Jiñi i testigojob Jehová mi lon c chaʼlen wersa chaʼan mi lon c majlel yaʼ baqui an quixtañujob yujiloʼ bʌ yambʌ tʼan tac am bʌ ti Irlanda yicʼot ti Gran Bretaña. a Ti ili tejclum tac miʼ chaʼleñob tʼan ti gaélico escocés, galés yicʼot irlandés i mach cojach ti inglés.

Ti septiembre i chaʼan 2012, tsaʼ lon c locʼsa jumpʼejl tsijiʼ bʌ página chaʼan Internet jw.org ti cabʌl tʼan tac, tsaʼ mejli jaʼel ti jiñi tʼan irlandés yicʼot galés. Tsaʼ mejli jaʼel ili página ti tʼan gaélico escocés cheʼ ti agosto i chaʼan 2014. Cheʼ jaʼel, mi lon c chaʼlen ti imprimir cabʌl jun tac loqʼuem bʌ ti Biblia ti jiñi tʼan tac. ¿Chuqui tajbil chaʼan ili tsʌts bʌ eʼtel?

Juntiquil xcʌntesa ti jumpʼejl ñopbalʌl tsiʼ chʼʌmʌ jumpʼejl tratado muʼ bʌ i chʼʌm tilel cʌntesa am bʌ ti Biblia ti jiñi tʼan gaélico escocés, i cheʼ bʌ tsiʼ pejca tsaʼ caji ti uqʼuel. ¿Chuqui tsiʼ ñijcʌbe i pusicʼal? Jiñʌch bajcheʼ tsaʼ chaʼlenti ti traducir, i tsiʼ yʌlʌ: «¿Majqui tsiʼ chaʼle ti traducir iliyi? ¡Wen utsʼatax!».

Cheʼ bʌ 750 quixtañujob tsiʼ julaʼtayob jiñi página jw.org cheʼ bʌ tsaʼ letsʌnti yaʼ ti Internet ti jiñi ñaxam bʌ uw ti gaélico escocés.

Juntiquil maestro yaʼ ti Universidad ti Irlanda yaʼ ti Galway, tiʼ sube juntiquil Testigo chaʼan maʼañic miʼ mulan mi jumpʼejlic ñopbalʌl. Pero cheʼ bʌ tsiʼ yubi chaʼan miʼ mejlel i taj ti irlandés jiñi folleto Jini Biblia yicʼot i tʼan, tsiʼ cʼajti jumpʼejl. Tsiʼ yʌlʌ chaʼan jiñi jun tac loqʼuem bʌ ti Biblia yom an tiʼ tojlel tiʼ pejtelel jiñi quixtañujob ti jiñi tʼan yujiloʼ bʌ, i tsiʼ yʌlʌ chaʼan weñʌch jiñi choncol bʌ i melob jiñi i testigojob Jehová cheʼ miʼ melob jun tac chaʼan jiñi yujiloʼ bʌ tʼan ti irlandés.

Juntiquil xʼixic añix bʌ i jabilel wen tijicña tsiʼ yubi i bʌ cheʼ jiñi Testigojob tsiʼ yʌqʼueyob jumpʼejl folleto am bʌ ti tʼan galés. Tsiʼ yʌlʌ: «Tiʼ sujm, cheʼ tsaʼic aqʼuentiyon ti inglés, tajol maʼañic tsaʼ c chʼʌmʌ, pero mic wen mulan cheʼ tsʼijbubil tic tʼan».

Ti agosto i chaʼan 2014, tsaʼ otsʌnti yambʌ jun tac loqʼuem bʌ ti Biblia yaʼ ti jw.org ti tʼan galés. Ti jiñi uw, ñumento tsiʼ julaʼtayob jiñi página cheʼ bajcheʼ ti ñaxan chaʼan miʼ pejcañob jiñi cʌntesʌntel tac ti jiñi tʼan.

Ti jumpʼejl qʼuin cheʼ bʌ Jesús tsiʼ wen chaʼle tʼan chaʼan jiñi Tsʼijbujel yicʼot chaʼtiquil xcʌntʼañob i chaʼan, wen tijicña tsiʼ yʌlʌyob: «¿Mach ba utsʼatic jax lac pusicʼal tsaʼ la cubi cheʼ bʌ tsiʼ pejcayonla Jesús ti bij, cheʼ bʌ tsiʼ subeyonla i sujmlel i Tsʼijbujel Dios?» (Lucas 24:32). Cheʼ bʌ jiñi quixtañujob miʼ pʌsbentelob tiʼ tʼan jiñi cʌntesʌntel am bʌ ti Biblia, miʼ ñaʼtañob chaʼan woliyʌch i pʌsbentelob i sujmlel jiñi Tsʼijbujel i miʼ qʼuextʌbeñob i cuxtʌlel.

Emyr, juntiquil wiñic chʼoyol bʌ ti Gales ñujpuñem bʌ yicʼot juntiquil i testigo Jehová, maʼañic baqui ora tsiʼ mulaj i cʌn i ñopbal i yijñam. Pero cheʼ bʌ tsaʼ sujti tiʼ yamigo juntiquil Testigo i cʼabaʼ Russell, tsiʼ qʼuexta i pensar. ¿Chucoch? Tsiʼ yʌlʌ: «Tsaʼ c ñaʼta c chʼʌm jiñi estudio loqʼuem bʌ ti Biblia cheʼ bʌ Russell tsiʼ yʌqʼueyon jiñi libro ¿Qué enseña realmente la Biblia?, i tiʼ subeyon: ‹Ili libro melbil ti galés, i wʌle mi caj lac tech lac tem tsajin›». b ¿Chucoch weñʌch tsiʼ qʼuele Emyr ili tsaʼ bʌ subenti? Tsiʼ yʌlʌ: «Ti lon c chaʼticlel lajal lon c tʼan, lon j cultura yicʼot mi lon c chʼʌmben isujm muʼ bʌ lon j cʌl». ‹Utsʼatax› tsiʼ yubi i pusicʼal Emyr cheʼ bʌ miʼ pejcan jiñi Biblia ti galés come miʼ wen chʼʌmben isujm.

Jiñi i testigojob Jehová woliʼ bej coltañob jiñi quixtañujob chaʼan miʼ cʌñob jiñi i sujmlel am bʌ ti Biblia ti jiñi tʼan yujiloʼ bʌ, jiñi tʼan muʼ bʌ i cʼotel tiʼ pusicʼalob.