1, 2. a) Dule ome niggunaidse anmar nadele, ¿igi sun anmar binsasale, geb ibigala? b) ¿We capítulogine ibu igargi sunmaglegoe?

ANMAR yeer dagdaed dule ome niggunair. E massered mor nued yoi nodagoed, ome anba mor yeer dagle yoi noardamogad, yeer iddo dagledamalad. Yeer iddogedba bibbisaar binsaosurmalad yoogidsedi anga wis neg aggar gudo dagleye.

² Degi inigwale, na niggusmalale undar na ebo gudi gussur damarbalid. Aaga dule ome niggunaidse anmar nadele, egi issaggwa binsaedga anmar nadabsur inigwale, sun agga anmar binsadabaloed: “¿Na niggusmalad sorba urwedii guosurmardibe, na meddosurmardibe?”. Nued gudi gumalaga emarbi na wismarsunnad, bule Bab Dummadba igar imagmaloe (Proverbios 3:5, 6 absogo). Degsoggu Bab Dummadba igar imagmalale nabir ega igar gudoed, degiile, Bab Dummad wemar bendagmai gudmogoed. ¿Ibigala abirgin niggulege? ¿Igi nabir dule bogwad nued amisale? ¿Ome niggued idu, ibu durdagged abelege? ¿Dule abirgin niggusale ibu imagmalar gebe mer na meddemalaga, nabir yeer iddodii gumalaga? Dule ome nigdibe, ome nigsurdibe, emidi anmar we ibmar sogbagge egislesadgi sunmaggoed, daggega igi Bibliagi we igarsig sognamoga.

3. ¿Ibigala nuedsuli dulemar anmargi alamagnaidba, binsa yogsaar anmar abirgin niggued?

³ Abar sogdamalad dule abirgin niggusulir, yeer iddodii  guosurye, yeer iddodi guega abirgin nigguer gebye. Binsa gordidiid, degisulid. Be daggena, Jesús unnila binsa ome sadde gudi gussulid, emarga sogsabalid ome sadde gudi guedi igar nuedye, degsoggu dulemar bamaladga sogsad, doa na unni iddoge, ome niggubisulir aggarsurye (Mateo 19:11, 12). Apóstol Pablo sogsamogad ibigala, nuedi bogwad sadde gudi gued (1 Corintios 7:32-38). Degi inigwale Pablo, geb Jesúsmoga sogsasulid, mer ome niggumaloye. Bibliagi soglenaid, dulemar “niamar igar odurdagmalad[i]” sogdamaloye, mer ome niggumaloye (1 Timoteo 4:1-3). Dule Jehovága bur bule arbabiele, bur nueddo walagwen gudi gued. Degsoggu, dulemar bamalad anmargi naidba, binsa yogsaar anmar abirgin niggubisulid.

4. ¿Ibigala nuedi mimmigan sergan nigga dungumai gued?

⁴ ¿Ibigala nue abirgin niggulege? Jehová dulemarga igar mesisadid, abirgin niggumaloye, nabir yeer iddodii gumalaga (Génesis 2:18 absogo). Geb anba burwigan nued dungumai gumalaga, nan niggar gebed, bab nigbalir gebed, ar burwigan abeged e sergan e sabgued, e sergan ega binsaed dagged, geb e sergan e unabalid (Salmo 127:3; Efesios 6:1-4). Unnila mimmigan nigguegarbii abirgin niggulesurbalid.

5, 6. a) Eclesiastés 4:9, 12 segadgine, ¿ibigala sognai aimar nuegan niggued nuedye? b) ¿Dulemar na niggusmalale, ¿igi nabir dub giabaagwayob gusmalale?

⁵ Eclesiastésgine sognaid, ibiga nuedi aimar niggued. “Dule ebogwad, dule wargwenadba bur nuedid. Ar na e arbadiidgi bur bule ibmar nuegan niggumalad. Ar gwensag agmuggudele, baid ogwisoed. Ar dule walagwen gudiiddi, agmuggudele, dummad wilegoed, ar dule baid e ogwisgued saddeoed. Ar dule ebogwad na waliggaa megmalale, na mudsub mudsub uee imagmaloed. Ar dule walagwen megerdi, ¿igi na uee iddogoe? Dule walagwenale, sunna dule baidse galaggued. Ar ebogwardina, sunna dule baid  abin ganna gwisgumalad. Dub giabbaa bibbirmaggaledi, irgwensuli iddirsulid” (Eclesiastés 4:9-12).

