Sandra cʼam tsiʼ yʌlʌ: «¡Cʼajc, cʼajc!». Woli ti cʼux waj tiʼ yotot i suegrojob cheʼ bʌ tsiʼ qʼuele chaʼan woliʼ loqʼuel cʼajc tiʼ yebal i tiʼ jumpʼejl otot am bʌ ti tʼejl. Sandra yicʼot jiñi i piʼʌl i cʼabaʼ Thomas, ti ora an chuqui tsiʼ meleyob. Sandra tsaʼ majli i sʌclan jumpʼejl extintor i Thomas tsaʼ majli i qʼuel chuqui woli ti ujtel. Ti ora, Sandra tsiʼ yʌqʼue jiñi extintor i tsiʼ yʌpʌ jiñi cʼajc. Sandra miʼ yʌl: «Cheʼ machic an chuqui tsaʼ lon c mele, tsaʼʌch laj puli jiñi otot».

¿Chuqui tsiʼ colta Thomas yicʼot Sandra cheʼ maʼañic tsiʼ chaʼleyob bʌqʼuen i ti ora an chuqui tsiʼ meleyob? Tiʼ chaʼticlelob yicʼot yonlel muʼ bʌ i chaʼleñob coltaya yaʼ ti sucursal chaʼan i testigojob Jehová yaʼ ti Selters (Alemania) añix cʌntesʌntiyob chuqui yom miʼ melob cheʼ bʌ miʼ tejchel cʼajc.

Wen colem baqui an jiñi sucursal yaʼ ti Selters, 30 hectárea i colemlel, i mach cojach an oficina yicʼot cuarto tac, an jaʼel baqui miʼ wujtsʼejl pisil, jumpʼejl imprenta i yan tac bʌ baqui miʼ mejlel ti tejchel cʼajc. Jin chaʼan, jiñi Departamento am bʌ tiʼ wenta miʼ cʌntan jiñi otot tac yicʼot jiñi am bʌ tiʼ joytilel, tsiʼ mele jumpʼejl programa chaʼan miʼ pʌsob bajcheʼ miʼ mejlel i chaʼleñob coltaya tiʼ cʌntʌntel jiñi otot tac. Ñaxan, jiñi Equipo chaʼan Emergencia yicʼot jiñi bomberojob chaʼan jiñi tejclum mi chajpañob chuqui yom melol cheʼ miʼ tejchel cʼajc. I chaʼpʼejlel, tiʼ pejtelel muʼ bʌ i chaʼleñob coltaya yaʼ ti sucursal miʼ melob iliyi:

• Miʼ wen subentelob bajcheʼ yom miʼ loqʼuelob ti jumpʼejl otot woliʼ bʌ ti pulel.

• Miʼ yʌqʼuentelob jumpʼejl curso i mi cʌntesʌntelob chaʼan bajcheʼ yom miʼ cʌntañob jiñi otot tac i maʼañic miʼ tejchel cʼajc.

• Miʼ cʌntesʌntelob chaʼan miʼ yʌpob cʼajc cheʼ wolito i tejchel.

Cheʼ bajcheʼ ili, jiñi muʼ bʌ i chaʼleñob coltaya yaʼ ti sucursal yujilobix chuqui yom melol cheʼ bʌ mi tejchel cʼajc.

Cheʼ bʌ woliʼ cʌntesʌntelob, miʼ tsictesʌbentelob bajcheʼ tsajal jach miʼ mejlel i yʌpob cʼajc. Laʼ laj qʼuel muʼ bʌ i yʌl Christin. Ti escuela tsaʼ jach subenti yom bʌ melol cheʼ miʼ pulel otot tac, pero yaʼ ti sucursal tsaʼ pʌsbenti bajcheʼ miʼ mejlel i yʌp cʼajc. Christin miʼ yʌl: «Tsaʼ c chʼʌmʌ jiñi extintor, tsaʼ c locʼsʌbe i seguro, tsaʼ c lʌcʼtesa c bʌ baqui an jiñi cʼajc pero yaʼ jach baʼ maʼañic miʼ tajon. Ti wiʼil, tic bajñel jach tsaʼ c yʌpʌ. Cheʼ jaʼel, tsaʼ j cʌñʌ bajcheʼ miʼ mejlel lon j comol yʌp cʼajc».

Daniel, jiñʌch juntiquil xcʌntesa chaʼan bajcheʼ yom cʌntʌntel jiñi otot tac i maʼañic miʼ tejchel cʼajc, miʼ yʌl chaʼan jiñi cʌntesa miʼ coltañob chaʼan maʼañic miʼ bʌcʼñañob jiñi cʼajc. Cheʼ jaʼel, miʼ tsictesan chaʼan lʌcʼʌ ti pejtelel ora jiñi quixtañujob miʼ bʌcʼñañob cheʼ miʼ tejchel cʼajc. Maʼañic miʼ ñaʼtañob chuqui yom i melob, miʼ cʼajtibeñob i bʌ: ¿Chuqui mi c mel? ¿Bajcheʼ miʼ cʼʌjñel jumpʼejl extintor?. Pero miʼ yujilobix yom bʌ melol, mi caj i mejlel i yʌpob jiñi cʼajc cheʼ wolito i tejchel. Miʼ yʌl chaʼan miʼ pʌsbentelob i «cʼʌñob ti wen jiñi extintor. Maʼañix miʼ wen chaʼleñob bʌqʼuen i yujilobix chuqui yom miʼ melob cheʼ an wocol».

