Jiñi i testigojob Jehová ti cabʌl tʼan miʼ chaʼleñob traducir jiñi jun tac loqʼuem bʌ ti Biblia. Cheʼ ti noviembre i chaʼan 2014, tsaʼ lon c chaʼle ti traducir jiñi Biblia ti 125 tʼan, i jiñi jun tac loqʼuem bʌ ti Biblia ti 742. Cheʼ jaʼel, mi lon c chaʼlen ti traducir video tac. Cʼʌlʌl cheʼ ti enero chaʼan 2015, tsaʼ lon c chaʼle ti traducir jiñi video video ¿Chuqui miʼ mejlel yaʼ ti i Yotlel Tempa bʌ? melbil bʌ ti 398 tʼan tac, i jiñi video ¿Chucoch yom mi lac pejcan jiñi Biblia? ti 569 tʼan tac. ¿Chucoch i bajcheʼ tsaʼ mejli iliyi?

Cheʼ ti marzo chaʼan 2014, jiñi Junmojt muʼ bʌ i pʌsob bij chaʼan i testigojob Jehová tsiʼ cʼajtibe tiʼ pejtelel jiñi sucursal tac chaʼan miʼ chaʼleñob ti traducir jiñi video tac ti cabʌl tʼan chaʼan miʼ pejcʌntel jiñi Biblia.

An bajcheʼ miʼ chajpʌntel jiñi video tac. Ñaxan, jiñi equipo muʼ bʌ i chaʼleñob ti traducir miʼ melob jiñi guión. Cheʼ jiñi miʼ yajcañob jiñi wen yujiloʼ bʌ jiñi tʼan chaʼan miʼ mejlel i chaʼleñob ti grabar jiñi tʼan tac muʼ bʌ i sub i bʌ yaʼ ti video. I jiñi añoʼ bʌ tiʼ tojlel jiñi audio i video miʼ chaʼleñob ti grabar jiñi guión, miʼ chajpañob jiñi grabación yicʼot jiñi texto muʼ bʌ caj i pʌs i bʌ yaʼ ti pantalla. Tiʼ yujtibal, miʼ wen tempañob tiʼ pejtelel chaʼan miʼ mejlel i pʌs i bʌ yaʼ ti página chaʼan Internet.

An sucursal melbil i chaʼañob estudio chaʼan grabación yicʼot chajpʌbil i chaʼan quixtañujob muʼ bʌ i mejlel i melob ili eʼtel. Pero ¿bajcheʼ tsaʼ mejli i chaʼleñob ti grabar ti cabʌl tʼan jiñi video muʼ bʌ i chaʼlentel ti traducir ti ñajt bʌ tejclum?

Tiʼ pejtelel Pañimil, jiñi mucʼob ti eʼtel ti audio tsiʼ cʼʌñʌyob ti grabación muʼ bʌ i mejlel ti cujchel majlel baqui jach. Miʼ melob jumpʼejl estudio chaʼan grabación yicʼot jumpʼejl computadora muʼ bʌ i mejlel laj cuch majlel, jumpʼejl programa chaʼan miʼ mejlel i chaʼlentel ti grabar audio yicʼot jumpʼejl micrófono yaʼ tiʼ Yotlel Tempa bʌ tac o ti jumpʼejl otot. Jiñi woliyoʼ bʌ i pejcañob jiñi jun, jiñi director chaʼan grabación yicʼot jiñi woli bʌ i qʼuel majlel mi tojʌch woliʼ cʌytʌl jiñi grabación jiñobʌch jiñi hermanojob yujiloʼ bʌ jiñi tʼan. Cheʼ muqʼuix i yujtel jiñi grabación i miʼ yʌlob chaʼan weñʌch tsaʼ cʌyle, jiñi muʼ bʌ i chaʼlen eʼtel chaʼan audio muqʼuix i luʼ tempan tsaʼ bʌ i cʼʌñʌ, i miʼ majlel ti yambʌ tejclum.

Come cheʼ tsaʼ mejli bajcheʼ iliyi, jiñi video tac tsaʼ ñumen mejli ti cabʌl tʼan, ñumento bajcheʼ ti wajali.