⁶ Wegine ai nigguedgi sunmagnai inigwale, anba abirgin nigmaladga binsaed nued dagnabalid. Ar dule ome niggusale, e ome bur e ai nuedga guoed, na mudsub mudsub bendagdii gumaloed, na wile dagdii gudmarbaloed, na nueggwa aggwedii gumarbaloed. Degsoggu, dule abirgin niggusale, mer na meddemalagala ibmar soggwen abelebalid, dub giabaayobi guega, igi Eclesiastésgi sognai, degiile ibgwensur iddirosulid. We “dub[ye]” anmar sognaidi, ¿ibu obarnasunna? We Jehovágine sunmagnaid. Degsoggu na niggusmalad, Jehová iesurmalale, geb Jehovága nueggwa ibmar imagdii gudmarbalile, na meddosurmalad.

7, 8. a) Dule abirgin sadde gudiid, geg na san bargagus iddogele, ¿ibu bur imagger nuedye Pablo sogsa? b) Dule abirgin niggusale, ¿igi ega neg gudagoye Bibliagi soglenai?

⁷ Dule nabir omebo gabegala, na nue niggumamair gebed, degisulile, dule galagwensur gudiye soglegoed (Proverbios 5:18). ¿Igiirsunna dule ome sadded, sui suliddibe, geg na san bargagus gudiir? Aa dule mer galagwensur gudi guega, apóstol Pablo weyob sogsad: “Ar bemar geg na san bargamalardi, bur abirgined [...] niggumarsundo. ¿Ar bur galagwensuli isgudiidba bur nuedsursi abirgunagwar gudimalar?” (1 Corintios 7:9; Santiago 1:15).

⁸ Dule abirgin nigguedgi binsadiile, we igardi ieged abelesulid, apóstol Pablo sogsad: “Na abirgunagwar niggumaladdi [...] igar buled niggumaloed” (1 Corintios 7:28). Dule abirgin niggusale bar walagwenayob gudi guosulid, wis ega igar abureddi nodamogoed. Aaga dule abirgin nigguedgi binsaele, ¿ibu imagger gebe mer doggus ega ibmar beedse guega, bur yeer iddodii guega? Degsoggu, mer be urwed amidii guega, abirgin niggued idu be nueggwa daggoloed, doa be nigguoe.

9, 10. a) ¿Dule Bab igar wissulid niggusale, igi ega neg gudoye Pablo sogsa? b) ¿Gwenagan Bab igar maidba igar imassurdamalad igi gusdamala?

⁹ Bab Dummad sogedba, Pablo binsaed nued dagsad, dulemar abirgin niggubi gudimaladga. Sogsad: “Mer dulemar Bab Dummad gwage ulubgi bengudimalad ebo aggamarye” (2 Corintios 6:14, Pap Tummat Karta [PTK], e narmagleged wis ogwalesad). Ibmar durgan warbo diggarbar diggarbar addissale, wargwen bur baidba dummale, warbober ibmar durgan oiddollemaloed. Anba deyobmogad, dule Bab igar wisid, dule Bab igar wissulid niggusale, urwed yaisur ega gudagoed, ¿ibiga urwed nodagoe? Ar dule Bab igar wisiddi, Jehová e sabgumai gued abesoggua, Jehovága arbabioed, ar gwendina, Bab igargi bibbisaar binsasursoggu, Jehovága arbaedgi binsadiosulid, degsoggu, dogdar neg nued dagdidiosursunnad. Degsoggu, mag iddolledo ibiga Pablo sogsa, dule Bab Dummad ulubgi ben[sulid]” nigguer gebye (1 Corintios 7:39, PTK, e narmagleged wis ogwalesad).

