Danielle, juntiquil xchʼoc i testigo bʌ Jehová chumul bʌ ti Sudáfrica, tsiʼ taja jumpʼejl mochila yaʼ baqui miʼ chojñel cajpeʼ, an majqui tsaʼ ñajʌyi i chaʼan. Yaʼ ti mochila an jumpʼejl cartera am bʌ i taqʼuinlel yicʼot tarjeta de crédito. Come Danielle yom i sutqʼuin jiñi mochila, tiʼ sʌcla jumpʼejl dirección o número chaʼan teléfono, pero cojach tsiʼ taja i cʼabaʼ juntiquil wiñic. Tsiʼ ñopo i sʌclan jiñi wiñic i tsiʼ chaʼle tʼan ti banco, pero maʼan tsaʼ mejli i taj. Cheʼ jiñi tsiʼ qʼuele chaʼan yaʼ ti mochila an jumpʼejl receta i tsiʼ pejca jiñi número yaʼ bʌ tsʼijbubil, jiñʌch i teléfonojlel i consultorio juntiquil doctor. Jiñi xchʼoc yaʼ bʌ miʼ chaʼlen eʼtel tiʼ sube Danielle chaʼan mi caj i yʌqʼuen jiñi wiñic jiñi i número.

 Toj sajtel i pusicʼal jiñi wiñic cheʼ bʌ tsaʼ subenti chaʼan an majqui tsiʼ tajbe i mochila i chaʼan yom i sutqʼuiben. Cheʼ bʌ tsaʼ majli i lot, yaʼan Danielle yicʼot i papá. Tsiʼ subeyob chucoch tsiʼ wen sʌclayob. Come i testigojob Jehová miʼ chaʼleñob wersa i jacʼob muʼ bʌ i yʌl jiñi Biblia, jin chaʼan wen ñuc miʼ qʼuelob cheʼ miʼ melob chuqui utsʼat (Hebreos 13:18).

 Cheʼ ñumeñix chaʼpʼejl uxpʼejl hora, jiñi wiñic tsiʼ chocbeyob majlel jumpʼejl mensaje jiñi Danielle yicʼot i papá chaʼan miʼ subeñob wocolix i yʌlʌ chaʼan tsaʼ bʌ i meleyob. Tiʼ tsʼijbu: «Wen wocolix laʼ wʌlʌ cheʼ tsaʼ laʼ chaʼle wersa laʼ sʌclañon. Wen tijicña cheʼ tsaʼ j cʌñʌyetla. Ti pejtelel ora mi caj cʼajtesan jiñi utslel tsaʼ bʌ laʼ pʌsʌ tic tojlel, com c majtan aqʼueñetla taqʼuin chaʼan mic pʌs chaʼan mi cʌqʼueñetla wocolix laʼ wʌlʌ. Cujil chaʼan cabʌl chuqui mi laʼ mel chaʼan mi laʼ tsʼʌctesan jiñi eʼtel tsaʼ bʌ i yʌqʼueyetla Dios. Jin chaʼan, mic chaʼ subeñetla wen wocolix laʼ wʌlʌ. Laʼ i yʌqʼueñetla i bendición Dios ti jiñi laʼ weʼtel».

 Ti wiʼil, cheʼ ñumeñix chaʼpʼejl uxpʼejl uw, jiñi wiñic tsiʼ chaʼ pejca i papá Danielle i tiʼ sube tsaʼ bʌ ujti tiʼ tojlel maxto wen jalic. Jumpʼejl bʌ qʼuin cheʼ woli ti mʌñoñel tsiʼ taja jumpʼejl monedero tsaʼ bʌ yajli ti piso. Tiʼ sʌclʌbe i yum, i cheʼ bʌ tsiʼ sutqʼuibe i monedero jiñi xʼixic tsiʼ sube chucoch cheʼ tsiʼ mele. Jiñʌch come maxto wen jalic cheʼʌch tsaʼ ujti tiʼ tojlel jaʼel. Tsiʼ yʌlʌ: «Cheʼ an majqui miʼ mel chuqui utsʼat i miʼ pʌsbeñonla i yutslel miʼ ñijcañonla chaʼan cheʼ mi lac mel jaʼel, bajcheʼ jiñi ñumen utsʼat chumulonla».