Yaʼ ti Australia an cabʌl jiñi añobix bʌ i jabilel cheʼʌch bajcheʼ ti yan tac bʌ país. An muʼ bʌ i majlelob ti chumtʌl baqui miʼ cʌntʌntel xñoxob come yaʼi miʼ wen cʌntʌntelob yicʼot miʼ qʼuejlelob chuqui cʼʌjñibal bʌ i chaʼan.

Pero jiñi ñoxobix bʌ mach cojach yom miʼ qʼuelbentelob chuqui i cʼʌjñibal bʌ i chaʼan i bʌcʼtal. An i tajol, maʼañix miʼ tajob chuqui miʼ melob, bajñel jach miʼ yubiñob i bʌ yicʼot chaʼan cʌybilobix. Jiñi i testigojob Jehová miʼ yʌqʼueñob i pijtaya yicʼot miʼ ñuqʼuesʌbeñob i pusicʼal ti jujumpʼejl semana cheʼ miʼ majlelob i julaʼtan chaʼpʼejl otot baqui miʼ cʌntʌntel xñoxob ti Portland, jumpʼejl tejclum am bʌ ti Victoria (Australia).

Jiñi Testigojob lʌcʼʌl bʌ chumulob yaʼi miʼ tempañob i bʌ yicʼot añobix bʌ i jabilel i miʼ subeñob i chaʼan bʌ Biblia, bajcheʼ jiñi tsaʼ bʌ i ñusa Jesús tiʼ cuxtʌlel. Juntiquil Testigo i cʼabaʼ Jason miʼ yʌl: «Mi lon j comol pejcan jiñi Biblia, i ti wiʼil mi lon c tsajin». Cabʌl muʼ cʼotelob i ñʌchʼtan cʼamob, jin chaʼan, jiñi Testigojob miʼ ñuqʼuesʌbeñob i pusicʼal i miʼ subeñob chaʼan Dios tsaʼix i yʌlʌ chaʼan mi caj i jisan jiñi cʼamʌjel tac yicʼot chʌmel.

Yambʌ Testigo i cʼabaʼ Tony, miʼ yʌl: «Ti ñaxan cojach mi lon c jaʼlan media hora pero jiñi ñoxobix bʌ mach jasʌlic miʼ yubiñob. Jin chaʼan, wʌle muqʼuix lon j cʌytʌl cheʼ bʌ jumpʼejl hora, anquese juntiquil xʼixic ñoxix bʌ tsiʼ subeyon lon chaʼan yom cheʼ chaʼpʼejlic hora mi lon c jaʼlan». An xñoxob maʼañix bʌ miʼ cʼotelob i wut, mach bʌ mejlix i tejchelob tiʼ wʌyib o maʼañobix bʌ i pʼʌtʌlel tiʼ cʼʌb, jin chaʼan jiñi Testigojob miʼ coltañob cheʼ bʌ miʼ tsajiñob jiñi Biblia i cheʼ miʼ subeñob chaʼan miʼ yʌlob muʼ bʌ i ñaʼtañob cheʼ bajcheʼ mejlel i chaʼañob.

Ti jiñi julaʼ tac muʼ bʌ i melob jiñi Testigojob yicʼot jiñi añobix bʌ i jabilel miʼ chaʼleñob cʼay chaʼan miʼ yʌqʼueñob i ñuclel Dios. Tiʼ pejtelel ora jiñi ñoxobix bʌ bej yomobto cʼay. John a juntiquil wiñic añix bʌ i jabilel miʼ yʌl: «Mic wen mulan pejtelel laʼ cʼay. Miʼ coltañon lojon chaʼan mic chʼʌmben lon isujm muʼ bʌ lon j cʌn yicʼot chaʼan mi lon j qʼuel ti ñuc Dios». Judith, xpotsʼ pero tsaʼix cʌyle tiʼ jol jiñi cʼay tac muʼ bʌ i ñumen mulan. Tsaʼ qʼuextʌbenti i cʼabaʼ jiñi chumuloʼ bʌ yaʼ baqui miʼ cʌntʌntel jiñi ñoxobix bʌ.

Jiñi Testigojob miʼ cʼojoʼtañob jaʼel mi weñʌch añob jiñi ñoxobix bʌ. Jumpʼejl ejemplo, juntiquil Testigo i cʼabaʼ Brian, miʼ yʌl chaʼan cheʼ bʌ an majqui miʼ cʼamʼan, miʼ julaʼtañob yaʼ tiʼ cuarto. Miʼ bej tsictesan: «Mi lon c chaʼlen tʼan yicʼotob i mij cʼajtiben lojon bajcheʼ miʼ yubiñob i bʌ. An i tajol, mic chaʼ majlel lon c julaʼtañob ti yambʌ qʼuin chaʼan miʼ lon c ñaʼtan mi weñix añob».

