Cheʼ ti 14 i chaʼan Septiembre, 2013 cheʼ bʌ 10,500 quixtañujob tsaʼ cʼotiyob ti jiñi Graduación chaʼan jiñi clase 135 chaʼan jiñi Cʌntesʌntel loqʼuem bʌ ti Biblia i chaʼan Galaad de la Watchtower, tsaʼ ujti iliyi yaʼ baqui miʼ yʌcʼob cʌntesa jiñi i testigojob Jehová am bʌ yaʼ ti Patterson, Nueva York. Ili cʌntesʌntel miʼ coltan jiñi i testigojob Jehová añobix bʌ cabʌl i jabilel bajcheʼ xsubtʼañob.

Guy Pierce, muʼ bʌ ti eʼtel ti jiñi Junmojt muʼ bʌ i pʌsob bij i chaʼan i testigojob Jehová jiñʌch tsaʼ bʌ i teche jiñi programa. Tiʼ teche i tʼan yicʼot jiñi texto am bʌ ti Mateo 28:19, 20, muʼ bʌ i tsʼitaʼ al: «Cucula [...]. Sutqʼuiñob ti xcʌntʼañob wiñicob xʼixicob ti pejtelel pañimil [...]. Cʌntesanla chaʼan miʼ laj chʼujbiñob pejtelel chuqui tac tsac subeyetla».

Jiñi hermano Pierce tsiʼ yʌlʌ chaʼan jiñi tʼan tsaʼ bʌ i yʌlʌ Jesús tsaʼ wen cʼotiyob tiʼ pusicʼal ti jiñi bʌ ora, i cheʼ to woliʼ chʌn ujtel ili ora. Jiñi xñoptʼañob miʼ subeñob jiñi woli bʌ i cʌntesañob chaʼan miʼ jacʼob jiñi mandar tac tsaʼ bʌ i yʌlʌ Jesús, yaʼ ochem jaʼel jiñi mandar chaʼan miʼ sujbel «jiñi wen tʼan chaʼan i Yumʌntel Dios» (Mateo 24:14). Cheʼ bajcheʼ jiñi, jiñi tsijiʼ bʌ xñoptʼañob mi caj i sujtelob ti wem bʌ xcʌntesa chaʼan bʌ i Yumʌntel Dios. Jiñi hermano Pierce tsiʼ yʌlʌ chaʼan cheʼʌch bajcheʼ woliʼ pʼojlel majlel jiñi quixtañujob wʌʼ ti Pañimil, jiñi i tejclum Dios woliʼ bej pʼojlel majlel jaʼel.

«Ñumen tsiʼ yʌcʼʌyob cheʼ bajcheʼ miʼ mejlel i yʌcʼob». Thomas Cheiky, juntiquil chaʼan bʌ jiñi Comité i chaʼan Sucursal yaʼ ti Estados Unidos, tsiʼ yʌcʼʌ jumpʼejl discurso chucul bʌ yaʼ ti 2 Corintios 8:​1-4. Anquese maʼañic i chubʌʼañob jiñi congregación tac am bʌ yaʼ ti Macedonia cheʼ ti ñaxam bʌ siglo, pero tsiʼ wersa cʼajtiyob chaʼan miʼ yʌqʼueñob i coltaya jaʼel jiñi hermanojob chʼoyoloʼ bʌ ti Jerusalén yomoʼ bʌ coltʌntel. Jiñi woli bʌ i chʼʌmob i cʌntesʌntel yaʼ ti Galaad tsiʼ pʌsʌyob jaʼel jiñi i yutslel yicʼot chaʼan yomʌch i coltañob jiñi yañoʼ bʌ.

Anquese jiñi xñoptʼañob ti Macedonia tsaʼʌch i pʌsʌyob i yutslel, pero maʼañic tsiʼ cʌyʌ i cʌntañob jiñi i familia mi jiñic jiñi i yeʼtelob ti Dios. Jiñi hermano tsiʼ sube jiñi woliyoʼ bʌ ti clase chaʼan yom miʼ lajiñob jiñi macedoniojob cheʼ pʼisbil jach chuqui yom miʼ melob.

