Cheʼ bʌ 145 kilómetro (90 milla) tiʼ nortejlel jiñi tejclum i chaʼan Nueva York, lʌcʼʌl bʌ ti jiñi Wallkill, an lum tac cʌmbil bʌ wʌle bajcheʼ jiñi rancho Watchtower. Ilayi wʌʼʌch baqui miʼ qʼuejlel jiñi wen ñuc bʌ eʼtel chaʼan jiñi cʌntesa loqʼuem bʌ ti Biblia i chaʼan i testigojob Jehová. Jiñi ñaxam bʌ lum tsaʼ majñi cheʼ ti 2 i chaʼan enero, 1963, añix cheʼ bʌ 50 jab.

David Walker, yaʼ bʌ mucʼ ti eʼtel cʼʌlʌl cheʼ bʌ tsaʼ mʌjñi jiñi lum, miʼ yʌl chaʼan chucoch tsaʼ mʌjñi: «Come jiñi mucʼoʼ bʌ ti eʼtel yaʼ ti central mundial i chaʼan i testigojob Jehová ti Brooklyn tsaʼ caji ti ñumen ocʼan, tsaʼ caji c sʌclan lojon bajcheʼ miʼ mejlel c ñumen taj lojon jiñi bʌlñʌcʼʌl. Jiñi c organización lojon wʌn añix i chaʼan jumpʼejl rancho yaʼ ti estado i chaʼan Nueva York, pero cheʼ bʌ 6 o 8 ora i ñajtlel yaʼ ti Brooklyn. I jiñi Wallkill cʌlem jach ti 2 ora. Jiñʌch wen bʌ lum tsaʼ bʌ yajcʌnti». Ili rancho miʼ yʌqʼuen jiñi central mundial jiñi wut teʼ tac, pimel tac, weʼelʌl tac bajcheʼ wacax, chitam, mut i cheʼ jaʼel jiñi leche. I ti wiʼil tsaʼ bej mʌjñi lum tac yaʼi.

Cheʼ bʌ woli i ñumel majlel 10 jab jiñi ñuc bʌ eʼtel chaʼan i testigojob Jehová tsaʼ ñumen coli majlel i tsaʼ qʼuextʌyi jiñi eʼtel tac muʼ bʌ i mejli yaʼ ti Wallkill. Mach cojach miʼ cosʌntel mut, wacax, chitam yicʼot mach cojach miʼ pʌjqʼuel cholel tac, tsaʼ caji ti mejlel jaʼel chʼujul tac bʌ bʌlñʌcʼʌl: Jun tac loqʼuem bʌ ti Biblia muʼ bʌ caj i coltan cabʌl quixtañujob chaʼan miʼ sujtelob ti xñoptʼan cheʼ bajcheʼ tsiʼ yʌlʌ Jesús (Mateo 9:​37; Lucas 10:2; Juan 4:​35, 36). Wʌle mi caj i yʌjlel bajcheʼ tac yambʌ cʼʌjñibʌyem ili lum.

Chaʼan impresión: Cheʼ bʌ i xiñilix majlel jiñi jabil 1901 cʼʌlʌl 2000, cabʌl jun tac loqʼuem bʌ ti Biblia i chaʼan i testigojob Jehová yaʼ miʼ mejlel ti jiñi imprenta añoʼ bʌ i chaʼan yaʼ ti Brooklyn, pero cheʼ bʌ tsaʼ qʼuejli chaʼan ñumen oñix yom miʼ mejlel jiñi jun tac loqʼuem bʌ ti Biblia, tsaʼ mejli yambʌ imprenta yaʼ ti Wallkill cheʼ ti 1973. Cʼʌlʌ jiñi ora jiñi imprenta woli i bej ñuqʼuesʌntel majlel. I tsaʼ bʌ poj mejli jiñʌch cheʼ bʌ ti 2004.

Miʼ mejlel programa tac: Cheʼ ti 1979, junmojt i testigojob Jehová tsaʼ caji i melob yaʼ ti Wallkill jumpʼejl programa informático cʌmbil bʌ bajcheʼ Sistema Electrónico de Edición Plurilingüe (MEPS am bʌ i sigla ti inglés). Ti ili ora, jiñi programa MEPS miʼ mejlel i chaʼlen traducir jiñi jun tac loqʼuem bʌ ti Biblia ti 600 tʼan tac.

Miʼ yʌjqʼuel cʌntesa tac: Cheʼ ti 1988 jiñi Cʌntesʌntel loqʼuem bʌ ti Biblia i chaʼan Galaad de la Watchtower muʼ bʌ i mejlel ti wajali yaʼ ti Brooklyn tsaʼ ñusʌnti yaʼ ti Wallkill, i cheʼ ti 17 i chaʼan Octubre ti jiñi bʌ jab tsaʼ caji jiñi cʌntesa. I jinto tsaʼ chaʼ qʼuextʌyi cheʼ ti abril i chaʼan 1995, ili ora jiñi Cʌntesʌntel loqʼuem bʌ ti Biblia chaʼan Watchtower miʼ mejlel yaʼ ti Patterson (Nueva York).

Cheʼ bajcheʼ ujtem tac yicʼot jiñi yan tac bʌ rancho, ti jiñi 50 jab woli bʌ i ñumel majlel ti ili ora jiñi eʼtel tac muʼ bʌ i mejlel ti jiñi rancho Watchtower tsaʼix qʼuextʌyi. Pero wolito i chʌn mejlel jiñi tsʌts bʌ eʼtel chaʼan muʼto i chʌn pʌcʼob o miʼ cosañob jiñi bʌlñʌcʼʌl tac chaʼan jiñi yaʼ bʌ mucʼob ti eʼtel ti jiñi otot tac i chaʼan bʌ jiñi i testigojob Jehová ti Nueva York.

Ti ili ora jiñi Testigojob woliʼ melob otot tac baqui miʼ mejlelob ti chumtʌl, oficina tac yicʼot yan tac bʌ am bʌ i cʼʌjñibal yaʼ ti Wallkill. Cheʼ jaʼel, woliʼ ñumen tojʼesañob jiñi otot tac wajalix bʌ melbil. Yicʼot iliyi, jiñi rancho Watchtower mi caj i mejlel i chʌn coltan jiñi quixtañujob tsaʼix bʌ i lʌcʼtesayob i bʌ tiʼ tojlel yomoʼ bʌ i ñumen cʌñob i chaʼan bʌ Dios.

David Walker, tsaʼ bʌ ajli ti ñaxan, miʼ yʌl: «Cheʼ mij qʼuel tiʼ pejtelel chuqui tajbil bʌ ilayi ti jiñi 50 jab tsaʼix bʌ ñumi, yicʼot mij qʼuel tiʼ pejtelel jiñi eʼtel melbil bʌ chaʼan jiñi ñuc bʌ cʌntesʌntel loqʼuem bʌ ti Biblia, miʼ yʌqʼueñon c tijicñʌyel».