Yaʼ ti Botsuana an ñumen ñuc bʌ mina i chaʼan diamante tac am bʌ tiʼ petol pañimil. Pero yaʼ ti Feria del Consumidor de Botsuana, tsaʼ bʌ mejli ti 22 cʼʌlʌl ti 28 i chaʼan agosto ti 2016, jiñi i testigojob Jehová ti jiñi país tsiʼ pʌsʌyob jeʼel yambʌ utsʼatax bʌ i wen lets bʌ i tojol. Tsiʼ pʌsʌyob jiñi jun tac loqʼuem bʌ ti Biblia, tsiʼ yʌcʼʌyob ti cʌñol jiñi i página i chaʼan Internet jw.org, yicʼot tsiʼ pʌsʌyob video tac muʼ bʌ i coltan jiñi familia chaʼan jun temel miʼ yajñelob.

Jiñi tatʌlob yicʼot xbiʼtalob tsaʼ bʌ cʼoti i qʼuelob baqui an tac jiñi jun tsiʼ wen mulayob jiñi video Sujten tiʼ yamigo Jehová, muʼ bʌ i pʌs bajcheʼ miʼ mejlel laj cʼʌn jiñi principio tac am bʌ ti Biblia. Come wocol ti tajol video i chaʼan xbiʼtalob ti jiñi tʼan setsuana, cabʌl quixtañujob tsiʼ yʌlʌyob bajcheʼ miʼ mejlel i tajob jiñi video tac.

Jiñi tsaʼ bʌ cʼotiyob tilemob ti yan tac bʌ país, tsiʼ chʼʌmʌyob majlel cheʼ bʌ 10,000 jun tac loqʼuem bʌ ti Biblia yicʼot an cheʼ bʌ 120 quixtañujob tsaʼ bʌ i cʼajtiyob estudio mach bʌ tojbilic. Cabʌl tsaʼ toj sajtiyob i pusicʼal cheʼ bʌ tsiʼ qʼueleyob chaʼan juntemel yʌquelob ti eʼtel jiñi testigojob yujiloʼ bʌ tʼan ti inglés yicʼot jiñi yujiloʼ bʌ tʼan ti setsuana.

Cheʼ bʌ tsaʼ cʼoti i yorajlel chaʼan miʼ qʼuejlel majqui ñumen wen ti chajpa jiñi yom bʌ miʼ pʌstʌl, jiñi añoʼ bʌ tiʼ wenta jiñi feria tsiʼ yʌlʌyob chaʼan jiñʌch i testigojob Jehová i tsaʼ aqʼuentiyob i majtan.