Ti jimbʌ qʼuin woli jaʼal, an tsʌñal yicʼot cabʌl icʼ yaʼ ti Alberta (Canadá). Bob woliʼ ñijcan majlel i carro ti 100 kilómetro, cheʼ bʌ tsaʼ tojmi jiñi i llanta am bʌ tiʼ pat. Come Bob mach yujilic chuqui tsaʼ ujti, tsiʼ bej xʌñʌ jiñi 5 kilómetro yomto bʌ chaʼan miʼ cʼotel tiʼ yotot.

 Ti jumpʼejl carta tsaʼ bʌ i choco majlel tiʼ Yotlel Tempa am bʌ yaʼi, tiʼ tsictesa chuqui tsaʼ ujti, tiʼ tsʼijbu: «Jumpʼejl carro baqui woliʼ majlelob joʼtiquil chʼitoñob, tsiʼ lʌcʼtesa i bʌ i tsiʼ yʌcʼʌyob i bʌ tic tʼejl. Tsiʼ juʼsayob i ventanajlel i carro i tiʼ subeyoñob chaʼan mach weñic an jumpʼejl i llantajlel jiñi j carro. Tsaʼ waʼleyon lojon ti junwejlel jiñi carretera i tsiʼ yʌlʌyob miʼ caj i coltañoñob. Mi cujilicto mi an c chaʼan yambʌ llanta yicʼot muʼ bʌ i cʼʌjñel chaʼan mi laj qʼuextan jumpʼejl. Yaʼ jach tic silla de rueda tsaʼ j qʼuele bajcheʼ tsiʼ luʼ sʌclayob i tiʼ qʼuextayob jiñi llanta. Wen an tsʌñal, i woliʼ yajlel hielo, anquese wen jach i pislelob tsaʼʌch i coltayoñob chaʼan mic mejlel ti cʼotel ti cotot. Mach c ñaʼta chuqui tsaʼ c mele cheʼ machic tsiʼ coltayoñob».

 Tiʼ carta Bob miʼ bej al: «Mic wen aqʼueñob wocolix i yʌlʌ jiñi joʼtiquil chʼiton Testigojoʼ bʌ tsaʼ bʌ i coltayoñob. Woli i julaʼtañob jiñi quixtañujob chaʼan miʼ subeñob wen tʼan. Tiʼ sujm, jiñi i melbalob miʼ pʌs chaʼan i sujmʌch muʼ bʌ i yʌlob. Tsiʼ coltayoñob ti jumpʼejl wocol mach bʌ añic tsaʼ mejli c tojʼesan tic bajñelil. Tiʼ sujm, wen wocolix laʼ wʌlʌ. ¡Mach ñaʼtʌbil c chaʼan mi ti jimbʌ qʼuin mi caj cʼotel c tajob ili ángelob yaʼ ti carretera!».