Tsaʼ quila pañimil ti Canadá ti jumpʼejl tejclum i cʼabaʼ Calgary am bʌ ti Alberta. Cheʼ bʌ chutonto, jiñi c tatob tsiʼ chaʼleyob i bʌ ti divorciar, jin chaʼan joñon quicʼot c mamá tsaʼ majliyon lojon ti chumtʌl yicʼot tatuchob. Jiñi c tatuchob tsaʼʌch i wen cʼuxbiyon lojon, i joñon wen tijicña tsaʼ c ñusa. Maʼañic miʼ wis ñajʌyel c chaʼan jiñi tsaʼ bʌ c ñusa cheʼ bʌ alʌlonto.

 Cheʼ bʌ siete c jabilel wen wocol tsaʼ c ñusa, jiñi c mamá tsaʼ chaʼ ñujpuñi yicʼot jiñi c papá i tsaʼ majliyon lojon ti chumtʌl ti Estados Unidos ti jumpʼejl tejclum i cʼabaʼ San Luis, Misuri. Cheʼ jiñi, tsaʼ caji j qʼuel chaʼan jiñi c papá wen jontol. Jumpʼejl ejemplo, cheʼ bʌ cojaxto tsajñon yaʼ ti tsijiʼ bʌ quescuela i tsaʼ cʼotiyon ti cotot, jiñi c papá tsaʼ cʼoti i ñaʼtan chaʼan maʼañic chuqui tsaʼ c mele cheʼ bʌ jiñi xbiʼtalob tsiʼ jatsʼʌyoñob yaʼ ti escuela. Jin chaʼan, jiñi c papá tsaʼ wen michʼa i ñumen tsʌtsto tsiʼ jatsʼʌyon cheʼ bajcheʼ jiñi xbiʼtalob ti escuela. Tsaʼ c chʼʌmʌ ti ñuc jiñi tsaʼ bʌ ujti i siete jaxto c jabilel cheʼ tsaʼ j cʌñʌ jatsʼ yicʼot yambʌ xbiʼtalob.

 Jiñi c mamá mach tijicñayic, miʼ wen michʼan tiʼ caj wen jontol jiñi c papá i ti bele ora miʼ wen yʌʼleñob i bʌ. Cheʼ bʌ 11 jaxto c jabilel tsaʼ caji c wen cʼʌn droga yicʼot mic wen jap lembal. Cheʼ jaʼel, ti bele ora mic mulan majlel ti jatsʼ yicʼot jiñi quixtañujob ti calle. I cheʼ bʌ tsaʼ cujtesa jiñi qʼuel jun ti preparatoria, ñumen jontoloñix.

 Cheʼ tsaʼ c taja 18 c jabilel, tsaʼ ochiyon bajcheʼ soldado ti jiñi junmojt am bʌ i cʼabaʼ Cuerpo de Marines chaʼan Estados Unidos. Tsaʼ wen cʌntesʌntiyon i tsaʼ j cʌñʌ c tsʌnsan yambʌlob. Tsaʼ ñumi joʼpʼejl jab i ti wiʼil tsaʼ j cʌyʌ ajñel bajcheʼ soldado chaʼan mic majlel ti escuela i mij cʌn psicología, come tsaʼ c mulaj c chaʼlen eʼtel yaʼ ti Oficina Federal de Investigación (FBI). Tsaʼ caji j qʼueljun ti Estados Unidos i ti wiʼil yaʼ ti Canadá come tsaʼ majliyon ti chumtʌl yaʼi.

 Yaʼ ti universidad tsaʼ j qʼuele chaʼan mach weñic i melbal jiñi quixtañujob. Tiʼ pejtelelob jin jach miʼ bajñel ñaʼtañob i bʌ, maʼan chuqui wen ti pañimil i mach mejlic ti tojʼesʌntel yilal jiñi wocol tac. Tsaʼ cʼoti c ñaʼtan chaʼan mi juntiquilic quixtañu miʼ mejlel i tojʼesan ili pañimil.

 Come maʼan i sujmlel j cuxtʌlel, yaʼ jach tsaʼ majli c ñaʼtʌbal ti jiñi lembal, droga, taqʼuin yicʼot piʼleya. Jin jach mic ñaʼtan jalaqui mi caj i yujtel yambʌ qʼuiñijel yicʼot majqui bʌ xʼixic mi caj c piʼlen. Come tsaʼ wen cʌntesʌntiyon cheʼ soldadojonto mic mulan majlel baqui miʼ yujtel tac jatsʼ. Mic ñaʼtan chaʼan miʼ mejlel c bajñel yajcan chuqui wen yicʼot mach bʌ weñic i mij contrajin majqui jach miʼ yʌl chaʼan mach tojic bajcheʼ mic ñaʼtan. Pero, tiʼ sujm, tsaʼ jach ochiyon tiʼ yaj eʼtel jiñi jontolil.

