Jiñi testigojob Jehová miʼ yʌcʼob i coltaya tiʼ sʌqʼuesʌntel jiñi colem mateʼel lʌcʼʌl bʌ an ti Lviv
Cheʼ ti 6 chaʼan mayo ti 2017, cheʼ bʌ 130 Testigojob tsiʼ chaʼleyob coltaya chaʼan miʼ sʌqʼuesʌntel jiñi colem mateʼel i cʼabaʼ Bryukhovychi, lʌcʼʌl bʌ an ti Lviv, yaʼ ti Ucrania. Jiñi tsaʼ bʌ majliyob ti coltaya añob cheʼ bʌ 22 yicʼot 80 i jabilelob, miʼ chaʼleñob eʼtel yicʼot chumulob yaʼ tiʼ sucursal i chaʼan testigojob Jehová am bʌ ti Ucrania, lʌcʼʌl bʌ an ti jiñi colem mateʼel. Ti uxpʼejl jach hora tsiʼ sʌqʼuesayob 50 hectárea i tsiʼ lotoyob cheʼ bʌ 600 kilo basura.
Mykhailo Splavinskyi, juntiquil ingeniero am bʌ tiʼ wenta jaʼel chaʼan mi chaʼ pʌjqʼuel teʼ tac ti jiñi colem tac bʌ mateʼel am bʌ tiʼ tejclum Lviv, miʼ yʌl: «Jiñi i testigojob Jehová jiñʌch tsaʼ bʌ ñaxan cʼotiyob ti coltaya. An i coltayon lojon ti jujumpʼejl jab cʼʌlʌl cheʼ ti 2014».
¿Chucoch yom miʼ sʌqʼuesʌntel jiñi colem mateʼel?
Jiñi ingeniero Splavinskyi tsiʼ yʌlʌ: «An chaʼchajp bajcheʼ miʼ bibʼesʌntel jiñi colem mateʼel. Ñaxan, jiñi quixtañujob maʼañic miʼ chʼʌmob majlel i basura. I chaʼpʼejlel, miʼ tilel carro tac muʼ bʌ i chocob basura yicʼot yan tac bʌ».
Jiñi basura miʼ wen ticʼlan jiñi colem mateʼel. Jiñi ingeniero Splavinskyi miʼ yʌl chaʼan «jiñi basura miʼ wen jalʼan chaʼan miʼ jilel yicʼot miʼ pʌcʼmʌn», cheʼ jaʼel, «miʼ bibʼesan jiñi jaʼ am bʌ tiʼ mal lum i miʼ yʌcʼ ti wocol jiñi Lum». Jiñi vidrio miʼ pʼʌtʼesʌben i cʼʌcʼal jiñi qʼuin i miʼ mejlel tiʼ tejchel tojcʌlel. Jiñi i xujtʼil tac jiñi vidrio yicʼot jeringa tac miʼ mejlel i low yambʌlob, ñumento jiñi alʌlob. Jiñi ingeniero miʼ bej tsictesan: «Cheʼ muqʼuic i lojtel jiñi basura maʼañic miʼ yujtel ili wocol».
Wocol chaʼan miʼ sʌqʼuesʌntel 3300 hectárea colem mateʼel. «Cojach an joʼtiquil muʼ bʌ i cʌntañob jiñi mateʼel, i mach jasʌlob chaʼan miʼ mejlel i luʼ sʌqʼuesañob. Jin chaʼan, ti jujumpʼejl jab mij cʼajtin lon j coltʌntel».
Mi lojtel jiñi basura yicʼot miʼ tʼoxtʌl
Jiñi Testigojob miʼ xojob i guante, miʼ cʼʌñob rastrillo yicʼot bolsa tac chaʼan miʼ lotob botella, i llantajlel carro, vidrio, tsucu taqʼuin, jun, plástico yicʼot cʼʌmbilix bʌ jeringa tac. Juntiquil muʼ bʌ i cʌntan mateʼel i cʼabaʼ Ihor Fedak miʼ yʌl chaʼan «wen sʌc miʼ cʼʌyob jiñi Testigojob baqui miʼ tajob i lotob basura».
Anquese jiñi ley yaʼ ti jiñi país maʼañic miʼ wersa cʼajtin chaʼan yom miʼ tʼoxtʌl jiñi basura, jiñi Testigojob miʼ tʼoxob ti uxchajp: vidrio, jun yicʼot plástico. Bajcheʼ ili, ti wiʼil yambʌyix bajcheʼ miʼ mejlel ti cʼʌjñel. Cheʼ jiñi, jumpʼejl empresa miʼ laj tempan jiñi basura i jiñix miʼ qʼuel chuqui miʼ caj i tumbeñob. Jiñi Ihor Fedak miʼ yʌl: «Mic wen aqʼueñob wocolix i yʌlʌ jiñi testigojob Jehová come miʼ wen coltañon lojon»
«Mach lecojic mi caj c qʼuejlel cheʼ mic lot basura»
Jiñi Testigojob miʼ wen mulañob coltaya ti sʌqʼuesʌntel jiñi colem mateʼel muʼ bʌ i yujtel ti jujumpʼejl jab. Yomob i yʌcʼob i coltaya tiʼ cʌntʌntel jiñi colem mateʼel yicʼot chaʼan sʌc miʼ yajñel baqui chumulob jiñi quixtañujob. Juntiquil testigo i cʼabaʼ Volker miʼ yʌl chuqui miʼ ñaʼtan: «Mach lecojic mi caj c qʼuejlel cheʼ mic lot basura. Mij qʼuel ti ñuc cheʼ mij coltan yambʌlob i miʼ yʌcʼ chaʼan wen mi cubin c bʌ».
Anzhelika miʼ yʌl: «Tic tojlel, ñuc bʌ i cʼʌjñibal jiñʌch cheʼ mic lot jiñi basura, mach jiñic majqui tsiʼ choco». Lois 78 bʌ i jabilel i tsaʼ bʌ i chaʼle coltaya jaʼel, miʼ yʌl: «Mach yomic mi lac michʼan cheʼ mi laj qʼuel basura ti ili colem mateʼel, ñumen wen cheʼ mi lac lot i mi laj cʌcʼ ti yajñib».
Wieslaw miʼ yʌl: «Jiñi quixtañujob ñʌmʌl i qʼuelob chaʼan xojol lon c chaʼan wen bʌ lon c pislel cheʼ mij cʼotel lon c suben wen tʼan. Pero mucʼʌch lon c mulan jaʼel cheʼ mic sʌqʼuesan lojon jiñi colem mateʼel o baqui jach bʌ eʼtel muʼ bʌ i coltan yambʌlob».