¹⁰ Auggi, abar gwenagan budar walagwen gudi gugusadbali, yogasaar dule Jehovága arbadisulid niggusdamalad, Bibliagi igar maidba, igar imassurdamalad. Geb sorba dagnonidamalad, nabir Bibliagi sognaina, yogsaar abirgin niggued igar nuedsuli. Degsoggu, sorba agga bur idualedba, ege gudi guddamalad. Degi inigwale bur melu anmar gwenagan, weyob ibmar imagdisurmalad, ar wismalad Jehová emar bendagmai guoe, aaga Jehovába igar imagdidiid (Salmo 32:8 absogo). Anba abirgin niggubi gudimarmo inigwale, wismalad ibagwengi Bab Dummad neggwebur abargi abirgin amimogoe.

11. ¿Dule ome niggubiele, bia nabir binsaed nued amisale? (Recuadro “ ¿Igi nabir dule abirgin nued amisale?” aagi naid dagbalo.)

¹¹ Dule Jehovága arbadiid nigguedbi unnisurbalid, nued gudi guega. Nabir yeer iddodii gumalaga, ebober dule  nueddamalar gebed, ebober gadi Bab igar binarmalar gebed, ebober yeer Bab Dummad binarmarbalir gebed. Aaga mai nued buggidar gardamar onomaid nabir gwenagan abirgin nued amimalaga. Degsoggu nuediled, we gardamar absoged idu Babse goled, geb gardamar sognaidba igar imagbalid (Salmo 119:105 absogo). *

12. ¿Igi abar dulemar imasdae, na e sisganga sui uggega, geb igi Bibliagi sognai ome igiidi Abrahán na e massiga amisa?

¹² Abar dulemar na sisganga sui amimalad, binsadamalad sergan bad nue binsaed nigmarsoggu, nabir na sisganga massered nued amigoye. Ar ebbenne Jehovága arbasmalad deyob imasmarmogu, inbaggwa nabir ega igar gusdamalad. Degsoggu, babgan na sisganga abirgin amigedgi binsasundibe, nuediled igi Abrahán ibmar imasa aagine wis binsamarmogad. Abrahán, Isaacgala ome amige binsaargua, ome mani nue niggad ega uggedgi binsassulid. Abrahán, dule ega arbadiid barmisad, ome Jehovága arbadiid e massiga aminaega (Génesis 24:3, 67). *

13-15. a) ¿Proverbios 24:27 gine, dule ome niggubiedga, igi binsaed daglenai? b) ¿Omegan sui niggued iduale, ibu imagged wisgued abelege?

¹³ Be ome nigguedgi binsadiile, nuedid be we ibmargi binsaed: “¿Nabir an nued neguya sesardibe?”. Dule nabir nued neg seega, unnila binsa ome niggubi guedbii unnisulid, unnila mimmigan nigguegarbii ome niggulesurbalid, unnila binsa budar walagwen gudi guedba ome  niggulesurbalid. Dule abirgin niggued idu, bin wis ibmar soggwen wisgued abelegweled, geb wis ibmar nigga gubalid.

¹⁴ Dule ome nigguedgi binsadiile nuedid, wegi ibmar narmaggar naidgi binsaed: “Ibmar digoed guaggwa be urbe, ibmar digega be nagnumar guaggwa be nasigge, geb a sorbali, be neg be soboed” (Proverbios 24:27). ¿Ibu igargi we anmar odurdagnai? Ebbenne dulemar Babga arbadii gusmaladi, ome nigguedgi binsaalile, ‘neg sobsoggalile’, we ibmargi binsasdamargweled: “¿An bule nabir ome aggwedii guodibe, an bule nabir mimmigan aggwedii gubalodibe?”. Degsoggu ome niggued idu, bad nagnu nigdamalad, ibmar digega. Emi ibagi massergan deyob imagged abelemogad. Dule ome niggubiele, nagnu niggar gebed, bad neg nigbalir gebed. Bibliagi soglenaid, dule omega ibmar amisulile, omega nuedgi sunmagsulile, Bab igargi e ome odurdagsurbalile, bur dule Bab igar wissulidba ege guye. Auggi, soglesurbalid, dule boni soggwenba nue oiddollesmadibe, deggines alamagnai guoye (1 Timoteo 5:8 absogo).

