Cheʼ bʌ Zarina tiʼ chʼʌmʌ jaʼ i tsaʼ sujti bajcheʼ i testigo Jehová chumul ti Rusia. Cheʼ jiñi, tsaʼ sujti ti Asia Central i lumal bʌ ti wajali. Tsaʼ cʼoti i ñaʼtan chaʼan yomʌch miʼ cʌntesan jiñi chaʼtiquil yixicʼal ti jiñi cʌmbil bʌ i chaʼan ti Biblia. Come mach wen cabʌlic i taqʼuin, tsaʼ majli ti chumtʌl yicʼot i tat, i yeran yicʼot i cuñada ti jumpʼejl chut bʌ otot. I tat jiñi Zarina tiʼ sube chaʼan maʼañic miʼ cʌntesan i yixicʼalob tiʼ chaʼan bʌ Dios, i jiñi xchʼocob jaʼel tsaʼ subentiyob chaʼan maʼañic miʼ yʌlob i chaʼan bʌ ñopbalʌl yicʼot i mamá.

 Zarina tsiʼ cʼajtibe i bʌ bajcheʼ miʼ mejlel i coltan i yixicʼalob chaʼan miʼ cʌñob Jehová (Proverbios 1:8). Jin chaʼan tsiʼ cʼajtibe Dios ti wocol tʼan chaʼan miʼ coltan yicʼot miʼ yʌqʼuen i ñaʼtʌbal. Cheʼ jiñi, tsiʼ pʌyʌ loqʼuel ti xʌmbal i yixicʼalob i tsaʼ caji i suben melbil tac bʌ i chaʼan Dios. Cheʼ tsaʼ loqʼuiyob ti xʌmbal tsiʼ coltayob chaʼan miʼ ñumen mulañob i cʌn jiñi tsaʼ bʌ i luʼ mele chuqui an.

 Cheʼ jiñi Zarina tsaʼ cʼoti i ñaʼtan bajcheʼ miʼ ñumen mejlel i cʼʌn jiñi libro ¿Chuqui miʼ cʌntesañonla tiʼ sujmlel jiñi Biblia? a Chaʼan miʼ coltan i yixicʼalob. Jiñi párrafo tac yicʼot cʼajtiya tac miʼ ñusan ti alʌ jun i miʼ tsʼijbun chuqui yom i yʌl chaʼan mi cʼotel i ñumen chʼʌmbeñob i sujm. Cheʼ jaʼel, yaʼ ti baño miʼ muqueʼ jiñi alʌ jun yicʼot juntsʼijt lápiz tiʼ yebal jumpʼejl lavadora. Cheʼ bʌ i yixicʼalob miʼ yochelob ti baño, miʼ pejcañob jiñi alʌ jun i miʼ tsʼijbubeñob i jacʼbal.

 Cheʼ bajcheʼ iliyi, Zarina tsaʼ mejli i pejcan yicʼotob chaʼpʼejl capítulo am bʌ ti jiñi libro ¿Chuqui miʼ cʌntesañonla tiʼ sujmlel jiñi Biblia? Cheʼ bʌ muʼto caj i majlelob ti bajñel chumtʌl. Cheʼ tsaʼ ujti bajcheʼ jiñi maʼañix majqui tsiʼ mʌcta chaʼan miʼ cʌntesan. Ti octubre chaʼan 2016, i yixicʼalob Zarina tsiʼ chʼʌmʌyob jaʼ i miʼ wen aqʼueñob wocolix i yʌlʌ i ñaʼ chaʼan tiʼ sʌcla bajcheʼ miʼ pʌsbeñob i sujmlel am bʌ ti Biblia.