Cabʌl quixtañujob ñajt bʌ chʼoyolob miʼ cʼotel i qʼuelob jiñi cascada tac am bʌ tiʼ tʼejl jiñi tejclum Pagsanján, ti Filipinas. Jiñi c papá, Nardo Leron, yaʼ tsaʼ coli ti ili tejclum baqui wen an pʼumpʼuñiyel. Tsaʼ sujti ti juntiquil wiñic michʼicña bʌ tiʼ pejtelel ora come tsiʼ wen qʼuele bajcheʼ mucʼob ti lot jiñi yumʌlob, policíajob yicʼot yaʼ baqui tsiʼ chaʼle eʼtel.

 Jiñi c tatob tsʌts tsiʼ chaʼleyob eʼtel chaʼan miʼ mejlelob i cosan waxʌctiquil i yalobilob. Ti bele ora añob ti mateʼel i yaʼʌch miʼ ñusañob cabʌl qʼuin chaʼan miʼ cʌntañob i pʌcʼʌb, bajcheʼ arroz o yan tac bʌ. An i tajol, joñon quicʼot queran Rodelio mij cʌntan lojon jiñi quijtsʼiñob, i an qʼuiñil mi lon c ñusan wiʼñal. Anquese chutonto lojon, maʼañic mi lon c wen chaʼlen alas. Cheʼ an jaxto 7 c jabilel, muqʼuix lon c majlel ti eʼtel yaʼ ti pʌcʼʌbʌl. Mic chʼʌm lon majlel al bʌ lon j cuch bajcheʼ coco ti wen waʼal tac bʌ wits. Mi maʼañic miʼ mejlel lon c lʌtʼ, mic xijqʼuel lojon chaʼan mij quipan lon majlel.

 Jiñi c papá tsaʼʌch i wen jatsʼʌyon lojon, pero ñumen lecoj bʌ tsaʼ lon j qʼuele jin cheʼ miʼ jatsʼ jiñi c mamá. An qʼuiñil tsaʼ c ñopo lon c mʌctan, pero ñumen pʼʌtʌl bajcheʼ joñon lon. Jin chaʼan, joñon quicʼot Rodelio tsaʼ lon c ñaʼta chaʼan cheʼ ba ora ñucoñix lojon mi caj lon c tsʌnsan jiñi c papá. Tiʼ sujm, tsaʼ c mulaj cheʼ añic juntiquil lon c tat yujil bʌ cʼuxbiya.

 Tsiʼ wen michʼesayon jiñi i melbal c papá, jin chaʼan tsaʼ loqʼuiyon majlel ti cotot cheʼ an jaxto 14 c jabilel. Tsaʼ jumucʼ chumleyon ti calle yicʼot tsaʼ c teche c ñucʼ cʼujts. Ti wiʼil, tsaʼ c chaʼle eʼtel ti ñijca lancha chaʼan mic pʌy majlel jiñi quixtañujob yaʼ ti cascada tac.

 Mach cabʌlic jab tsaʼ ñumi, tsaʼ ochiyon ti jiñi universidad am bʌ ti Manila. Pero maʼañic mic wen tajben i yorajlel come mic majlel ti eʼtel ti Pagsanján cheʼ tiʼ yujtibal semana. Maʼañic i sujmlel jiñi j cuxtʌlel, jiñi cʼujts maʼañic miʼ coltañon c taj c ñʌchʼtʌlel. Jin chaʼan, tsaʼ c teche j cʼʌn yambʌ droga tac bajcheʼ metanfetamina, cocaína yicʼot heroína. Tiʼ caj jiñi droga tsaʼ c teche c mel tsʼiʼlel. Tic joytʌlel an jach pʼumpʼuñiyel, mach bʌ tojic yicʼot ilaya wocol tac. Tsaʼ c tsʼaʼle jiñi yumʌlob i tsaʼ c ñaʼta chaʼan jiñobʌch i mul cheʼ an cabʌl wocol. Tsaʼ c wen cʼajtibe Dios: «¿Chucoch cheʼ yilal pañimil bajcheʼ iliyi?». Pero maʼañic tsaʼ c tajbe i jacʼbal, anquese tsajñon ti cabʌl ñopbalʌl. Cheʼ jiñi, tsaʼ c teche c ñumen cʼʌn jiñi droga chaʼan maʼañic chuqui mic ñaʼtan.

 Ti 1972, jiñi xqʼueljuñob ti Filipinas tsaʼ cajiyob ti marcha tiʼ contra yumʌlob. Tsaʼ j cʌcʼʌ j coltaya jaʼel, pero tsaʼ jach i ñumen teche leto. Cabʌl tsaʼ bʌ otsʌntiyob ti cárcel, i cheʼ ñumeñix chaʼpʼejl uxpʼejl uw, yaʼ ti país tsaʼ ajqʼui jumpʼejl mandar chaʼan jiñi policíajob miʼ melob chuqui yom melol chaʼan miʼ ñʌchʼchocoñob jiñi wocol.

