1-3. a) ¿Igi emi ibagi dulemar arbaed dag gusmala? b) ¿Bibliagi igi arbaed igargi sunmaglenai, geb ibu igargi anmar we capítulogi sunmaggoe?

EMI ibagi dulemar arbaed dogdar ibmar nued dagsur gusmalad, aagala wied abargi arbadamalad, bur wadsi obelogedgi binsananadamalad. Degi dulemar arbaed igar dagge inigwale, soglesulid geg nued arbaleye. Nabir dule na e arbaedba yeer iddodii gued.

² Bibliagi anmarga soglenaid, arbaed igar nuedye. Soglenaid, dule arbaedba nabir ibmar nuegan nigga gudi guoye. Aagala Salomón sogsad: “An wisbalid, nabir mas gundi guedi, nabir gobdi guedi, degi, dummad arbasadgi yeer iddodi guedi, Bab Dummad dulega ugsabalid” (Eclesiastés 3:13). Jehová yeer anmar binarsoggu, abedaed anmarga bela ibmar nueganbi gued, degsoggu, abeged anmar nuedgi arbanai gued, geb anmar arbaedba ibmar nuegan niggubalid. Degsoggu, Jehová sogeyob anmar arbadiir, geb e igar mamaidba anmar dabardibe, Jehová nabir anmar sabgumai guoed (Eclesiastés 2:24 geb 5:18 absogo).

³ We capítulogi anmar ibmar sogbaggegi sunmaggoed: Arbaedba, ¿igi anmar “yeer iddodii” gusale? ¿Ibu ibmargi arbaed nuedsuli? ¿Igi anmar nabir arbaed ular  Jehová igar indassulile? ¿Ibu ibmargi bur bule anmar arbanai gued abelege? Jehová, Jesúsbo gadi arbamarsoggua, bin anmar aamargin inso sunmaggoloed.

4, 5. ¿Igi Bibliagi soglenaidba anmar wisi, Jehová gadi arbae?

⁴ Jehová gadi arbasoggua, aagala Génesis 1:1 gine sognaid: “Bab Dummadi, gebe nega sagla unni, nibneg, nabneg obinyisad”. Jehová bela we nabneggi ibmar obinyisgua, sognoniggid ibmar “bela nuegan[biye]” (Génesis 1:31). Degsoggu, mag iddolleged, Jehová yeer iddosa, bela ibmar obinyisadba. Bibliagi sognasoggua, Jehová ‘yeer iddodaye’, aagala Jehová nued iddosad bela ibmar buggib obinyisadba (1 Timoteo 1:11, TNM).

⁵ Jehová gadi arbasoggua, bibbisaar obunnomasulid. Aagala Jehová, bela nabbaneggi ibmar imasad, sorbali, beedsegine, Cristo nabbaneggi gudi gua, sogsad: “An Bab gusgu arbanai guad” (Juan 5:17). ¿Ibu Jehováde nibneggi imagmasunna? Jehová dulemar aggwemaguad, dulemarga igar ugmaguad. Jehová abar ‘Cristo sordagan susbalid’ ángelmaryob e walig gudi gumalaga, geb Jesúsba reygala arbamarmogaga (2 Corintios 5:17). Jehová arbamaguad dulemar nabir we nabbaneggi yeer iddobuggwa gumalaga (Romanos 6:23). Dulemar miliba eba aggasmarsoggua, Jehová yeer iddomair gebed, emidi Jehová nabir dulemar e sordaganga gusmalad sabgumai gubaloed (Juan 6:44).

6, 7. ¿Igi anmar wisi, Jesús wied abargi arbadii gussuli?