«Tsaʼix ujti jiñi clase». Samuel Herd, muʼ bʌ ti eʼtel yicʼot jiñi Junmojt muʼ bʌ i pʌsob bij, tsiʼ sube jiñi tsaʼix bʌ ujtiyob ti clase chaʼan miʼ chʌn ñaʼtañob cheʼ bʌ tsajñiyob ti jiñi Cʌntesʌntel i chaʼan Galaad. Tiʼ tsictesa chaʼan lajalʌch bajcheʼ jumpʼejl wen utsʼatax bʌ música miʼ mejlel lac ñʌchʼtan ti jumpʼejl qʼuin, jiñi tsaʼ bʌ i cʌñʌyob ti jiñi cʌntesʌntel yaʼʌch mi caj i chʌn ajñel yicʼotob chaʼan miʼ pʼʌtʼesañob baqui jach miʼ majlelob tiʼ pejtelel ora.

Jiñi hermano Herd tsiʼ yʌlʌ chaʼan jiñi i ñaʼtʌbal Jehová maʼañic i yujtibal. Dios tsiʼ yotsʌbe i cʼabaʼ tiʼ pejtelel jiñi ecʼ tac am bʌ yaʼ ti panchan, i maʼañic baqui ora miʼ ñajʌyel i chaʼan (Salmo 147:4). Jin chaʼan, maʼañic mi caj i ñajʌyel i chaʼan jiñi tsʌts bʌ eʼtel tsaʼ bʌ i meleyob jiñi tsaʼ bʌ i chaʼleyob clase. Jehová an tiʼ ñaʼtʌbal tiʼ pejtelel chuqui wen tac bʌ tiʼ tojlelob, i maʼañic majqui mi caj i xujchʼibeñob jiñi chubʌʼañʌl wen letsem bʌ i tojol tempʌbil bʌ yaʼ ti panchan (Mateo 6:​20).

Jiñi xcʌntesa tsiʼ yʌlʌ jaʼel chaʼan Dios maʼañic miʼ ñajʌyel i chaʼan tiʼ pejtelel tsaʼ bʌ i meleyob jiñi tsaʼ bʌ i chaʼleyob clase, cheʼ bajcheʼ jiñi cʼuxbiya tsaʼ bʌ i pʌsʌyob jaʼel, mach mulilic cheʼ miʼ chʌn ñaʼtañob tiʼ pejtelel tsaʼ bʌ i meleyob yaʼ ti Galaad. Jiñi hermano Herd tsiʼ sube jiñi tsaʼ bʌ i chʼʌmʌyob i cʌntesʌntel: «Cheʼ bʌ mi laʼ chʌn ñaʼtan tiʼ pejtelel jiñi tsaʼ bʌ laʼ ñusa ti jiñi clase, yom mi laʼ wʌqʼuen wocolix i yʌlʌ Jehová come jiñʌch tsaʼ bʌ i yʌqʼueyetla. Chʌn ñaʼtanla tiʼ pejtelel chuqui wem bʌ tsaʼ laʼ ñusa come jiñi bendición tac maʼañic miʼ mejlel ti wis ñajʌyel».

«I pʼʌtʌlel Jehová mi caj i coltañetla.» Sam Roberson, juntiquil tsaʼ bʌ i yʌcʼʌ jiñi clase, tsiʼ tiqʼui jiñi tsaʼ bʌ i chʼʌmʌyob jiñi cʌntesʌntel chaʼan cheʼ bʌ woliʼ ñusañob tsijiʼ bʌ wocol yom miʼ ñaʼtañob chaʼan i pʼʌtʌlel Jehová jiñʌch muʼ bʌ caj i coltañob, i mach yomic miʼ ñaʼtañob chaʼan mi caj i bajñel tajob i coltʌntel. Ti Efesios 3:​20 mi yʌl chaʼan Dios «miʼ mel ñumen ñuc bʌ i yeʼtel bajcheʼ pejtelel chuqui mi laj cʼajtiben yicʼot pejtelel muʼ bʌ lac ñaʼtan». I pʼʌtʌlel ñumen ñuc i joñonla maʼañic miʼ mejlel lac chʼʌmben isujm. Mach cojach mi mejlel laj cʌl chaʼan Jehová «miʼ mel ñumen ñuc bʌ i yeʼtel» chaʼan pejtelel jiñi muʼ bʌ lac ñaʼtan come jiñi versículo mi yʌl chaʼan ñumen to miʼ mejlel i mel cheʼ bajcheʼ mi lac ñaʼtan.

