Cheʼ ti 2011, juntiquil xputsʼel am bʌ ti Eritrea tsaʼ cʼoti ti Noruega. Cheʼ tsiʼ tajayob i testigojob Jehová, jiñi wiñic tiʼ subeyob tsaʼix i cʌñʌ jiñi Testigojob yaʼ tiʼ país. Tiʼ subeyob chaʼan cheʼ ochem bajcheʼ soldado tsiʼ qʼueleyob bajcheʼ tsaʼ ochiyob ti cárcel chaʼan i ñopoñelob. Anquese tsaʼ wen ticʼlʌntiyob, maʼañic tsiʼ jacʼʌyob ochel bajcheʼ soldado.

 Cabʌl chuqui tac tsaʼ ujti i jiñi wiñic tsaʼ ochi ti cárcel. Yaʼ tsiʼ cʌñʌ Paulos Eyasu, Negede Teklemariam yicʼot Isaac Mogos, uxtiquil testigojob añoʼ bʌ ti cárcel cʼʌlʌl ti 1994 chaʼan i ñopoñelob.

 Cheʼ bʌ yaʼan ti cárcel, jiñi wiñic tsiʼ qʼuele chaʼan jiñi Testigojob miʼ melob cheʼ bajcheʼ mucʼob ti cʌntesa yic’ot i sujmʌch muʼ bʌ i melob. Tsiʼ wen mulaj chaʼan miʼ tʼoxbeñob chuqui miʼ cʼuxob jiñi yaʼ bʌ añoʼ bʌ ti cárcel. Cheʼ jaʼel , miʼ chajpañob i Biblia ti jujumpʼejl qʼuin i miʼ suben yambʌlob chaʼan miʼ comol qʼuelob. Jiñi Testigojob miʼ mejlelob ti loqʼuel ti cárcel cheʼ miʼ yʌcʼob i firma ti jiñi jun baqui miʼ pʌsob chaʼan mach Testigojobix, pero maʼañic tsiʼ meleyob.

 Toj sajtel i pusicʼal chaʼan tsaʼ bʌ i qʼuele. Jin chaʼan, cheʼ bʌ tsaʼ cʼoti ti Noruega, tsaʼ caji i sʌclan chucoch jiñi i testigojob Jehová wen pʼʌtʌlob i ñopoñel. Cheʼ bʌ jiñi Testigojob tsiʼ tajayob, tsaʼ caji i chajpan Biblia yicʼot ti majlel ti tempa bʌ.

 Tsaʼ ochi bajcheʼ Testigo cheʼ ti septiembre ti 2018. Jin chaʼan, miʼ tsictesʌbeñob jiñi quixtañujob ti Eritrea yic’ot Sudán. Miʼ yʌqʼueñob estudio loqʼuem bʌ ti Biblia chaʼan miʼ pʼʌtañob i ñopoñel ti Dios.