Jiñi añobix bʌ i jabilel miʼ wen mulañob cheʼ miʼ julaʼtʌntelob. Peter muʼ bʌ i majlel i ñʌchʼtañob ti jujumpʼejl semana, miʼ yʌl: «¡Comix miʼ chaʼ tilelob!». Judith miʼ suben jiñi muʼ bʌ i cʌntan: «Wʌle miércoles jix, a wocolic com cheʼ chajpʌbiloñix chaʼan jiñi i tsajintel Biblia. Mach comic mij cʼotel cheʼ tsaʼix ñumi ora».

Jiñi ñoxobix bʌ miʼ wen mulañob muʼ bʌ i cʌñob i ñumento lʌcʼʌl mi yubiñob i bʌ ti Dios. Cheʼ bʌ tsaʼ ujti i tsajiñob jumpʼejl i cʌntesa Jesús, Robert tsiʼ yʌlʌ: «Maʼañic baʼ ora tsaʼ c chʼʌmbe i sujm ili relato, pero wʌle muqʼuix c chʼʌmben i sujm». David tsiʼ cʌñʌ chaʼan ñuc i cʼʌjñibal cheʼ mi lac chaʼlen oración, tsiʼ yʌlʌ: «An i coltayon c sujtel tiʼ yamigo Dios yicʼot chaʼan mij qʼuel bajcheʼ isujm bʌ lac piʼʌl».

Jiñi ñoxobix bʌ miʼ wen tajob i tijicñʌyel cheʼ miʼ cʌñob jiñi pijtaya muʼ bʌ i yʌcʼ jiñi Biblia. Lynette chumul bʌ jaʼel yaʼ baqui miʼ cʌntʌntel xñoxob, tiʼ sube jiñi Testigojob: «Wocolix laʼ wʌlʌ chaʼan tsaʼ pʌsbeyon lojon jiñi pijtaya muʼ bʌ i yʌcʼ jiñi Biblia». Yambʌ xʼixic añix bʌ i jabilel tsiʼ yʌlʌ: «Dios tsiʼ chocoyetla tilel».

Margaret tsiʼ wen mulaj jiñi julaʼ tac jin chaʼan, wʌle muqʼuix i majlel ti jiñi tempa bʌ muʼ bʌ i melob i testigojob Jehová yaʼ tiʼ Yotlel Tempa bʌ lʌcʼʌl bʌ an. Mi chaʼlen wersa chaʼan miʼ majlel anquese mach wen cʼoqʼuic i maʼañic miʼ wen mejlel i ñijcan i bʌcʼtal. Pero miʼ yʌl: «Jatetla tsaʼ laʼ pʌsbeyon lojon chaʼan añʌch i sujmlel lon j cuxtʌlel».

Jiñi muʼ bʌ i chaʼleñob eʼtel yaʼ baqui miʼ cʌntʌntel jiñi ñoxobix bʌ miʼ qʼuelob ti ñuc jaʼel jiñi julaʼ tac muʼ bʌ i melob jiñi Testigojob. Anna, juntiquil Testigo lʌcʼʌl bʌ chumul, miʼ yʌl: «Jiñi xʼeʼtelob miʼ subeñob jiñi ñoxobix bʌ chaʼan miʼ majlel i ñʌchʼtañob i chaʼan bʌ Biblia come miʼ qʼuelob chaʼan ti wiʼil ñumen tijicñayob». Brian, tsaʼ bʌ ajli, miʼ yʌl: «Jiñi xʼeʼtelob wen utsob yicʼot mi chaʼleñob coltaya. Mi sʌclañob bajcheʼ miʼ mejlel i yʌcʼob i coltaya».

I familiajob jiñi ñoxobix bʌ miʼ wen mulañob cheʼ bʌ miʼ qʼuelob chaʼan miʼ ñusañob i bʌ ti jiñi julaʼ tac. I yixicʼal juntiquil xʼixic añix bʌ i jabilel tsiʼ sube wen bʌ tʼan jiñi Testigojob, tsiʼ subeyob: «Wen utsʼat woli bʌ laʼ mel tiʼ tojlel c mamá».