 Tsaʼ chaʼ majliyon ti chumtʌl ti calle, pero añix c bʌqʼuen chaʼan jiñi policíajob an chuqui miʼ tumbeñoñob tiʼ caj tsaʼ bʌ c mele. Chaʼan miʼ bej mejlel c mʌn jiñi droga tac, tsaʼ cajiyon ti xujchʼ i tsaʼ caji c chon c bʌ yicʼot jiñi añoʼ bʌ i taqʼuin yicʼot ñajt bʌ chʼoyolob. Mach c wentajic mi tsaʼ chʌmiyon.

 Jiñi c mamá yicʼot juntiquil quijtsʼin tsaʼ cajiyob ti estudio yicʼot jiñi i testigojob Jehová. Jiñi c papá tsaʼ wen michʼa i tsiʼ pulu pejtelel jiñi jun tac añoʼ bʌ i chaʼan. Pero tsaʼʌch i cuchuyob ili wocol i tsaʼ ochiyob bajcheʼ i testigojob Jehová.

 Ti jumpʼejl bʌ qʼuin, juntiquil Testigo tsiʼ pʌsbe c papá jiñi pijtaya chaʼan ti talto bʌ qʼuin luʼ tojix chuqui mi caj i mejlel ila ti pañimil (Salmo 72:12-​14). Ili tsiʼ wen mulaj jiñi c papá, jin chaʼan tsiʼ chaʼle wersa i cʌn chuqui miʼ yʌl jiñi Biblia. Tsaʼ cʼoti i ñaʼtan chaʼan Dios mi caj i waʼchocon toj bʌ yumʌl, yicʼot jaʼel, chuqui miʼ pijtan tiʼ tojlel juntiquil ñoxiʼalʌl yicʼot tatʌl (Efesios 5:​28; 6:4). Ti wiʼil, jiñi c papá yicʼot yambʌ querañob tsaʼ sujtiyob ti Testigo. Pejtelel iliyi maʼañic tsaʼ cubi come ñajt añon baʼan c familia.

 Ti 1978, tsaʼ majliyon ti chumtʌl ti Australia. Anquese wem bʌ tejclum, maʼañic tsaʼ c taja c ñʌchʼtʌlel. Tsaʼ caji c bej jap lembal yicʼot j cʼʌn droga tac. Cheʼ jaʼel, ti ili jabil, jiñi Testigojob tsaʼ cʼoti i julaʼtañoñob. Tsaʼ c wen mulaj cheʼ tsiʼ pʌsbeyoñob ti Biblia chaʼan miʼ cajel ñʌchʼtʌlel ila ti pañimil, pero wocol tsaʼ cubi chaʼan mic ñopbeñob.

 Tsaʼ ñumi i yorajlel, i tsaʼ chaʼ majliyon chaʼpʼej uxpʼejl semana ti Filipinas. Jiñi querañob tiʼ subeyoñob chaʼan jiñi c papá woli ti wersa chaʼan miʼ pʌs wem bʌ i melbal, pero mach comic j qʼuel tsaʼ cubi come jiñi c michʼajel yaʼto an tic pusicʼal.

 Jiñi quijtsʼin saj xchʼoc bʌ tiʼ tsictesʌbeyon yicʼot jiñi Biblia chucoch cabʌl wocol yicʼot mach bʌ tojic ila ti pañimil. Toj sajtel c pusicʼal tsaʼ cubi cheʼ juntiquil saj xchʼoc maxto bʌ añic chuqui wen chumtʌbil i chaʼan yujilix i jacʼbal jiñi j cʼajtiya tac. Cheʼ bʌ chaʼ sujtelix mucʼon, jiñi c papá tsiʼ yʌqʼueyon jiñi libro Usted puede vivir para siempre en el paraíso en la Tierra. a Tsiʼ subeyon: «Cʌyʌx a sʌclan. Ili libro mi caj i coltañet a taj woli bʌ a sʌclan». Tsiʼ ñijca c pusicʼal chaʼan cheʼ mij cʼotel ti Australia, mic sʌclan jiñi i testigojob Jehová.

