Tsaʼ quila pañimil ti jumpʼejl tejclum i cʼabaʼ Ciudad Obregón, México. Nuevejon lojon i joñoñʌch jiñi i joʼticlel. Chumulon lojon tiʼ tiʼ jiñi tejclum baqui jiñi c papá miʼ cʌntan jumpʼejl rancho. Wen utsʼatax yaʼ baqui chumulon lojon, i temel an jiñi c familia yicʼot wen tijicñayon lojon. Pero cheʼ bʌ an jaxto cinco c jabilel tsaʼ ñumi jumpʼejl tsʌts bʌ icʼ jaʼal baqui tsiʼ jisa yaʼ baqui chumulon lojon, jin chaʼan tsaʼ loqʼuiyon lon majlel ti chumtʌl ti yambʌ tejclum.

 Jiñi c papá tsaʼ caji i ñumen taj majlel taqʼuin, pero cheʼ jaʼel tsaʼ caji ti wen jap lembal. Ili tsiʼ yʌcʼʌ ti wocol i ñujpuñel i joñon lojon jaʼel tsaʼ caji lon quilan wocol. Joñon yicʼot cʌscuñob tsaʼ caji lon c xujchʼiben i cigarro c papá i tsaʼ caji lon c ñucʼ. Cheʼ bʌ an jaxto seis c jabilel, tsaʼ yʌcʼayon. I mach jalic tsaʼ ñumi, jiñi c tatob tsiʼ cʌyʌyob i bʌ i joñon tsaʼ caji c ñumen mel mach bʌ weñic.

 Jiñi c mamá tsaʼ majli yicʼot yambʌ wiñic i tsiʼ pʌyʌyon lojon majlel jaʼel. Jiñi wiñic maʼañic miʼ yʌqʼuen taqʼuin c mamá, i maʼañic miʼ jastiyel jiñi taqʼuin muʼ bʌ i tsʼitaʼ taj c mamá tiʼ yeʼtel. Jin chaʼan, joñon yicʼot querañob tsaʼ cajiyon lojon ti eʼtel. Anquese mucʼoñʌch lojon ti eʼtel maʼañic miʼ jastiyel chaʼan mi lon c mʌn jiñi i cʼʌjñibal bʌ lon c chaʼan. Tsaʼ cajiyon ti eʼtel bajcheʼ xbon zapato, tsaʼ c choño pan, periódico, chicle yicʼot baqui jach bʌ eʼtel tsaʼ c mele. Cheʼ jaʼel, tsaʼ caji c sʌclan ñumel i bʌl c ñʌcʼ yaʼ baqui miʼ chocob tac i basura jiñi añoʼ bʌ i taqʼuin.

 Cheʼ bʌ an jaxto diez c jabilel, juntiquil wiñic tsiʼ subeyob troñel yaʼ baqui miʼ chojquel jiñi basura tac. Tsaʼ c jacʼʌ jiñi troñel, tsaʼ j cʌyʌ jiñi qʼuejun i tsaʼ loqʼuiyon majlel ti cotot. Diez peso jach mic tojtʌl ti jujumpʼejl qʼuin, i jiñi wiñic miʼ yʌqʼueñon j cʼux muʼ bʌ i taj yaʼ ti basura. Tsaʼ j cʼʌñʌ chuqui tac an yaʼ ti basurero chaʼan mic mel baqui mic chumtʌl. Jiñi muʼ bʌ c ñochtañob miʼ yʌlob tsucul tʼan tac yicʼot miʼ wen chaʼleñob tsʼiʼlel. Cabʌl miʼ cʼʌñob droga yicʼot miʼ wen japob lembal. Ili jiñʌch mach bʌ yoque weñic tsaʼ c ñusa. Ti jujumpʼejl acʼʌlel mic wen chaʼlen uqʼuel yicʼot bʌqʼuen. Mic wen quisñin c bʌ come maʼañic c taqʼuin yicʼot maʼañic tsaʼ c wen chaʼle clase. Lʌcʼʌl cheʼ bʌ uxpʼejl jab tsaʼ chumleyon yaʼ baqui miʼ chojquel jiñi basura. Ti wiʼil tsaʼ majliyon ti yambʌ estado, i tsaʼ cajiyon ti eʼtel baqui miʼ lojtel ñichteʼ, algodón, sicʼʌb yicʼot papas.

 Cheʼ bʌ ñumeñix cuatro jab, tsaʼ chaʼ majliyon ti Ciudad Obregón. Juntiquil c tía, yujil bʌ wujt, tsiʼ yʌqʼueyon jumpʼejl i cuartojlel i yotot chaʼan mij cʌytʌl. Tsaʼ cajiyon ti leco tac bʌ ñajal, tsaʼ c wen ubi c chʼijiyemlel i tsaʼ c ñaʼta c tsʌnsan c bʌ. Ti jumpʼejl bʌ acʼʌlel tsaʼ c melbe oración Dios i tsaʼ c sube: «C yum, mi añetʌch com j cʌñet yicʼot c melbeñet a weʼtel tiʼ pejtelel ora. Mi añʌch jiñi i sujm bʌ ñopbalʌl, com c tajeʼ».

