Cheʼ bʌ maʼ petsʼ yaʼ baqui miʼ pʌs jiñi lista chaʼan yambʌ tʼan tac ti ili página, miʼ mejlel a taj ñumen ti 300 tʼan tac wocol bʌ tiʼ tajol ti yambʌ página.

Isujm chaʼan añʌch yambʌ página tac ñusʌbil bʌ ti yan tac bʌ tʼan, pero maʼañic lajal bʌ bajcheʼ jiñi jw.org. Ti julio i chaʼan 2013, jiñi página i chaʼan jiñi Naciones Unidas miʼ mejlel ti pejcʌntel ti 6 yan tac bʌ tʼan, i jiñi i chaʼan bʌ Unión Europea, ti 24. Jiñi an tac bʌ i chaʼan jiñi Google miʼ tajtʌl ti 71 tʼan tac, i ti jiñi Wikipedia miʼ tajtʌl temaj tac ti 287 tʼan.

Yom cabʌl ora eʼtel chaʼan an chuqui miʼ mejlel ti letsʌntel ñumen ti 300 tʼan ti Internet. Cabʌl i testigojob Jehová tiʼ petol pañimil mucʼob ti eʼtel chaʼan miʼ ñusañob tiʼ tʼan ili página chaʼan miʼ yʌcʼob ti ñuc Dios. Iliyi miʼ ñaxan mejlel ti inglés, i ti jiñi yambʌ tʼan tac an junmojt chajpʌbiloʼ bʌ mach bʌ tojbilobic muʼ bʌ i ñusañob ti i tʼan.

Jiñi jw.org an i chaʼan cabʌl página ñusʌbilix bʌ ñumen ti 300 tʼan tac. Tiʼ pejtelel añix ñumen ti 200 mil página.

Jiñi jw.org jiñʌch muʼ bʌ i wen julaʼtʌntel i majqui jach miʼ mejlel ti ochel. Miʼ mejlel lac ñaʼtan chaʼan isujmʌch cheʼ bʌ mi laj qʼuel muʼ bʌ i yʌl jiñi empresa Alexa, am bʌ tiʼ wenta miʼ qʼuel tiʼ pejtelel jiñi página chaʼan Internet muʼ bʌ i julaʼtʌntel. Yaʼ baqui mi yʌl chaʼan bʌ ñopbalʌl tac miʼ tajtʌl ñumen ti 87 mil página chaʼan Internet, yaʼ ochem chaʼan ñuc tac bʌ ñopbalʌl, yan tac bʌ organización o muʼ bʌ i melob jun tac chaʼan bʌ ñopbalʌl tac. I jiñi jw.org jiñʌch am bʌ tiʼ chaʼpʼejlel ti jiñi ñumen qʼuelbil bʌ cheʼ ti julio i chaʼan 2013. Jiñi am bʌ ti ñaxan jiñʌch jumpʼejl página baqui miʼ mejlel ti qʼuejlel yicʼot i pejcʌntel jiñi Biblia ti yan tac bʌ tʼan yaʼ ti Internet.

Cheʼ ti octubre i chaʼan 2013, tsaʼ ochiyob yaʼ ti jw.org ñumen ti 890 mil ti bajcheʼic jach. Com lojon chaʼan jiñi muʼ bʌ i cʼʌñob Internet miʼ chʌn tajob jiñi ñuc bʌ i coltʌntel loqʼuem bʌ ti Biblia mach bʌ tojbilic.