañujob, anquese yañoʼ bʌ maʼañic›».