 Cʼʌlʌ ti wajali tsaʼ c mulaj i chaʼan bʌ Dios. Anquese chutonto, tsajñon ti cabʌl iglesia, pero maʼañic tsaʼ bʌ c mulaj. Maʼañic tsiʼ wen pʌsbeyoñob chuqui miʼ yʌl jiñi Biblia, mi tsaʼicto i coltayoñob j cʌn jiñi Dios. An ñopbalʌl tac baqui cojach miʼ ñumen qʼuelob ti ñuc jiñi taqʼuin, i an yan tac bʌ baqui miʼ wen melob tsʼiʼlel.

 Cheʼ bʌ añix 19 c jabilel, juntiquil i ñoxiʼal c chich tiʼ subeyon chaʼan jiñi i testigojob Jehová tiʼ pʌsbeyob ti Biblia chuqui miʼ yʌl chaʼan jiñi imagen tac. Tiʼ pejcʌbeyon Éxodo 20:4, 5, baqui miʼ yʌl chaʼan mach yomic mi lac mel imagen tac. Yaʼ ti versículo 5 miʼ yʌl: «Mach a cʼuchchocon a bʌ tiʼ tojlelob. Mach a diosiñob, come a Yumon a Dioson. Joñon jach a Dioson». Cheʼ jiñi, jiñi i ñoxiʼal c chich tsiʼ cʼajtibeyon: «Cheʼ yomic Dios chaʼan mi laj cʼʌn jiñi imagen tac chaʼan mi lac chʼujutesan o chaʼan miʼ mel milagro tac, ¿chucoch miʼ subeñonla chaʼan mach yomic mi laj cʼʌn?». Iliyi tsiʼ yʌcʼʌyon ti pensar. Ti jiñi bʌ ora, tsaʼ caji lon c wen al temaj tac loqʼuem bʌ ti Biblia. Tsaʼ caji c mulan cheʼ bʌ mi lon j cʌl jiñi temaj tac i mach jalix miʼ ñumel jiñi ora mi cubin.

 Mach jalic tsaʼ ñumi, tsajñiyon yicʼot i ñoxiʼal c chich ti jumpʼejl tempa bʌ i chaʼan i testigojob Jehová. Tsaʼ c wen mulaj chuqui tsaʼ bʌ j qʼuele yicʼot tsaʼ bʌ c ñʌchʼta. ¡Jinto jaʼel jiñi xcolelob miʼ chaʼleñob cʌntesa ti jiñi tempa bʌ i utsʼatax bajcheʼ miʼ chaʼleñob cʌntesa! I tsaʼ c wen mulaj bajcheʼ miʼ cʌntesʌntelob jiñi muʼ bʌ i cʼotelob yaʼi. Anquese wen tam i tsutsel col tsajñiyon yicʼot mach weñic jiñi c pislel, wen uts bajcheʼ tsiʼ pejcayoñob. I cheʼ jaʼel, jumpʼejl familia tsiʼ pʌyʌyon ti cʼux waj tiʼ yotot cheʼ bʌ tsaʼ ujti jiñi tempa bʌ.

 Ti jiñi estudio tsaʼ bʌ caji i yʌqʼueñoñob jiñi i testigojob Jehová, tsaʼ j cʌñʌ chaʼan Jehová juntiquilʌch Tatʌl muʼ bʌ i cʼuxbiñonla anquese pʼumpʼuñonla, yʌñʌl i colorlel lac pʌchʌlel o maʼañic tsaʼ lac wen chaʼle clase. Dios junlajal miʼ cʼuxbiñonla (Hechos 10:34, 35). Tijicñayix tsaʼ caji cubin c bʌ come tsaʼ cʼoti j cʌn Jehová.

 Tsaʼ caji ti qʼuextʌyel majlel c melbal. Tsaʼ j cʌyʌ jiñi ñucʼ cʼujts, maʼañix tsaʼ caji c wen jap lembal yicʼot tsaʼ j cʌyʌ tsucul tʼan. Jiñi muʼ bʌ i wen acʼon ti michʼan ti ñaxan tsaʼ caji ti jilel majlel yicʼot maʼañix tsaʼ cajiyon ti leco tac bʌ ñajal. I cheʼ jaʼel, maʼañix tsaʼ caji cubin c bʌ chaʼan maʼañic j cʼʌjñibal. Cheʼ tsaʼ cubi c bʌ ti ñaxan bajcheʼ ili, tiʼ cajʌch chaʼan tsaʼ bʌ c ñusa cheʼ bʌ chutonto yicʼot chaʼan maʼañic tsaʼ c wen chaʼle qʼuejun.

 Ili ora, an wen utsʼatax bʌ quijñam muʼ bʌ i wen cʼuxbin Jehová yicʼot muʼ bʌ i wen coltañon. Añon bajcheʼ superintendente i chaʼan circuito i chaʼan jiñi i testigojob Jehová, i mic julaʼtan jiñi congregación tac chaʼan mij cʌqʼueñob i tijicñʌyel yicʼot mij cʌntesañob jiñi quermañojob tiʼ chaʼan bʌ Dios. Wocolix i yʌlʌ jiñi Biblia tsiʼ coltayon ti jiñi c wocol tac yicʼot wocolix i yʌlʌ jiñi Dios chaʼan tsiʼ yʌqʼueyon wem bʌ cʌntesa, maʼañix mij quisñin c bʌ.