Jiñi libro i cʼabaʼ C libro muʼ bʌ yʌl Cʌntesʌntel am bʌ ti Biblia, tsaʼ loqʼui ti jiñi tʼan pangasinán cheʼ ti 2012, jumpʼejl tʼan am bʌ yaʼ ti Filipinas, i jiñi Departamento de Educación ti jiñi país wen i cʼʌjñibal i chaʼan tsiʼ qʼuele come tsaʼ ñaʼtʌnti chaʼan ti jiñi escuela primaria miʼ yʌjqʼuel jiñi clase tiʼ tʼan jiñi xbiʼtalob. Ili ora, cabʌl xcolelob woliʼ tajob i coltʌntel chaʼan jiñi libro.

Yaʼ ti Filipinas an ñumen ti 100 tʼan, i añix cabʌl jab caji i qʼuejlel chaʼan baqui bʌ jiñi yom bʌ miʼ cʼʌjñel ti cʌntesa yaʼ ti escuela. Jiñi Departamento de Educación tsaʼ cʼoti i cʌn ti 2012 chaʼan jiñi xcolelob muʼ bʌ i pʌsbentelob ti «jiñi tʼan yujiloʼ bʌ [...] ñumen wen miʼ chʼʌmbeñob isujm yicʼot ti ora jach». Jin chaʼan, jiñi añoʼ bʌ i yeʼtel tsiʼ meleyob jumpʼejl programa chaʼan jiñi clase miʼ yʌjqʼuel ti cabʌl tʼan, cheʼʌch bajcheʼ yujilob jiñi xbiʼtalob.

Jumpʼejl jiñʌch jiñi tʼan pangasinán. Pero cheʼ bajcheʼ tsiʼ yʌlʌ juntiquil director chaʼan jumpʼejl escuela, an jumpʼejl i wocolel: maʼañic cabʌl jun ti jiñi tʼan pangasinán. Jin chaʼan, jiñi C libro muʼ bʌ yʌl Cʌntesʌntel am bʌ ti Biblia wen jach i yorajlel cheʼ tsaʼ loqʼui ti jiñi colem tempa bʌ i chaʼan i testigojob Jehová tsaʼ bʌ mejli ti noviembre i chaʼan 2012.

Cheʼ bʌ 10 mil libro tsaʼ chaʼlenti ti imprimir chaʼan miʼ pujquel ti jiñi colem tempa bʌ. Tsiʼ wen tajayob i tijicñʌyel jiñi tatʌlob yicʼot jiñi xbiʼtalob cheʼ bʌ tsiʼ qʼueleyob jiñi libro melbil tiʼ tʼañob. Jumpʼejl xñujpuñel tsiʼ yʌlʌ: «Jiñi j calobil lojon miʼ wen mulañob come tsiquil miʼ chʼʌmbeñob isujm».

Cheʼ tsaʼ jaxto ñumi jiñi colem tempa bʌ, chaʼtiquil uxtiquil i testigojob Jehová tsiʼ chʼʌmʌyob majlel jiñi libro Cʌntesʌntel am bʌ ti Biblia ti jiñi escuela am bʌ yaʼ ti Dagupan. Jiñi maestrojob ti ora bʌ yom i tajob jiñi jun tac ti pangasinán wen tijicña tsaʼ yubiyob. Ñumen ti 340 libro tsiʼ cʼajti jiñi escuela, i tsaʼ caji ti cʼʌjñel chaʼan miʼ cʌntesʌntelob ti pejca jun tiʼ tʼan jiñi xbiʼtalob.

Jiñi i testigojob Jehová miʼ tajob i tijicñʌyel cheʼ bʌ woliʼ cʼʌjñel jiñi libro chaʼan miʼ cʌntesʌntel jiñi xbiʼtalob. Juntiquil traductor chaʼan bʌ ili libro, tsiʼ yʌlʌ: «Wajalix tsaʼ caji c ñaʼtan lojon chaʼan ñucʼ i cʼʌjñibal cheʼ miʼ mejlel jun tac loqʼuem bʌ ti Biblia tiʼ tʼan jiñi quixtañujob, muʼ bʌ i mejlel i cʼotelob tiʼ pusicʼal. Jin chaʼan, i testigojonbʌlon Jehová mic chaʼlen lon wersa c ñusan lojon jiñi Biblia yicʼot yan tac bʌ jun loqʼuem bʌ yaʼi ti yambʌ tʼan.»