 Tsaʼʌch c jacʼʌ tsaʼ bʌ i subeyon c papá, i tsaʼ c taja jumpʼejl i Yotlel Tempa bʌ lʌcʼʌl yaʼ ti cotot, ti Brisbane. Tsaʼ c chʼʌmʌ jumpʼejl estudio. Yaʼ ti profecía tac am bʌ ti Biblia bajcheʼ yaʼ ti capítulo 7 i chaʼan Daniel yicʼot jiñi capítulo 9 i chaʼan Isaías tsaʼ j cʌñʌ chaʼan jiñi i Yumʌntel Dios, baʼ miʼ mejlel chuqui toj, mi caj i yumañonla ti talto bʌ qʼuin. Tsaʼ j cʌñʌ jaʼel chaʼan Dios lʌcʼʌlix mi caj i sujtesan ti jumpʼejl paraíso ili Pañimil. Com bʌ jiñʌch chaʼan Dios miʼ chʼʌmon ti ñuc, pero yomʌch mic tojʼesan c melbal, mij cʌy jiñi droga, jiñi lembal yicʼot jiñi bibiʼ jax bʌ c ñusaqʼuin ti tsʼiʼlel. Tsaʼ j cʌyʌ jiñi xʼixic chumul bʌ quicʼot yicʼot jiñi mach bʌ weñic chuqui tac mic mulan. Cheʼ woli c ñumen ñop Jehová, mij cʼajtiben i coltaya chaʼan miʼ ñumen weñʼan jiñi c melbal.

 Xucʼu xucʼul tsaʼ cʼoti c ñaʼtan chaʼan jiñi i sujmlel woli bʌ j cʌn mucʼʌch i qʼuextan juntiquil quixtañu. Jiñi Biblia miʼ yʌl chaʼan mi mucʼʌch lac chaʼlen wersa miʼ mejlel lac xoj jiñi ‹tsijiʼ bʌ lac pusicʼal› (Colosenses 3:​9, 10). Cheʼ bʌ woli c chaʼlen wersa chaʼan mij qʼuextan c melbal, tsaʼ cʼoti c ñaʼtan chaʼan tajol i sujmʌch cheʼ jiñi querañob tiʼ subeyoñob chaʼan jiñi c papá tsaʼix i qʼuexta i melbal. Mach comix c chʌn michʼ qʼuel yicʼot c tsʼaʼlen, comix chaʼ utsʼan quicʼot tsaʼ cubi. Cheʼ jiñi, tsaʼ c ñusʌbe pejtelel chuqui tsiʼ mele yicʼot tsaʼ c choco loqʼuel pejtelel jiñi c michʼajel tsaʼ bʌ c loto cʼʌlʌl cheʼ bʌ chutonto.

 Cheʼ bʌ xcolelonto tsaʼ c mulaj c tsajcʌben i melbal jiñi jontoloʼ bʌ. Jiñi ticʼojel am bʌ ti Biblia i sujmʌch come mach weñic bajcheʼ tsaʼ ujtiyon tiʼ caj jiñi camigojob mach bʌ weñobic i melbal (1 Corintios 15:33). Pero tsaʼ c taja wem bʌ camigojob i testigojoʼ bʌ Jehová tsaʼ bʌ i coltayoñob chaʼan mic sujtel ti wem bʌ quixtañu. Yaʼʌch tsaʼ j cʌñʌ jiñi cʼuxbibil bʌ quijñam, i cʼabaʼ Loretta. Ti lon c chaʼticlel mij cʌntesan lon jiñi quixtañujob chaʼan jiñi Biblia miʼ mejlel i coltañob.

 Maʼañic tsaʼ c wis ñaʼta chaʼan tiʼ coltaya jiñi Biblia, jiñi c papá miʼ mejlel ti sujtel ti juntiquil wem bʌ ñoxiʼal yicʼot ti juntiquil pecʼ bʌ yicʼot uts bʌ xñoptʼan. Tsaʼ c chʼʌmʌ jaʼ bajcheʼ i testigo Jehová ti 1987, yaʼʌch baqui tsaʼ j qʼuele lon c bʌ i tsiʼ meqʼueyon, jiñi cojaxto bʌ cʼajal bʌ c chaʼan tsiʼ mele.

 Jiñi c papá yicʼot c mamá, ñumen ti 35 jab tiʼ subuyob jiñi wen tʼan am bʌ ti Biblia. Jiñi c papá tsaʼ cʌjñi bajcheʼ juntiquil wem bʌ wiñic, yujil bʌ eʼtel yicʼot muʼ bʌ i coltan yambʌlob. Ti wiʼil, tsaʼ cʼoti j qʼuel ti ñuc yicʼot tsaʼ j cʼuxbi. Wen tijicña tsaʼ cubi cheʼ i yalobilon. Jiñi c papá tsaʼ chʌmi ti 2016, pero mic wen cʼajtesan i cujil chaʼan ti lon c chaʼticlel tsaʼ lon c chaʼle wersa tiʼ jacʼol jiñi principio am bʌ ti Biblia yicʼot mij qʼuextan lon c melbal. Maʼañix mi wistʌlic tic pusicʼal jiñi michʼajel muʼ bʌ cubin ti ñaxan. Wen tijicñayon cheʼ tsaʼ c taja jiñic Tat am bʌ ti panchan, Jehová, muʼ bʌ i yʌcʼ i tʼan chaʼan mi caj i jisan jiñi wocol tac am bʌ ti cabʌl familia.