Ong-Li jiñʌch juntiquil xʼixic i testigo bʌ Jehová chumul bʌ ti Bulgaria. Tsi’ yʌqʼue estudio loqʼuem bʌ ti Biblia juntiquil xʼixic xcʼalʌlto bʌ i cʼabaʼ Zlatka, ñujpuñem bʌ yic’ot juntiquil wiñic maʼan bʌ miʼ qʼuel ti ñuc jiñi cʌntesʌntel. Ong-Li miʼ yʌl: «Cheʼ bʌ tsaʼ c taja lon ti tʼan chaʼan bʌ jiñi familia, tiʼ sube jiñi Zlatka chaʼan ñuc i cʼʌjñibal cheʼ miʼ lac suben jiñi lac ñoxiʼal yic’ot la calobilob chaʼan mi laj cʼuxbiñob. Pero wen ch’ijyemtic ti’ qʼueleyon cheʼ bʌ ti subon maʼan baʼ i sube i ñoxiʼal yic’ot i yixicʼal chaʼan mi cʼuxbiñob».

 Zlatka ti’ yʌlʌ: «Joñon miʼ mejlel j coltan jiñi c familia ti chuqui jach, pero wen wocol mij cubin mi cʌl jiñi t’an». Tsiʼ yʌlʌ jaʼel: «Jiñi c ñaʼ maʼan baqui ora an i subeyon chaʼan miʼ cʼuxbiñon yic’ot jiñi j coʼ maʼan ba ti sube jiñi c ñaʼ chaʼan miʼ cʼuxbin». Cheʼ jiñi, Ong-Li tiʼ pʌsbe jiñi Zlatka ya’ ti Biblia chaʼan Jehová an i yʌlʌ ti cʼam bʌ tʼan chaʼan miʼ cʼuxbin Jesús (Mateo 3:17). Jin chaʼan, ti wen bʌ tʼan tiʼ sube chaʼan miʼ cʼajtiben i coltaya Jehová yic’ot chaʼan mi yʌcʼ wersa chaʼan miʼ suben i ñoxiʼal yic’ot i yixicʼal chaʼan miʼ cʼuxbiñob.

 Ong-Li miʼ yʌl: «Cheʼ bʌ chaʼpʼejlix qʼuin ñumen, Zlatka wen tijicña tiʼ subeyon chaʼan tsaʼʌch i cʼajtibe i coltaya Jehová. Tiʼ subeyon, chaʼan cheʼ bʌ tsaʼ cʼoti ti yotot jiñi i ñoxiʼal, tiʼ tsictesʌbe chaʼan yaʼ ti estudio loqʼuem bʌ ti Biblia tiʼ cʌñʌ chaʼan wen ñuc i cʼʌjñibal cheʼ bʌ jiñi ijñamʌl miʼ qʼuel ti ñuc i ñoxiʼal. Cheʼ jiñi tsiʼ jumucʼ cʌyʌ tʼan, yaʼi tiʼ sube i ñoxiʼal chaʼan miʼ wen cʼuxbin. Tiʼ wiʼil cheʼ bʌ tsaʼ cʼoti i yixicʼal tiʼ yotot, tsiʼ meqʼue i tiʼ sube miʼ cʼuxbin». Zlatka tiʼ sube jiñi Ong-Li: «¡Tijicñayix mi cubin c bʌ! Ti pejtelel ili jab maʼan tsaʼ mejliyon c subeñob bajcheʼ yubil mi cubin c bʌ. Pero wocolix yʌlʌ i coltaya Jehová tsaʼ mejli c suben jiñi c familia chaʼan mic wen cʼuxbiñob».

 Ong-Li miʼ bej tsictesan: «Cheʼ ñumeñix jumpʼejl semana tsaʼ j cʌñʌ i ñoxiʼal jiñi Zlatka i tiʼ subeyon: ‹Cabʌl quixtañujob an i subeyoñob chaʼan jiñi Zlatka mach wen cheʼ miʼ chʼʌm estudio loqʼuem bʌ ti Biblia la wicʼot, pero tiʼ sujm wen añʌch i cʼʌjñibal ti lon c familia. Wʌle ñumen weñix añon lojon yic’ot ñumen tijicñayon lojon›».