⁶ Jesús dule wiegalasurmogad. Jesús nibneggi gudi gua, “Bab Dummadbogwa bela igar ilemagnai [...] gusad”; Jesús, Jehová bendasad, bela ‘ibmar nibneggined, geb ibmar nabnegginedi’ obinyega (Proverbios 8:22-31; Colosenses 1:15-17). Jesús nabbaneggi gudi gusgua, arbaed  indassurbalid. Bibbigwa neg sobed durdaggalid, aagala sogdamalad, we dule, “urgogi ibmar sobed dule[ye]” (Marcos 6:3). Auggi, Jesús gudi gua, neg sobega urgomar ugleged saddenad, máquinamar urgomar sigmalad saddebalinad. Degsoggu, Jesús ibmar sobbalile, arganginbi sobsadaed, Jesús gudi gusgu, ibmar imaggega arbaed bibbisulinad. Be binsaena, ¿bule Jesús alamagdi gus be iddosunna, sabbimar siggega, sabbimar olasar negse suwarmar sedagega? Be binsaena, Jesús, ¿bule alamagnai gus be binsasunna, neg sobega, suwarmar mesega, yawagagmar nasiggega, ganmar sobega? Degsoggu, Jesúsdina gusgu na wisguanad, dule nueggwa arbaele, nabir arbaedba yeer iddodii gue.

⁷ Jesús, Babga arbaargua, wiedgi Babga arbadsurbalid. Birgabaa abar Jesús Bab igargi sunmaggega alamagdii gusad. Bela dulemarga Bab igargi sunmagbi gussoggua, aagala obunnossulid, wagdaryala gwissiguardaed, degi muddigguddaed, Bab igargi emarga sunmagdii (Lucas 21:37, 38; Juan 3:2). Jesús, “neggwebur dummagan onodii, degi, neggwebur burwigana onodii gualid. Bab Dummad e neg dagmaid gaya burba nuedgi sunmagdii gualid” (Lucas 8:1). Yeer bangu gannamagdii gusad, Jehová igargi emarga sunmaggega.

8, 9. ¿Igi Jesús na e arbaedba “yeer iddodi” gusa?

⁸ ¿Jesús alamagdii gusadba ega igar nabir gusdibe? Gwendina. Bela belad Bab Reinogi sunmagdii gussoggua, sorba buggidar dulemar eba aggasmarmogad. Yeer iddodii gusad, Jehovága arbadiidba, Jehová igargi sunmagged ular mas gunsulir, bai iddossurdaed (Juan 4:31-38). Nabbaneggi e arbaed bergusoggargua, yeer iddosad, aagala weyob e Babga sogsad: “Baba, an we nabneggi be nug odummosad, deginbali, arbaed be anga ugsad an obelos[...]balid” (Juan 17:4).

 ⁹ Degsoggu, Jehová, Jesúsbo anmarga igar nued mesismalad, anmar nabir nued arbadii gumogaga. Jehová anmar sabgumasoggua, anmar, “Bab Dummad[yobi]” ibmar imagbimogad, geb anmar “Cristo[ba] da[baloed]” (Efesios 5:1; 1 Pedro 2:21). Anmar daggoena, igi anmar nabir yeer iddogedgi arbadii gusmogale.

10, 11. Mer anmar wied abargi arbanai guega, ¿ibu ibmargi anmar binsaed abelege?

¹⁰ Bela anmar arbaedbisoggua, anmar nuedgi arbadii gubied, arbaedba yeer iddodii guega. Degi inigwale anmar arbaed soggwen sun nued daggosulid, degsoggu sun wied abargi anmar arbanai gued. Mer anmar wied abargi arbanai guega, ¿igi anmar bur nabir “yeer iddo[gedgi]” arbanai gusale?

¹¹ Mer budar iddogedgi arbanai guo. Sun anmarga arbaeddi gwagosulid, auggi anmar daeddi anmar nabir na ogwaed. Mer anmar wied abargi arbanai guega, anmar binsaer gebed igi Jehová arbaed igar dagge. Anmar sogoena, be wissoggua Jehová nued dagge dule mimmiganga mas amigega alamagnai guedi, degsoggu anba arbaed bega beedse guele, bar aagindi be binsanai guosulid. Ar Bibliagi soglenaid dule na gwenadganga ibmar amisulile, “dule wargwen gwage ulubgi bensulid nigsulidba agga bur ege gediye” (1 Timoteo 5:8, Pap Tummat Karta, e narmagleged wis ogwalesad). Anmar mag iddogele, mimmiganga anmar arbanai, anmarbo arbananaidba, bur anmar yeer iddonai guoed.