¹⁵ Omegan anba sui nigguedgi binsaarmogale, bad neg yaggi ibmar saed wismogar gebed. Bibliagi soglenaid, omegan igi daed abelege, ibu ibmar wisi gued abelebali, neg yaggi massered bendagdii guega, nued neg ya aggwedii guega (Proverbios 31:10-31). Dule gwae gwae abirgin niggusdibe sogledo, e abirginga guoedgi nued binsasurye, na unnila eginbi binsaye. ¿Ibiga deyob soglege? Ar dule degi daedi, binsasulid nueggwa e abirgin aggwedi guedgi. Auggi, bur nue abeleged abirgin niggued idu, dule inniggigwad Jehovábali nagued. Anmar daggoena, ibigala deyob soglenai.

16, 17. ¿Abirgin nigguedgi binsadimaladga, igi Bibliagi igarmar mamai?

¹⁶ Degsoggu, dule abirgin niggusoggalile, binsaed abeleged, igi Jehová sogmai, massered ibu imaggoe, geb ome  ibu imagmogoe. Masseredi mag iddoged abeleged, neg yagi ibu e arbaedi. E sogedbarbii ibmar imagdii guosulid, Jesús igar mesisadba bur igar imagged abeleged (Efesios 5:23). Anba omegan mag iddoged abelemogad, Jehová igi ega igar mesismoga. Degsoggu ome we ibmargi binsaed abeleged: “¿Anga beedse gudagosurdibe, an, an suiba “igar” imaggega?” (Romanos 7:2). Ome sui sadde gudiile, Jehová sogedba igar imagdiid (Gálatas 6:2). Sui niggusardi, e sui sogedba igar imadbaloed. Degsoggu, ome sui niggusoggalile gannar we igargi binsaed abelebalid: “An suiga guoed, noar ibmar imadele, ¿anga ibgwensur guodibe an eba igar imaggega?”. We igar be nued iddosulile, bur nuediled mer be sui niggued.

¹⁷ Bela dulemar emarbi ibmar binarsursoggua, dule abirgin niggusale, na e abirgingi binsaed abeleged, na e abirgin yeer oiddodi guega (Filipenses 2:4 absogo). Pablo sogsad: “Bemarmoga, [...] na omegan sabgumarmogo, bemar na duggin sabgudiiyobi; anba omeganmoga mer ibgwensur massergan imagmarmogo”. Degsoggu, Pablo mag iddosad, massered abegoe, e ome mer ibgwensur e imagdii gued, omemoga abemogoed, e sui, e sabgudii nanaed (Efesios 5:21-33, TNM).

18. ¿Na abebugmalale, ibigala nue abelege, na san bargaaggwa gudi gumalad?

¹⁸ Degsoggu, na abebugmalale, nuediled durdagmalad, igi na nued aggwedii gumaloe, geb nuedbalid binsabalir, bule anga igar nued guoe an we dule niggusar. Na abebugmaladi, na san bargaed abelemarbalid, mer galagwensur gudi guega. Na abebugsoggu, na gadi binarmaloed, aaga abeleged mer doggus na niggumamaiyob imagmalad, na nue abemalale, galagwensur guedgi binsaosurmalad, mer Bab igargi yolemalaga (1 Tesalonicenses 4:6). Degsoggu, na san bargaed durdagged abelemalad, na niggumalodibe, na nigguosurmardibe.

19, 20. ¿Igi dulemar abirgin niggued igar daggusmala, geb anmardi igi aa ibmar dagbimoga?

¹⁹ Películamargi, geb libromargine, dulemar na niggusmalale soglesdaed, emidi “yeer iddodii gudmarye”. Sanaledgindi, na niggusmalale soglesulid, yeer iddodii gudmaloye, sorba geb daglegoed bule yeer iddodii gudmaloe. Jehová weyob igar mesissoggua, bibbisaar bar na meddegarsurmalad (Génesis 2:24). Auggi emi ibagi dulemar deyob binsasurmalad. Aaga inbaggwa abar binsamalad abirgin nigguedi, “dub gwadigeyobye”, ibmar nabir gudele na niggumama gudoye, auggi wis neg aggar guderdi, nabir na meddemarye, ibigwensur gannar dub esiglegeyob iddollesundo.