 Jumpʼejl bʌ qʼuin, cheʼ bʌ yaʼañon ti yebal cotot yicʼot juntiquil camigo i woli j cʼʌn lojon droga yicʼot lon c chajpan marihuana chaʼan miʼ chojñel, jiñi camigo tsiʼ cʼajtibeyon mi joñon mic ñop Dios. Joñon tsaʼ c jacʼʌ: «Mi jiñʌch Dios muʼ bʌ i yʌcʼ chaʼan mi la quilan wocol mach com j cʌn». Tiʼ yijcʼʌlel, cheʼ cojaxto mi caj c majlel ti tsijiʼ bʌ queʼtel, juntiquil c piʼʌl ti eʼtel i testigo bʌ Jehová tsiʼ cʼajtibeyon: «¿Muʼ baʼ wʌl chaʼan jin i mul Dios cheʼ an cabʌl wocol ti pañimil?». Toj sajtel c pusicʼal chaʼan tsaʼ bʌ i cʼajtibeyon i tsaʼ c mulaj c ñumen ñaʼtan. Ti jiñi yambʌ seis uw tsaʼ bʌ ñumi, tsaʼ c wen chaʼle lojon tʼan, tsiʼ pʌsbeyon i jacʼbal muʼ bʌ i yʌcʼ jiñi Biblia chaʼan jiñi ñuc tac bʌ cʼajtiya am bʌ c chaʼan.

 Jiñi c chʼoc, chumulix bʌ quicʼot ti jimbʌ ora, maʼañic tsiʼ mulaj mic suben woli bʌ j cʌn. Jumpʼejl sábado, tsaʼ c sube chaʼan mi caj c pʌyob cʼotel ti otot jiñi Testigojob chaʼan miʼ pʌsbeñoñob chaʼan Biblia. Tiʼ yijcʼʌlel, cheʼ tsaʼ cʼotiyon ti cotot tsaʼ j qʼuele chaʼan jiñi c chʼoc tsaʼix i cʌyʌyon, tsiʼ laj chʼʌmʌ chuqui an i chaʼan i tsaʼ majli. Tsaʼ loqʼuiyon tiʼ jumpatlel cotot i tsaʼ c chaʼle uqʼuel. Tsaʼ c pejca Dios i ti wocol tʼan tsaʼ j cʼajti coltʌntel. Ti jimbʌ ora cojaxto tsaʼ j cʼʌñʌ ti oración jiñi i cʼabaʼ Dios, Jehová (Salmo 83:18).

 Tsaʼ ñumi chaʼpʼejl qʼuin i tsaʼ c teche chʼʌm estudio loqʼuem bʌ ti Biblia yicʼot jumpʼejl xñujpuñel i testigojoʼ bʌ Jehová. Cheʼ tsaʼ sujtiyob majlel, joñon tsaʼ c bej pejca jiñi libro Usted puede vivir para siempre en el paraíso en la Tierra, tsaʼ laj ujti c pejcan ti jimbʌ acʼʌlel a. Tsaʼ bʌ j cʌñʌ tiʼ tojlel Jehová yicʼot i yalobil tsaʼ cʼoti tic pusicʼal. Tsaʼ j qʼuele chaʼan Jehová yujil pʼuntaya yicʼot chaʼan cʼux miʼ yubin cheʼ mi la quilan wocol (Isaías 63:9). Tsaʼ bʌ i ñumen ñijca c pusicʼal jiñʌch i cʼuxbiya Dios yicʼot tsaʼ bʌ i mele i Yalobil tic tojlel (1 Juan 4:10). Tsaʼ cʼoti c ñaʼtan chaʼan Jehová tsiʼ pʌsʌ pijt tic tojlel «come mach yomic miʼ sajtel mi juntiquilic. Yom mi laj cʌy lac mul ti lac pejtelel» (2 Pedro 3:9). Tsaʼ cʼoti c ñaʼtan chaʼan Jehová yom cheʼ mic sujtel tiʼ yamigo (Juan 6:44).

 Ti jiñi jach bʌ semana tsaʼ cajiyon ti majlel ti tempa bʌ. Tam i tsutsel c jol yicʼot an c uyaʼ i bʌqʼuentic bajcheʼ quilalon, pero jiñi Testigojob tsiʼ qʼueleyoñob bajcheʼ juntiquil tiʼ familia añix bʌ ora maʼañic miʼ qʼuelob. Tiʼ pʌsʌyob tiʼ melbal chaʼan mucʼʌch i tsajcañob Cristo. Cheʼ bʌ chaʼ yaʼañon quicʼot c tatuchob tsaʼ cubi pero ñumen utsʼatto.