Jehová mi yʌl chaʼan mi caj i yʌqʼuen i pʼʌtʌlel jiñi xñoptʼañob. Cheʼ bʌ mi lac ñusan wocol, Jehová lajalʌch bajcheʼ juntiquil «wen yujil bʌ guerra» (Jeremías 20:11). Jiñi hermano Roberson tiʼ sube jiñi tsaʼ bʌ i chʼʌmʌyob i cʌntesʌntel chaʼan Jehová mi caj i coltañob chaʼan miʼ mejlel i lʌtʼob pejtelel jiñi wocol muʼ bʌ caj i tajob.

«Yom mi laʼ chʌn qʼuel ti ñuc jiñi eʼtel am bʌ laʼ chaʼan tiʼ Yumʌntel Dios». William Samuelson, yambʌ xcʌntesa chaʼan jiñi clase, tiʼ tsictesa chaʼan jiñi eʼtel chaʼan bʌ i Yumʌntel Dios ti chaʼchajp tsiʼ colta jiñi tsaʼ bʌ i chʼʌmʌyob i cʌntesʌntel. Junchajp, tiʼ coltayob chaʼan miʼ pʌsob cheʼ bajcheʼ ti wiʼil yicʼot ti ili ora chaʼan añobʌch i cʼʌjñibal. I chaʼchajplel, cheʼ bʌ xʼeʼtelob chaʼan jiñi ñumen ñuc bʌ yumʌl, i Yumʌntel Dios, mucʼ jach bʌ i cʼajtibeñob chaʼan miʼ qʼuejlel ti ñuc.

¿Bajcheʼ miʼ mejlel i chʌn qʼuelob ti ñuc jiñi? Jiñi hermano Samuelson tsiʼ sube jiñi tsajñiyoʼ bʌ ti clase chaʼan yom miʼ chʌn qʼuelob ti ñuc Jehová i chaʼan yom miʼ chʌn qʼuelob ti ñuc jiñi quixtañujob jaʼel. Jesús tsiʼ qʼuele ti ñuc jaʼel jiñi lʌcʼʌl bʌ añob yicʼot i ñumen to cheʼ bʌ an majqui tsiʼ tiqʼui. Jiñi apóstol Pablo tsiʼ qʼuele ti ñuc jiñi subtʼan tsaʼ bʌ i mele i mach jiñic jach tsiʼ bajñel sʌcla i ñuclel (Romanos 11:13). Mi jiñi tsaʼ bʌ i chaʼleyob clase cheʼʌch miʼ melob jaʼel, mi caj i ñumen tajob i ñuclel.

‹An i pʼʌtʌlel tiʼ yej jiñi caballo.› Michael Burnett, yambʌ xcʌntesa i chaʼan Galaad, tsiʼ pʌsʌ chaʼan cheʼ bʌ mi laj qʼuel ti ñuc chuqui tac mi laj cʌn ti lac tempa bʌ mi caj i mejlel laj cʼʌn ti lac subtʼan, i cheʼ bajcheʼ jiñi woli laj cʌcʼ ti tsictʌyel jiñi profecía i chaʼan Apocalipsis o Revelación 9:​19. Cheʼ jiñi, jiñi tsaʼ bʌ i chaʼleyob clase tsiʼ pʌsʌyob yicʼot tsiʼ yʌlʌyob chuqui tac ñusʌbil i chaʼañob ti jiñi subtʼan cheʼ bʌ woliyob to ti clase. Juntiquil tsiʼ yʌlʌ chaʼan tsiʼ melbe jumpʼejl cʼajtiya juntiquil wiñic muʼ bʌ ti troñel baqui miʼ chojñel gasolina: «¿Jalixqui tsaʼ tejchi yicʼot jalixqui tsaʼ tsʼʌctiyi i yorajlel gentilob?» (Lucas 21:24). Cheʼ bʌ tsiʼ chaʼ taja jiñi wiñic, tsiʼ colta i tajben i jacʼbal jiñi cʼajtiya ti jiñi capítulo 4 chaʼan i juñilel Daniel yicʼot jiñi apéndice chaʼan jiñi libro ¿Qué enseña realmente la Biblia?

