Elisa, i Testigo bʌ Jehová, choncol i yʌcʼ jumpʼejl estudio loqʼuem bʌ ti Biblia ti yotot juntiquil xʼixic. Cheʼ bʌ choncolto i yʌcʼ estudio, tsaʼ cʼoti juntiquil xjulaʼ mach bʌ pijtʌbilic i chaʼan. Yaʼ ti tiʼ i yotot yaʼan juntiquil xtala yicʼot i yijñam. Elisa ti cʼoti i yubin chaʼan maxto jali ili xñujpuñel tsaʼ chʌmi cojach bʌ i yalobil.

 Cheʼ bʌ Elisa tiʼ subeyob chaʼan miʼ yubin i chʼijiyemlel chaʼan tsaʼ bʌ i ñusañob, jiñi xtala yic’ot i yijñam tsaʼ cajiyob ti uqʼuel. Cheʼ jiñi, jiñi xtala wen michʼ ti jacʼʌ: «¡Maʼan mic ñaʼtan chucoch Dios mi ñoponla bajcheʼ jiñi! ¿Bajcheʼ tsaʼ mejli i chilbeñon cojach bʌ calobil? Añix 28 jab caji c melben i yeʼtel Dios yicʼot mel cabʌl wen tac bʌ, ¡i cheʼ mi tojbeñon bajcheʼ jiñi! ¿Chucoch ti tsʌnsʌbeyon calobil?».

 Elisa tiʼ tsictesʌbe chaʼan Dios maʼan ti pʌyʌ majlel i yalobil. Ti tajayob ti tʼan chaʼan laj coltʌntel, jiñi i tejchel chʌmeñobix bʌ yic’ot chucoch Dios mi yʌcʼ ti ujtel wocol tac. Jiñi xtala yic’ot i yijñam tiʼ subeyob Elisa chaʼan tsaʼ bʌ i yʌlʌ jiñʌch i jacʼbal am bʌ i wen cʼajtibeyob Dios.

 Cheʼ ti yambʌ semana jiñi xtala yic’ot i yijñam tsaʼ chaʼ cʼotiyob tiʼ yotot jiñi xʼixic. Woliʼ qʼuelob jiñi cʌntesʌntel «Jiñi chʌmeñoʼ bʌ mi caj i chaʼ aqʼuentelob i cuxtʌlel» ti jiñi libro ¿Chuqui miʼ cʌntesañonla tiʼ sujmlel jiñi Biblia? Ili xñujpuñel wen yomob i ñaʼtan i tiʼ wen chaʼleyob tʼan jaʼel.

 Ti wiʼil, jiñi xñujpuñel tsajñob ti colem tempa bʌ i chaʼan testigojob Jehová ti Tiflis (Georgia) i wen utsʼatax tsiʼ qʼueleyob cheʼ an cabʌl cʼuxbiya yic’ot cheʼ temel añob, cabʌl jab tsiʼ chaʼleyob wersa i pʌsbeñob jiñi yaʼ bʌ añob tiʼ ñopbal jiñi utsʼat tac bʌ melbal pero maʼan tsaʼ mejliyob.