Cabʌlob wen tijicña miʼ yubiñob cheʼ miʼ cʌntesʌntelob. Christin, tsaʼ bʌ ñaxan ajli, miʼ yʌl: «Cojaxto tsaʼ j cʼʌñʌ jumpʼejl extintor. Mi c ñaʼtan chaʼan tiʼ pejtelel yom miʼ chʼʌmob cʌntesʌntel bajcheʼ ili». Nadja, muʼ bʌ i chaʼlen coltaya chaʼpʼejl uxpʼejl qʼuin yaʼ ti sucursal i mi chaʼlen eʼtel ti jumpʼejl aeropuerto, miʼ yʌl: «Ti jiñi 10 jab tsaʼix bʌ ñumi, yaʼ ti aeropuerto cojach an i subeyoñob chuqui yom mi lon c mel. Pero jiñi cʌntesʌntel yicʼot am bʌ lon c mele yaʼ ti sucursal an i coltayon chaʼan maʼañic mi c chaʼlen bʌqʼuen. Cheʼ muqʼuic i tejchel cʼajc, cujilix chuqui yom mi c mel».

Sandra miʼ ñaʼtan chaʼan jiñi cʌntesa tsaʼ bʌ aqʼuenti yaʼ ti sucursal jiñʌch tsaʼ bʌ i colta chaʼan ti ora an chuqui miʼ mel cheʼ tsiʼ qʼuele cʼajc cheʼ yaʼan tiʼ yotot i suegrojob. Miʼ yʌl: «Maʼañix mi c wen bʌcʼñan j cʼʌn jiñi extintor. Weñʌch cheʼ mi c chʼʌm lojon jiñi cʌntesʌntel ti jujumpʼejl jab. An i wen coltayon».

Jiñi bomberojob tiʼ bele ora miʼ cʼotelob yaʼ ti sucursal chaʼan miʼ pʌsob bajcheʼ miʼ yʌpob cʼajc. Jiñi am bʌ ti wenta jiñi bomberojob, Theo Neckermann, miʼ yʌl chucoch cheʼ miʼ melob: «An ti lon c wenta jiñi tejclum Selters, baqui mach ñoj colemic jiñi tejclum tac. Mi c majlel lon c yʌp cʼajc ti otot tac o ti alʌ cuarto tac. Maʼañic maʼ taj a qʼuel yan tac bʌ otot cheʼ bʌ yilal bajcheʼ jiñi sucursal, ñoj colem baqui an, jiñi otot tac wen colem tac jaʼel i miʼ cʼʌjñel colem tac bʌ máquina ti jiñi eʼtel muʼ bʌ i mejlel yaʼi. Yom mi c ñumen c chajpan lon c bʌ chaʼan jiñi wocol tac mejl bʌ ti ujtel. Jin chaʼan, tijicña mi lon cubin cheʼ mi c tilel lon c ñumen cʌn ilayi».

Jiñi ñumen ti cien quixtañu añoʼ bʌ ti jiñi Equipo chaʼan Emergencia am bʌ yaʼ ti sucursal miʼ cʌntesʌntelob bajcheʼ miʼ loqʼuelob majlel cheʼ woliʼ pulel jumpʼejl otot i bajcheʼ miʼ comol chaʼleñob coltaya yicʼot jiñi bomberojob miʼ an majqui maʼañic tsaʼ mejli ti loqʼuel. Theo Neckermann miʼ yʌl: «Mi j qʼuel ti ñuc jiñi Equipo chaʼan Emergencia am bʌ laʼ chaʼan. Cheʼ machic miʼ coltañon lojon, pejtelel muʼ bʌ i mejlel mach utsʼatic miʼ yujtel».

Jiñi bomberojob yicʼot jiñi Equipo chaʼan Emergencia tsiʼ pʌsʌyob chuqui yujilob ti jumpʼejl acʼʌlel cheʼ ti febrero i chaʼan 2014. Jumpʼejl cuarto i chaʼan jiñi sucursal tsaʼ bujtʼi ti butsʼ. Daniel tsaʼ bʌ ñaxan ajli, miʼ yʌl: «Cʌlʌxix butsʼ, maʼañic miʼ mejlel lon j qʼuel am bʌ ti lon c joytilel». Miʼ bej tsictesan: «Ti ora tsaʼ c pejca lojon jiñi bomberojob i jiñi quixtañujob tsaʼ loqʼuiyob majlel ti jiñi 88 cuarto am bʌ ti jiñi otot. Jocholix jiñi otot cheʼ bʌ tsaʼ cʼotiyob jiñi bomberojob». Neckermann miʼ yʌl: «Wen wocol ti jochtesʌntel jumpʼejl colem otot ti jumpʼejl tejclum bajcheʼ Frankfurt. Jatetla wen jach tsaʼ laʼ mele, i jiñi equipo chaʼan Emergencia am bʌ la chaʼan utsʼat tsiʼ meleyob i yeʼtel». Jiñi bomberojob tsiʼ tajayob baqui an jiñi wocol i tsiʼ tojʼesayob. Maʼañic majqui tsaʼ lojwi yicʼot mach cabʌlic chuqui tsaʼ asiyi.

Tiʼ pejtelel muʼ bʌ i chaʼleñob coltaya yaʼ ti sucursal chaʼan Selters miʼ pijtañob chaʼan maʼañic ba ora mi pulel jiñi otot tac. Pero cheʼ muqʼuic i yujtel, laj chajpʌbilob come cʌntesʌbilob chaʼan miʼ yʌpob cʼajc.