²⁰ Degsoggu dulemar binsadamalad dule abirgin niggusale, nabir meddelebarye. Aaga ibigwensur ome niggumalad, ar wismalad e abegedba ega ibmar gusulile, sulirdi ega wis neg aggar gudele, nabir na meddemarbali. ¿Ibigala Bibliagi soglenai, abirgin nigguedi, dub obibbirmaggeyob guye? Anmar dagdiid, diiburwa dummad noalile, ur, dub nuedgi addinnar naile, ibigwensur wasgamaggosulid, degsoggu ibigwensur iddirosulid. Jehová deyob imasmogad, dulemar na niggusmale mer na bibbisaar meddemalad. Aaga Jesús sogsad, ‘Bab Dummad dule abirgunagwar imagsadi, mer na medded imagmar’ (Mateo 19:6). Degsoggu dule abirgin niggusale bibbisaar na meddedgi binsaed abelesurmalad. Degsoggu, ¿dule abirgin niggusale waladagdi gussunnode? Degisurbalid.

21. ¿Dule abirgin niggale, igi na dagdii gumalad abelege, geb doayobi daed abelemala?

²¹ Abirgin nigmalad ieged abelesulid, bela anmar noedbii, degsoggu, dule abirgin niggale, e abirgin ibmar nuegan imagdiidgine bur addagdii gued abeleged, deyob na gudidiile nabir yeer iddodii gudmaloed. Degsoggu ¿soglesunde  wis ibmar noar guder basur dagdii gulegoye? Suli. Igi anmar wismoga Jehová wisi, anmar noar ibmar imaddae auggi anmar abedaed Jehová anmar ibmar nuegan imagdiid dagmai gued. Aaga Salmogi wegi soglenaid: “Bab Jehová, be dule e isguedgi addagdele, ¿doa be asabin sogosunna, an isgudisurye?” (Salmo 130:3). Degsoggu, dulemar na niggusmalale mer na ibgwensur imagdidii gumaloed, na gi wis yolesmalale, na ga ies imagmaloed (Colosenses 3:13 absogo).

22, 23. Abrahán, Sarabo, ¿ibu igar nued obesmala, abirgin nigmaladga?

 ²² Dulemar na niggumamaidi, birgamar nadabbidba nabir bur yeer iddodii gumalad. Be daggena, Abrahán, Sarabogwa sered ugaggi ega neg ibgwensur gussur inigwale, anba yeer iddodii gusmalad. Be binsaena, Sara 60 año niggasaaledgi, Ur neggweburgi banguded, aagine na neg nued nigga gudiinad, bela ibmar nigga gudibalinad, sorbardi urmor neggi gabdii gudmalad. Saragala ibigwensur gussulir gebed wegi gudi gued. Deginigwale Sara e suiba igar imasad. E suiga nabir ibmar gumai guega, e suiba bire bire gudi gusad, degsoggu, nue e sui bendagdii gusad. Unnila dulemar e daggega Sara deyob ibmar imagdii gussulid, “ulubgi[nbela]”, ibgwensur e sui imassulid (Génesis 18:12; 1 Pedro 3:6). Sara e suigi agbinedgi binsassulid.

²³ Auggi soglesurbalid Abrahánga, geb Saragarbela neg nueganbi gusye. Ibagwengi, Sara, Abrahánga ibmar sogsagu, “Abraham nue nunmag iddosad”. Auggi Jehová, Abrahánga sogsad, be omeba be igar imaggoye, Abrahán binsassulid an masseredsoggua, an omeba an igar imaggosurye, deyob imasadba, ega neg nueganbi gusad (Génesis 21:9-13). Abrahán, Sarabogwa, Bab igargi bangussurmaladbali, igar nued obesmalad, abirgin nigmaladga.

24. ¿Dulemar nabir Jehová nug odummodii gumalaga, ibu imagdidiir gebe, geb ibigala nuedi deyobdaed?

²⁴ Emi ibagi, anmar sordagan na diggasurgus niggumamaid yaisulid, omegan ibgwensur massergan imagdidisurmalad, masserganmo, na omegan sabgudidimogad, geb bur Jehovága arbaedgi binsadidiid. Dule, ome nigguedgi binsaalile, nuedsulid, yogasaar ome niggued, ome niggued idu ibmar nigga gubalid abeleged, geb alamagbalir gebed nabir na sabgudii gumalaga. Degiile, nabir Jehová nug odummolegoed, geb Jehová we dulemar sabgumai gumogoed.