Wen utsʼat tsaʼ cʼoti ti qʼuejlel ili video tac. Cabʌl quixtañujob cojach ili video cʼotemob i qʼuel tiʼ tʼañob.

Ti jumpʼejl tʼan tsaʼ bʌ chaʼlenti ti grabar ili video jiñʌch pitiantiatiara, cheʼ bʌ 2,500 quixtañujob yujilob ili tʼan yaʼ ti Australia. Ili tsaʼ chaʼlenti ti grabar yaʼ ti Alice Springs (Territorio del Norte). «Jiñi video tsiʼ wen mulayob», tsiʼ yʌlʌ Callan Thomas, tsaʼ bʌ i chaʼle coltaya yicʼot jiñi grabación. «Jiñi quixtañujob mach yomix i cʌy i qʼuelob jiñi video yaʼ ti tableta i chaʼyaj uxyajl miʼ cʼajtiñob baqui miʼ mejlel i ñumen tajob yan tac bʌ video. Come wocol ti tajol jiñi jun tac loqʼuem bʌ ti Biblia ti jiñi tʼan pitiantiatiara toj sajtelob i pusicʼal cheʼ bʌ miʼ ñʌchʼtañob i ñumento cheʼ bʌ miʼ qʼuelob ti jiñi i tʼañob.»

Chaʼtiquil Testigo yaʼ ti Camerún tsiʼ chaʼleyob xʌmbal ti jiñi jaʼ ti jumpʼejl cayúco. Tsaʼ ñumiyob ti jumpʼejl tejclum pigmeojoʼ bʌ i tsiʼ chaʼleyob tʼan yicʼot jiñi am bʌ ti wenta jiñi tejclum, ili wiñic jiñʌch juntiquil muʼ bʌ i pʌs clase ti jiñi tejclum. Cheʼ bʌ tsaʼ cʼoti i yubiñob chaʼan jiñi i tʼan jiñʌch bassa, jiñi hermanojob tsiʼ pʌsbeyob tiʼ tableta jiñi video am bʌ tiʼ tʼan ¿Chucoch yom mi lac pejcan jiñi Biblia?

Jiñi muʼ bʌ i chaʼlen cʌntesa chaʼan ñopbalʌl, muʼ bʌ i wen tsʼaʼlen jiñi i testigojob Jehová am bʌ ti jumpʼejl xchumtʌl yaʼ ti Indonesia, tsiʼ pulu tiʼ pejtelel jiñi jun tac loqʼuem bʌ ti Biblia tsaʼ bʌ pujqui yaʼ baqui chumul. Yambʌ quixtañujob tsiʼ yʌlʌyob chaʼan mi caj i pulob jaʼel jiñi i Yotlel Tempa bʌ. Cheʼ jaʼel, chʌntiquil policía tsaʼ majli i melbeñob cʼajtiya tac juntiquil xʼixic Testigo bʌ yicʼot i familia. Yom i ñaʼtañob chuqui miʼ melob yaʼ ti jiñi i Yotlel Tempa bʌ, jin chaʼan tsiʼ pʌsbe jiñi video ¿Chuqui miʼ mejlel yaʼ ti i Yotlel Tempa bʌ? am bʌ ti jiñi tʼan indonesio.

Cheʼ bʌ tsaʼ ujti i qʼuelob jiñi video, juntiquil policía tsiʼ yʌlʌ: «Wʌle mij cʼotel c ñaʼtan chaʼan tiʼ sujm jiñi quixtañujob maʼañic chuqui yujilob ti laʼ tojlel». Yambʌ policía tsiʼ cʼajti: «¿Muʼ ba i mejlel laʼ wʌqʼueñon ili video chaʼan mic pʌsben yambʌlob? Come ili video miʼ pʌs tiʼ sujm bajcheʼ yilal laʼ melbal». Jiñi policíajob tsaʼix qʼuextʌyi i pensar tiʼ tojlelob jiñi i testigojob Jehová i ti ili ora muqʼuix i cʌntañob.

¿Maxto ba qʼuelbilic a chaʼan ili video? ¿Chucoch maʼañic maʼ qʼuel ti a tʼan?