12. ¿Ibigala wiedgi arbaed abelesuli, geb arbaedgi emar yardagdii gued abelesurbali?

¹² Mer arbaedgi emar yardagdii guo. Anmar inniggigwad Babba naile, anmar wied abargi arbanai guosulid,  anmar arbanair, nueggwa ibmar imaggoed. ¿Ibigala nuedi arbaedgi nueggwa ibmar imagged? Degi anmar arbaele, anmar dummagan sogdamaloed, anmar inniggigwad arbaedye (Proverbios 12:24; 22:29). Abelesulid anmar, arbaedgi emarga gaggansaed, anmar ibmar addursaed, geb abelesurbalid anmar gwisgu gwisgu arbaed, geb abelesurbalid anmar arbaedgi mani addursaed (Efesios 4:28). Bad anmar capítulo nasadgi durdasad, anmar degi arbaele, dummagan anmar dobgudii, geb anmargi nagguledii guosurye. Auggi aggarsurbalid dummagan anmarga sogsulir be nued ibmar imagnaye, ar na “anmar  ulubgi” wisid, anmar nued ibmar imagnai, geb Jehová sogedba anmar ibmar imagnabali (Hebreos 13:18; Colosenses 3:22-24).

13. ¿Ibigala anmar arbaedgi nued daed abelege?

¹³ Arbaedba nabir anmar Bab nug odungued. Be nued daele, bamalad be dagdidimarmogad. ¿Ibigala anmar nued daed abelege? Dulemar “dagmalagar, Bab Dummad [...] igar, igar nuedi” (Tito 2:9, 10). Anmar nued daele, dulemar dagdamaloed, anmar Bab igar sunsogedba nai, degiile dulemar dagdamaloed Bab igarba naguedi, igar nuedi. Nued dae be daggedba, dule bebo arbaed, Bab igar wisgubi guarmogale, ¡nued iddollegeled! Auggi bur bule nued iddollegeled, anmar daedba, Jehová yeer iddomair (Proverbios 27:11 geb 1 Pedro 2:12 absogo).

14-16. ¿Ibu ibmargi anmar binsagoloe, arbaed amisoggalir?

¹⁴ Bibliagi ise sogar nasulid biddi arbaed nuedi, biddi arbaed nuedsuli. Degsoggu, soglesulid anmar yogsaar ibmargi arbaoye. Auggine Biblia nabir anmar bendagged arbaed nued amigega, Jehová sogedba imaggega (Proverbios 2:6). Emisgi anmar daggoena, arbaed igimaladi, Jehová issaggwa dagge.

¹⁵ ¿Ibu ibmar imagged nuedsurye Bibliagi soglenai? Bibliagi ise sogar naid, addursaedi, gaggansaedi, geb nudsumar sobedi, ibmar nuedsurye (Éxodo 20:4; Gusmalad 15:29; Efesios 4:28; Apocalipsis 21:8). Degsoggu, geg anmar aa ibmamar imaggedgi arbaed, anmar Jehová sabsoggua, geg anmar e igarmar mamaidgi annaed (1 Juan 5:3 absogo).

¹⁶ ¿Be, bamaladba ibmar isgana imaggedgi galedmogoe? Anmar, secretaríaga arbaedgi sunmaggoena. Secretaríaga  arbaedi, issaggwaye soglesulid, auggi, ¿igiirsunna, lotería uglegedgi secretaríaga arbaerdina? Bee be número uggosur inigwale, be lotería ugleged yaurgi arbasiosoggua, sun agga be imagnaiyobmogaled dulemar unnila mani nigguedginbi binsamalaga, geb emar ibe mani suedginbi binsamarbaliga. Bibliagi soglenaid, wegi daed igar nuedsurye (Efesios 5:3-5). Anmar, Jehová sabsoggua, bibbisaar anmar e igargi yolebisulid.

