xColelob miʼ coltañob i piʼʌlob chaʼan miʼ ñusañob ticʼlʌntel ti escuela
Maxto wen jali, jumpʼejl organización muʼ bʌ i chaʼlen coltaya am bʌ ti Inglaterra tsiʼ yʌqʼue jiñi majtañʌl cʌmbil bʌ bajcheʼ Diana juntiquil alob i cʼabaʼ Hugo am bʌ 10 i jabilel, come tsiʼ colta i piʼʌlob chaʼan mi ñusañob ticʼlʌntel yaʼ ti escuela.
Hugo tsiʼ yʌlʌ: «Ili majtañʌl jiñʌch wocolix i yʌlʌ jiñi video Coltan a bʌ pero mach yicʼotic jatsʼ. Jiñi tsaʼ bʌ j cʌñʌ yaʼ ti video, am bʌ yaʼ ti página jw.org, tsiʼ coltayon chaʼan miʼ mejlel j coltan jiñi muʼ bʌ i ticʼlʌntelob.»
Jiñi ticʼlʌntel ti escuela «jiñʌch jumpʼejl wocol muʼ bʌ i ñusañob tiʼ pejtelel ora jiñi xcolelob tiʼ petol pañimil. . . , pero an chuqui miʼ mejlel a mel.» (I xujtʼil jiñi video Coltan a bʌ pero mach yicʼotic jatsʼ.)
Hugo tsiʼ pʌsbe jiñi video i maestrojob, i tsiʼ chajpayob chaʼan jiñi yambʌ xqʼueljuñob miʼ mejlel i yochelob yaʼ ti página chaʼan Internet i chaʼan i testigojob Jehová. Ti ili ora jiñi i piʼʌlob Hugo, añoʼ bʌ cheʼ bʌ 8 yicʼot 10 i jabilel, miʼ wen ochelob yaʼ ti página jw.org. Miʼ yʌlob chaʼan ili an i coltañob chaʼan miʼ ñusañob jiñi ticʼlʌntel yaʼ ti escuela, pero mach cojach jiñi, an i coltayob jaʼel chaʼan miʼ tajbeñob i jacʼbal ñuc tac bʌ cʼajtiya cheʼ bajcheʼ: ¿Majqui jiñi isujm bʌ la camigo?
Chuqui tac miʼ mejlel i coltan jiñi xcolelob chaʼan jiñi ticʼlʌntel ti escuela
Ti yambʌ escuela yaʼ ti Inglaterra, juntiquil alob i cʼabaʼ Elijah am bʌ 8 i jabilel tsiʼ ñusa ticʼlʌntel ti escuela. Tsiʼ qʼuele yicʼot i familia jiñi video Coltan a bʌ pero mach yicʼotic jatsʼ, cheʼ jiñi tsiʼ chajpayob muʼ bʌ i mejlel i yʌl yicʼot i mel cheʼ an majqui yom i ticʼlan. Ili tsiʼ colta i taj i chʼejlel chaʼan miʼ ñusan jiñi wocol. Ti wiʼil, cheʼ ti semana chaʼan i contrajintel jiñi ticʼlʌntel ti escuela, i maestro tsiʼ pʌsʌ jiñi video jiñi xqʼueljuñob.
Pero mach cojach ti Inglaterra miʼ yujtel ili wocol chaʼan ticʼlʌntel ti escuela, an tiʼ pejtelel pañimil. Jiñi video Coltan a bʌ pero mach yicʼotic jatsʼ woliʼ coltan jiñi xcolelob tiʼ pejtelel pañimil.
Ti Estados Unidos, juntiquil alʌ xchʼoc i cʼabaʼ Ivie am bʌ 10 i jabilel miʼ bʌcʼñan juntiquil i piʼʌl ti qʼuejun come miʼ ticʼlan. Cheʼ bʌ Ivie tsiʼ qʼuele jiñi video Coltan a bʌ pero mach yicʼotic jatsʼ, tsiʼ taja i chʼejlel chaʼan miʼ pejcan jiñi i piʼʌl. Tsiʼ chaʼle tʼan jaʼel yicʼot i maestra, i tsiʼ colta chaʼan miʼ tojʼesan jiñi wocol. Jiñi i piʼʌl ti qʼuejun tsiʼ cʼajtibe chaʼan miʼ ñusʌben i ti ili ora weñix añob.
I testigojob Jehová mi lon c qʼuel ti ñuc i wenlel jiñi xcolelob. Jin chaʼan, mi caj lon chʌn chajpan cʌntesʌntel tac chaʼan mi lon j coltan i ñusañob jiñi wocol tac am bʌ ti laj cuxtʌlel cheʼ bajcheʼ jiñi ticʼlʌntel ti escuela .
Miʼ mejlel a qʼuel jaʼel iliyi
CUXUL BɅ DIBUJO TAC
Coltan a bʌ cheʼ mach yicʼotic jatsʼ
Qʼuele chucoch an muʼ bʌ i tʌcʼlan yambʌlob yicʼot bajcheʼ miʼ mejlel a coltan a bʌ.
CUXUL BɅ DIBUJO TAC
¡Miʼ mejlel a ñusan a xicʼol chaʼan mach bʌ weñic!
Cheʼ mucʼʌch a mel ili chʌnchajp mi caj i coltañet chaʼan maʼ bajñel ñaʼtan chuqui a wom a mel.