«Tsaʼ aqʼuentiyob chuqui toj tiʼ pusicʼalob». Adrián Fernández, juntiquil muʼ bʌ ti eʼtel bajcheʼ Comité i chaʼan Sucursal yaʼ ti Estados Unidos, tiʼ chaʼle ti entrevistar chaʼpʼejl xñujpuñelob tsaʼ bʌ ajñiyob ti jiñi clase. Jiñi hermano Helge Schumi tiʼ tsictesa chaʼan yaʼ ti Biblia mi yʌl chaʼan an xñoptʼañob ti wajali taʼ bʌ i chanʼesayob i bʌ cheʼ bʌ tsaʼ aqʼuentiyob jumpʼejl eʼtel yaʼ ti congregación, jin chaʼan yaʼ ti Galaad miʼ subentelob chaʼan tiʼ pejtelel ora yom miʼ chʌn pʌsob i pecʼlel (2 Crónicas 26:16). Jiñi hermano Peter Canning tsiʼ yʌlʌ jaʼel chaʼan jiñi wen tac bʌ ticʼojel tsaʼ bʌ aqʼuentiyob yaʼ ti clase chaʼan bajcheʼ yom miʼ cʌñob jiñi yan tac bʌ tʼan: «Mach yomic ñuc mi laʼ qʼuel laʼ bʌ, yom mi laʼ ñusan quisin». Jiñi chʌntiquil tsaʼ bʌ chaʼlentiyob ti entrevistar tsiʼ yʌlʌyob chaʼan chuqui jiñi wen tac bʌ tsiʼ tajayob ti jiñi escuela: I pʼʌtʌlel chaʼan miʼ melob jiñi eʼtel yicʼot toj bʌ i pusicʼalob (Hebreos 13:9).

«Yom tijicñayetla chaʼan tsʼijbubil laʼ cʼabaʼ ti panchan.» (Lucas 10:20.) Jiñi cojix bʌ discurso chaʼan jiñi programa tsiʼ yʌcʼʌ Geoffrey Jackson, muʼ bʌ ti eʼtel yicʼot jiñi Junmojt muʼ bʌ i pʌsob bij. Tsiʼ yʌlʌ chaʼan añix cheʼ bʌ chaʼpʼejl jab, jiñi muʼ bʌ i chʼʌmob i cʌntesʌntel ti Galaad maʼañic miʼ chʼʌmob wen tijicña bʌ asignación i cheʼ jaʼel mach tijicña miʼ ñusañob cheʼ bʌ miʼ majlelob ti subtʼan ti jiñi tejclum tac mach bʌ ubibilic i chaʼañob jiñi wen tʼan. ¿Bajcheʼ yubil miʼ yubiñob i bʌ?

Cheʼ bʌ tsaʼix ujtiyob ti subtʼan jiñi 70 xcʌntʼañob i chaʼan Jesús, tsiʼ yʌlʌyob yicʼot i tijicñʌyelob chaʼan tiʼ cʼabaʼ Jesús tsiʼ chocoyob loqʼuel jiñi xibajob tiʼ tojlel yañoʼ bʌ (Lucas 10:​1, 17). Anquese Jesús tsiʼ yʌcʼʌ ti cʌñol i tijicñʌyel, tsiʼ wʌn subeyob: «Mach yomic tijicñayetla chaʼan woliʼ loqʼuel xibajob chaʼan ti laʼ tʼan. Pero yom tijicñayetla chaʼan tsʼijbubil laʼ cʼabaʼ ti panchan, cheʼen Jesús» (Lucas 10:20). Jesús tsiʼ tsictesa chaʼan jiñi xcʌntʼañob i chaʼan mach tijicña mi caj i ñusañob ti pejtelel ora. Jin chaʼan, mach jiñic yom miʼ chʌn ñaʼtañob chaʼan chuqui tac miʼ mejlel i tajob, yom miʼ ñaʼtañob chaʼan toj miʼ yajñelob yicʼot Jehová chaʼan «tsʼijbubil i cʼabaʼ ti panchan».