17. a) ¿Ibu igargi anmar binsaoe anmar arbasoggalir? (Recuadro “ ¿We ibmar imaggedgi nabir be arbasardibe?” aagi naid dagbalo) b) Mer Jehová sae iddomai guega, ¿igi anmar Bibliagi ibmar durdasadba igar imasale?

 ¹⁷ Mer anmar yogsaar arbaed amigegala, párrafo 15, 16 gi ibmar naidgi anmar nueggwa binsaed abeleged. Auggi anmar ibmar baidgi binsaed abelebalid. * Mai nued anmarga gardagi ise sogar imaggosulid, ibugi anmar arbaoe, geb ibugi anmar arbaosurbali. Degsoggu, anmar sunnad wargwengi na nueggwa binsasunnoed, ibu imaggedgi anmar arbaoe. Capítulo 2 gine anmar durdasad wargwengine, anmar na durdaggoye, Jehová, igi igarmar mesis nanae, anmar ibmar nueggwa imagdii nanaega.  Degsoggu, anmar na gusgu Bab Dummad igarba gudiidbali wissunnad “igid igar nuedi, igid igar isganabali”, degsoggu, Jehová sabedbali anmar yogasaar ibmar imaggosulid. Degiile Jehová, anmar sabgumai gumogoed (Hebreos 5:14).

18. ¿Ibigala ibgwensursuli Babga ibmar imagged?

¹⁸ Anmar “neg duggumosa[dgi]” bugsoggua, “iba bulegan” naid, sun anmar doggus arbedginbi binsadoed, Jehová igardi sun anmar agga ieged (2 Timoteo 3:1). Mag iddollebalid, ibgwensursulid arbaed amigega, auggi ibgwensur dulemar arbaedgi onolebalid. Auggi, anmar arbasurbalile, igi anmar mimmiganga neguyase mas sedabalosunna. Degi inigwale, anmar arbaedginbi binsadbarsundibe, dulemaryob anmar gudmogoed, ibmar nigguedginbi bur bule anmar binsadmogoed. Sulirdina agga anmar arbaedba Jehová igargi bangudsunnoed (1 Timoteo 6:9, 10). Anmar durdaggoena, igi anmar arbaedba doggus bibbirmassulile. Geb anmar durdagbaloed, biddi ibmala bur “igar nuegan” nanae (Filipenses 1:10).

19. ¿Ibigala anmar Jehová bengubisuli? Anmar Jehová bensulile, ¿ibu ibmarba anmar binsaed galegosuli?

¹⁹ Jehová anmar bendagmai guoed (Proverbios 3:5, 6 absogo). Anmar Jehová bengued abelesulid, ar Jehová anmar sabgumaid, anmar iemasulid (1 Pedro 5:7). Jehová wisid ibu anmar abege, degsoggua anmar bendagmai guoed (Salmo 37:25). Aagala Bibliagi wegi ibmar sognaidi anmar iebisulid: “Mer dogdar mani bina [...] sogmar, na emi be[mar] ibmar niggadgi yeer iddodii [...] gumar. Ar Jehová sogsad: An be iegosurye, degine, an be meddosurye” (Hebreos 13:5). Cristo sordagan Jehovágarbi ibmar imagdidiidi wismalad Jehovádi  bibbisaar emar iemasuli. Anmar bensulile Jehová anmar bendagmai guoe, anmar bibbisaar binsaosulid, igi an na mimmiganga mas amidii guodibeye (Mateo 6:25-32). Bibbisaale anmar arbaed ulale Babgi sunmagged indaggosurbalid, igar iddoged negse nanaed anmar indaggosurbalid;  degsoggu, anmar arbaed ulale Jehová ibmar indaggosulid (Mateo 24:14; Hebreos 10:24, 25).

20. ¿Igi anmar bur Babga ibmar imaggedginbi binsadii gusale?