 Pejtelel woliʼ bʌ j cʌn ti Biblia tsaʼ caji i qʼuextan j cuxtʌlel. Tsaʼ c tsepe c jol, tsaʼ j cʌyʌ c mel tsʼiʼlel yicʼot tsaʼ j cʌyʌ jiñi lembal yicʼot droga (1 Corintios 6:9, 10; 11:14). Com c tijicñesʌben i pusicʼal Jehová. Jin chaʼan, cheʼ mij cʼotel j cʌn chaʼan woli c mel junchajp maʼañic bʌ miʼ mulan Jehová maʼan mic ñop j coltan c bʌ. Chʼijiyem mi cubin chaʼan woli bʌ c mel i mic suben c bʌ: «Mach yom mic chʌn mel iliyi». Ti ora mic ñop j qʼuextan c ñaʼtʌbal yicʼot c melbal. Tsaʼ caji j qʼuelben i wenlel cheʼ mi lac mel cheʼ bajcheʼ miʼ mulan Jehová. Ti 29 chaʼan julio ti 1989, cheʼ an jaxto seis uw tsaʼ caji c pejcan jiñi Biblia, tsaʼ c chʼʌmʌ jaʼ bajcheʼ i testigo Jehová.

 Jiñi Biblia tsiʼ coltayon j qʼuextan c melbal. Ti wajali, mi tsaʼ c taja muʼ bʌ i contrajiñon mic pʌs jontolil. Pero wʌle mic chaʼlen wersa chaʼan ñʌchʼʌl mi cajñel yicʼot pejtelel wiñicob xʼixicob (Romanos 12:18). Pejtelel iliyi mach joñoñic tsaʼ c mele, jiñʌch Jehová tsaʼ bʌ i coltayon, jiñi Tʼan yicʼot jiñi chʼujul bʌ i yespíritu (Gálatas 5:22, 23; Hebreos 4:12).

 Mach i yaj eʼteloñix jiñi droga, jontolil yicʼot tsʼiʼlel, wʌle mic chaʼlen wersa c tijicñesan Jehová i mi cʌqʼuen ñumen wen bʌ tij cuxtʌlel. Junchajp bajcheʼ mic mel jiñʌch cheʼ mij coltan yambʌlob chaʼan mi cʼotel i cʌñob. Cheʼ bʌ añix chaʼpʼejl uxpʼejl jab tsaʼ c chʼʌmʌ jaʼ, tsaʼ majliyon ti subtʼan ti yambʌ país chaʼan mic chaʼlen coltaya baqui anto yom cabʌl xsubtʼañob. Ti pejtelel jiñi jabil tac ñumeñix bʌ, an j cʌntesa yambʌ quixtañujob yicʼot an j qʼuele bajcheʼ jiñi Biblia an i coltayob i weñʼesañob i cuxtʌlel. Miʼ yʌqʼueñon c tijicñʌyel jaʼel cheʼ jiñi c mamá tsaʼ sujti tiʼ testigo Jehová, junchajp tsaʼ bʌ i colta jiñʌch cheʼ tsiʼ qʼuele bajcheʼ tsaʼ qʼuextʌyi c melbal.

 Ti 1999, yaʼ ti El Salvador tsajñon ti jiñi Cʌntesʌntel chaʼan xsubtʼañob chaʼan bʌ i Yumʌntel Dios. Ili escuela tsiʼ coltayon i tsiʼ chajpayon chaʼan mij qʼuel jiñi eʼtel ti subtʼan yicʼot chaʼan wen mij cʌntan jiñi congregación. Ti wiʼil, ti jin jach bʌ jabil, tsaʼ ñujpuñiyon yicʼot jiñi cʼuxbibil bʌ quijñam Eugenia. Ti lon c chaʼticlel ochemon lojon bajcheʼ precursor i mic melben lon i yeʼtel Dios yaʼ ti Guatemala.

 Wʌle, mach chʌn chʼijiyemoñix chaʼan maʼañic i sujmlel j cuxtʌlel, tiʼ sujm wen tijicñayon. Cheʼ tsaʼ c jacʼʌ muʼ bʌ i yʌl jiñi Biblia tsiʼ coltayon j cʌy jiñi jontolil yicʼot tsʼiʼlel i tsiʼ yʌqʼueyon jumpʼejl utsʼatax bʌ cuxtʌlel, tsaʼ c taja i sujm bʌ cʼuxbiya yicʼot ñʌchʼtʌlel.