Irma, chumul ti Alemania i lʌcʼʌ añix 90 i jabilel. Come añix i ñusa chaʼpʼejl accidente i chʼʌmbilix i chaʼan cabʌl operación, maʼañix miʼ mejlel ti loqʼuel ti subtʼan ti otot tac cheʼ bajcheʼ ti wajali. Wʌle, Irma miʼ tsʼijbuben carta i familiajob yicʼot i cʌñʌyoʼ bʌ, chaʼan miʼ suben jiñi ñopol bʌ i chaʼan. Cabʌl miʼ mulañob jiñi i carta chaʼan miʼ ñuqʼuesʌbentelob i pusicʼal jin chaʼan miʼ cʼajtibeñob jala mi caj i chocbeñob majlel yambʌ. Miʼ chʼʌm jun tac baqui miʼ subeñob wocolix i yʌlʌ tiʼ tojlelob jiñi quixtañujob muʼ bʌ i cʼajtibeñob chaʼan miʼ chaʼ tsʼijbuben. Irma mi yʌl: «Pejtelel iliyi mi yʌqʼueñon c tijicñʌyel i mi yʌcʼon chaʼan mic bej chaʼlen subtʼan».

 Irma miʼ tsʼijbun carta chaʼan jiñi yaʼ bʌ chumulob baqui miʼ cʌntʌntel jiñi ñoxobix bʌ. Miʼ yʌl: «Juntiquil xʼixic añix bʌ i jabilel tsiʼ pejcayon i tiʼ subeyon chaʼan jiñi carta tsiʼ wen colta cheʼ tsaʼ chʌmi i ñoxiʼal. Miʼ lot jiñi carta tiʼ malil jiñi Biblia i miʼ pejcan cheʼ ti ochʼajel qʼuin. Yambʌ xʼixic, tsaʼ jaxto bʌ chʌmi i ñoxiʼal, tsiʼ yʌlʌ chaʼan jiñi j carta tsiʼ colta ñumento bajcheʼ jiñi muʼ bʌ i yʌl jiñi sacerdote. Cabʌl chuqui yomto bʌ i ñaʼtan i tsiʼ cʼajtibeyon mi mucʼʌch i mejlel i julaʼtañon».

 Juntiquil i cʌñʌ bʌ Irma mach bʌ Testigojic tsaʼ majli ti chumtʌl ti yambʌ tejclum i tiʼ sube chaʼan miʼ chocben majlel carta. Irma miʼ tsictesan: «Jiñi xʼixic miʼ lot pejtelel j carta. Cheʼ tsaʼ chʌmi, i yixicʼal tsiʼ pejcayon. Tsiʼ subeyon chaʼan tiʼ pejca pejtelel jiñi carta tsaʼ bʌ c tsʼijbube i mamá i tsiʼ cʼajtibeyon chaʼan mic tsʼijbuben carta loqʼuem bʌ ti Biblia jaʼel».

 Irma miʼ wen mulan subtʼan ti carta. Miʼ yʌl: «Mij cʼajtiben Jehová chaʼan mi yʌqʼueñon c pʼʌtʌlel chaʼan mic melben i yeʼtel. Anquese maʼañix mic majlel ti otot tac, mic mel pejtelel chuqui jach mic mejlel».