Jiñi hermano Jackson tsiʼ yʌlʌ: «Tsaʼ bʌ i sube Jesús jiñi 70 xcʌntʼañob i chaʼan, ñuc i cʼʌjñibal ti lac tojlel jaʼel». Mach yomic mi lac ñaʼtan chaʼan tiʼ pejtelel muʼ bʌ caj lac taj ti lac subtʼan yaʼʌch baqui chucul lac tijicñʌyel yicʼot chaʼan jiñʌch muʼ bʌ i pʌs chaʼan wen añʌch lac xucʼtʌlel. Cojach mi wen lʌcʼʌl añonla la quicʼot Jehová yicʼot mi mucʼʌch lac chaʼlen wersa lac melben i yeʼtel, mi caj lac taj lac jiñi isujm bʌ lac tijicñʌyel i xucʼul mi caj laj qʼuejlel.

Jesús tsiʼ taja wocol jaʼel tsaʼ bʌ i yʌqʼue i chʼijiyemlel. Jumpʼejl ejemplo, junyajl cabʌl quixtañujob tsaʼ caji i sʌclañob majlel cheʼ bʌ tsaʼ ujti i mel jumpʼejl milagro chaʼan miʼ weʼsañob (Juan 6:​10-​14, 22-​24). Pero cheʼ bʌ tsiʼ ñʌchʼtayob jumpʼejl cʌntesa i chaʼan Jesús, cabʌl tsaʼ cʼoti i ñaʼtañob chaʼan jumpʼejlʌch wajleya i tsaʼ sujtiyob majlel. Jin chaʼan, jiñi i tijicñʌyel cheʼ cabʌl tsaʼ caji i tsajcañob maʼañic tsaʼ jalʼa come cabʌl tsiʼ chaʼ cʌyʌyob (Juan 6:​48-​56, 60, 61, 66). Pero jiñi xcʌntʼañob i chaʼan xucʼul tsaʼ ajñiyob tiʼ tojlel Jesús i maʼañic tsiʼ cʌyʌyob. Mach jiñic tsiʼ yʌcʼʌyob ti ñuc jiñi tsaʼ bʌ ujti, tsiʼ ñaʼtayob chaʼan chʌn xucʼul yicʼot lʌcʼʌl miʼ yajñelob tiʼ tojlel Jehová (Juan 6:​67-​69).

I yujtibal. Cheʼ bʌ woliʼ yʌjqʼuel tac jiñi diploma, juntiquil ujtel to bʌ i chaʼlen i bʌ ti graduar tsiʼ pejca jumpʼejl carta tiʼ cʼabaʼ jiñi woli bʌ i chaʼleñob i bʌ ti graduar. Jiñi hermano Pierce tsiʼ yʌlʌ chaʼan ili pañimil maʼañic miʼ qʼuelob ti ñuc jiñi xñoptʼañob i chaʼan Dios, yaʼ miʼ tajtʌl ti tʼan jaʼel jiñi tsaʼ bʌ i chaʼleyob i bʌ ti graduar yaʼ ti Galaad (Hechos 4:​13; 1 Corintios 1:​27-​31). Pero Jehová ñucʌch miʼ qʼuel cheʼ mi laj cʌcʼ lac bʌ tiʼ tojlel i miʼ yʌqʼueñonla jiñi chʼujul bʌ i yespíritu. Tajol mach jiñic ñuc miʼ qʼuel jiñi cʌntesa am bʌ lac chaʼan, pero cheʼ bajcheʼ tsiʼ yʌlʌ jiñi hermano Pierce, «miʼ qʼuel ti ñuc jiñi lac xucʼtʌlel yicʼot jiñi eʼtel muʼ bʌ lac mel tiʼ tojlel».