Ti 1987, juntiquil hermano tsaʼ bʌ i chaʼle eʼtel bajcheʼ jiñi Junmojt muʼ bʌ i pʌsob bij chaʼan i testigojob Jehová, i cʼabaʼ Lyman Swingle, tsiʼ ñusa jumpʼejl discurso tiʼ tojlel 63,580 wiñicob xʼixicob yaʼ ti plaza monumental de toros yaʼ ti Valencia (Venezuela). Cabʌlob tsiʼ chaʼleyob xʌmbal jumpʼejl acʼʌlel ti autobús chaʼan miʼ majlelob yaʼi. Tsiʼ yʌlʌ chaʼan mach junmojt jach Testigojob come wen cabʌlobix, i chaʼan lʌcʼʌlix mi caj i cʼotel ti «100,000 xsubtʼañob».

Ti jiñi jab, Venezuela an i chaʼan ñumen ti 38,000 xsubtʼañob, yom i yʌl, testigojob i chaʼan Jehová muʼ bʌ i subob jiñi wen tʼan am bʌ ti Biblia. Ti jiñi bʌ ora, cojach an 8 país ñumen bʌ ti 100,000 xsubtʼañob i chaʼan.

Jiñi i testigojob Jehová choncolix i wen pʼojlel majlel tiʼ pejtelel pañimil. Cheʼ bʌ tsaʼ ñumi jiñi Primera Guerra Mundial, mach wen cabʌlic jiñi woli bʌ i subob chaʼan jiñi Yumʌntel. Pero tsaʼ junyajl qʼuextʌyi. Jiñi Anuario de los testigos de Jehová chaʼan bʌ 1943, tsiʼ yʌlʌ: «Jiñi informe chaʼan bʌ jiñi jabil 1942 miʼ yʌcʼ ti cʌñol jiñi i bendición Jehová, anquese ili mach tsʼʌcʌlic come maxto añic bajcheʼ miʼ mejlel ti tajtʌl tiʼ pejtelel. . . , miʼ pʌs chaʼan ili ora an ñumen ti 106,000 xsubtʼañob [muʼ bʌ i subob jiñi wen tʼan] tiʼ pejtelel pañimil». Cheʼ jaʼel, cabʌl quixtañu tsaʼ sujtiyob ti Testigo anquese an jiñi Segunda Guerra Mundial. Cheʼ ti 1950, yaʼ ti Estados Unidos añix ñumen ti 100,000 xsubtʼañob.

Cheʼ ti 1974, jiñi xsubtʼañob ti Nigeria tsaʼ cʼoti ti 100,000.

Ti 1975, jiñi xsubtʼañob jaʼel yaʼ ti Brasil yicʼot Alemania tsaʼ ñumi ti 100,000. Tiʼ chʌmpʼejlel continente tsaʼ wen ocʼa majlel. Ili tsiʼ pʌsʌ chaʼan jiñi tʼan am bʌ ti Biblia miʼ pʌy tilel tiʼ pejtelel quixtañujob.

Jiñi i testigojob Jehová tsaʼ bej oñʼayob majlel tiʼ pejtelel pañimil cheʼ bajcheʼ miʼ yʌl jiñi profecía yaʼ ti Isaías 60:22, muʼ bʌ i yʌl: «Jiñi mach bʌ ñuquic mi caj i pʼojlel ti jumpʼejl mil. Jiñi jumpʼejl alʌ colonia mi caj i colel ti colem tejclum. Joñon laʼ Yumon. Mi caj c tsʼʌctesan cheʼ i yorajlelix».

Jiñi informe chaʼan jiñi jabil 2014 tsiʼ yʌlʌ chaʼan an 24 país baqui añix ñumen ti 100,000 Testigojob. Yaʼ ochem jaʼel Venezuela, come cheʼ ti 2007 añobix 100,000 xsubtʼañob. Tiʼ pejtelel pañimil an 115,416 congregación chaʼan jiñi i testigojob Jehová yicʼot 8 millón 201 mil 545 xsubtʼañob chaʼan bʌ jiñi Yumʌntel.