²⁰ Ibmar soggwennaginbi binsadii guo (Mateo 6:22, 23 absogo). Anmar unnila Babga ibmar imaggedginbi binsadii gubied, ibmar baidse anmar binsaed galebisulid. Anmar unnila Babga ibmar imaggedginbi binsadiile, arbaedgi mani dummad gwisguedgi anmar dogdar binsaosulid, geb doggus ibmar nigguedgi anmar binsaosurbalid. Propagandamargi ibmar oyolealir anmar binsaosurbalid we ibmar sadder andi galaggudagleye. ¿Ibu anmar imagger gebe, mer doggus ibmar nigguedginbi binsaega? Aagala, nuedsulid, anmar dogdar binsasun mani dummad, emargi gadii gued. Geb anmar yogasaar ibmar bagged nuedsurbalid, mer anmar ibe binsasun wadsi gaega. Bibliagi ibmar soglenaidba, bur anmar igar imagbied, “mas gunned niggadibe, degine, mor yoed niggabardibe, anmar weligwar iddoge wilubbid” (1 Timoteo 6:8). Degsoggu, doggus anmar ibmar nigguedgi binsabisulid.

21. ¿Ibigala anmar yogsaar ibmar imagbisuli, geb ibu ibmar bur anmar imagdii gubie?

²¹ Bur Jehová igarba ibmar imaggedgi binsao. Birgamar galemasursoggua, anmar yogsaar ibmar imagbisulid. Anmar yogsaar ibmar imadele, binsasun anmar wadsi owegoed, agga bur ibmar nuegandi anmar imaggosur guoed. ¿Ibu ibmarmar bur ibmar nuegansunna? Dulemar binsae inigwale escuela dummagangi bur nagued nue abeleye, mani nued gwisgueddibe, auggi Jesúsdi sogsad, bur “Bab Dummad e neg dagmaid inse [...] amimar” (Mateo 6:33). Anmar bur Bab Reinogar inso ibmar imagbisoggua, anmar ibmar imagdiidba mag daglegoed bule anmar Bab Dummad Reino binale. Degsoggua  anmar Bab Dummadga, geb e Reinoga bur ibmar imagdii gubied; doggus anmar ibmar nigguedginbi binsadi gubisulid.

22, 23. a) ¿Ibu igargi bur anmar sunmagdii gubie, geb igi mag daglegoe bur aa igala anmarga ibmar nuedi? (Recuadro “ Nabir an neg imas dagle” aagi naid dagbalo). b) Anmar arbanaile ¿doa sogedba anmar arbanai gubie?

²² Anmar nue wisid, anmar nue neg duggumosadgi buggwad. Aagala bur anmar Bab Reino igargi sunmaggedgi bur arbadii gubied dulemar Cristo sordaganga gumarmogaga (Mateo 24:14; 28:19, 20). Jesucristoyobi bur anmar dulemar bendaggedgi arbanamogad. ¿Igi mag daglege bur anmar we ibmar binardae? Buggidar gwenagan arbadidiid, Jehová igargi sunmaggega, abar gwenagan igar mayedgi arbadidimalad, abar misioneroga. Buggidar babgan abemalad, e mimmigan bur bule Jehová igargi sunmagdii gumalad. Bela Cristo sordagan wied abargi Jehová igargi sunmagdidisursoggua, aagala nabir sogleged, e arbadiidba “yeer iddodi[marye]”. Jehovága arbaedi yeer iddodii anmar imagged, anmar nued gudi gubaloed, buggib ibmar nuegan anmar niggubaloed, arbaed baid aagiidi sadded (Proverbios 10:22 absogo).

²³ Neguyase nabir mas gulleged sedagegala, inbaggwa anmar arbanai osedoddaed. Degi inigwale, anmar nabir, anmar arbaedba “yeer iddodi” gued, ar Jehová abeged deyob anmar gudi gued. Anmar Jehová sogedba ibmar imaggele, budar iddogedgi anmar arbaosulid. Jehová Reino igargi sunmaggeddi bibbisaar indagged abelesurbalid, degi anmar gudiile, mag dagledo anmar inniggigwad Jehová sabe, geb anmar abebali Jehová anmar sabgumai gumogad.