1, 2. a) Anmarga soglealir dummaganba igar imagye, ¿inbaggwa igi anmar guardae? b) ¿Ibu igargi anmar sunmaggoe?

BE DAGDIMOGAR gebed, igi burwigan guardamala ibmar saye wemarga soglealir. Burwigan wisdamalanad e bab ese goddele, e babba igar imagged abelege, auggi sun e babba igar imagbisur gudamaloed. Inbaggwa anmar burwiganyob guardamarmogad.

² Dule wargwenga soglesdibe emar idugoye, inbaggwa anmarga ibigwensur gusurdamogad eba daega. Sun be inbaggwa eba dabisur guardamogar damogad, degi inigwale bebi deyob gudisulid. Emi ibagi dulemar bar emarba igar imagsuli inigwale, Bibliagi anmarga soglenaid, anmardi dummaganba bire bire daoye (Proverbios 24:21). Jehová, be sabgumai gued be abegele, idudimaladba be daer gebed. Auggi, ¿ibigala undar gudae emarba igar imaggega? ¿Ibigala Jehová anmarga soge idudimaladba damaloye? ¿Ibu anmar bendaggoe nabir anmar neg sedimaladba daega? ¿Igi anmar aamarba igar imasbalile? We ibmargi anmar sunmaggoena.

3, 4. ¿Igi isgued igar dognoniggi, geb aagala, ibigala anmarga undar guardamoga dummaganba daega?

³ Nega sagla unni, Adán, Evabo Babba igar imassurmalad, aaga isgued igar dognoniggid. Degsoggu bergwable anmar dungualid aggar emarba igar imagbisur guardamogad. ¿Be dagsa ibiga anmarga beedse guardae dummaganba daega? Soggwengi, ar bela anmar noedbiid, geb sogbogi, anmar  idudimarmogadi, inbagwen noddamarmogad (Génesis 2:15-17; 3:1-7; Salmo 51:5; Romanos 5:12).

⁴ Bela anmar isguedbi gwalulessoggua, aaga anmar emargi obin obin guardaed, geb aaga anmar emargi na dummarba imaggardabalid, geb aaga anmarga undar guardabalid emarba igar imaggega. Anba anmar diggasur gus Jehovágala arbadii inigwale, sun anmar emarba igar imagbisur gudagoed. Deyob Coré gusad. Coréga ibmar ibigwensur gussurgua, Coré Jehovági banguedgi binsassulinad. Auggi ibagwengi dummadga gubi gualidbardina, agga Moisésgi agbidded. Moisésdi emargi dasulinsoggua egi agbillegedsulinad (Números 12:3; 16:1-3). Rey Uzías, Coréyobi gusmogad, na dummad iddogedba sacerdotemar ibmar imagged imasad, ar sacerdotemarbi we ibmar imaggoenad (2 Crónicas 26:16-21). Coré, weyob ibmar imasadba oburgwilesad, Uzías anba oburgwilesmogad. Igi Coré gusa, geb igi Uzías gusmoga, igar soggwengi anmar odurdagged, anmar na dummarba imadele, anmarga undar gudamogoed, dummaganba daega.

5. Dule dummadga gusale, ¿igi neg imaggardae?

⁵ Dummaganga megmamaidi, ibgwendii dulemar imaggarsurdamarmogad, igar mamaidgi annaddamarbalid, geb agga neggweburgi agbiddedamarbalid. Aaga, dulemar bar eba igar imagbisur guardaed, na duggin imasdamarsundo (Eclesiastés 8:9 absogo). Emidi Saúlgi anmar sunmaggoena. Jehová, reyga Saúl imasgua, Saúl, dule nuedinad, emargi dasulinad. Sorbali, Davidgi nobgualidba, geb na dummarba imaggalidba agga David belegindii nanaded (1 Samuel 9:20, 21; 10:20-22; 18:7-11). Undaradgi Israel neggweburgi David reyga megnonimogad, anba we bur rey nued Israelgi mai gusa inigwale, sorba na dummad iddogedba, agga emargi agbiddemogad. Uríasgi ome egwadsad, geb sogsabalid urwelenaidgi asabin Urías ogwismaloye, Urías oburgwemalaga (2 Samuel 11:1-17). Bela dulemar noedbisoggua, dule wargwen dummadga megnoniggile, aaga isguddaed, dule bai Jehová igar dagsulir bur bule isguddaed. Historiador narmasad, igi iglesia católica dummagan dulemar wiosa, aagi sognaid, ‘dule  wis dummadga gusale, isguddaye; emisgi, dule bur bule dummadga gusdibe, agga bur bule isguddasunye’. Dulemar dummadga gusar weyob guardasoggua, ar degidde “¿ibigar dummaganba daed abelesunna?”.

6, 7. a) ¿Ibigala anmar Jehovábali igar imagged abelege? b) Bega ibigwensur gusulile, ¿ibigala anba Jehovába igar imagged abelege, geb doayob anmar daed abelege?

⁶ ¿Ibig anmar dummaganba daed abelege? Jehová sabedba, dulemar sabedba, geb mer anmarga neg aggar gubaliga. Gebbedgi, dummaganba anmar daed, ar anmar bela belad Jehová sabed, aaga anmar abeged Jehová yeer iddomai gued (Proverbios 27:11 geb Marcos 12:29, 30 absogo). Anmar wisid Adán, Edéngi Babgi agbidsad aggale dulemar sogbuggwayobid, Jehová neg semai guedsulinye. Degsoggu bur melu dulemar Niaba aggas bugmalad, agga Bab gobiernodi obaddemalad. Anmardina yeer iddoged Jehovába agganaidba. Aaga anmar daggalile, Apocalipsis 4:11 gine soglenai, Jehová, dule dummad maye, anmar Jehová nug odummobi guardamogad. Degsoggu bibbisaar anmar bensulid, Jehová Reygala bela neg dirbimaggar maidi. Aaga anmar bane bane ibmar imadele, Jehová sogedba anmar ibmar imagdaed.

⁷ Anmarga ibmar ibigwensur guerbii unnila anmar Jehovába dasulid. Be ebinsae, anmar sogsad burwiganga undar guardaye serganba daega, aayobi, anba anmar nue Jehová sabe inigwale, inbagwen anmarga sun undar gudamogoed Jehovába daega. Degsoggu anmar durdagger gebed Jehovába daed. Jesúsbela e Bab sogedbarbii ibmar imagdii gusmogad, anba ega inbaggwa ibmar ibgwensur gussur dae inigwale; aaga Jesús e babga weyob sogsad: “An sogedbarsuli, unnila be sogedba be imaggoed.” (Lucas 22:42).

8. a) ¿Jehovába anmar daega, doamarba anmar igar imagger gebe? Anmar idudimaladba dasulir Jehová ¿igi iddomadae? b) ¿Ibigala anmar idudimaladba igar imagged abelege? (Recuadro “ Dule beg binsaed daggalir wis iddogo”

⁸ Emi ibagi Jehová sunnad bar e sordaganga sunmagmasulid.  Emidina Jehová, Bibliagi anmarga igar mesisad, geb dulemar onugsasbalid ega neggwebur idudii gumalaga. Degsoggu anmar, Jehová neggwebur idudimaladba daele, mag daglegodo, anmar, Jehováb dae. Auggi anmar aa dulemargi agbidderdi, geb anmarga binsaed daggarmalar anmar eba dabisulile, sun adi anmar Jehová ourwed. Be daggena Israel dorgan Moisésgi agbiddemargua, Jehová sogsad, egine agbidsamarye (Números 14:26, 27).

9. Soldado, e dummaganba dasulile, ¿sun igi neg imasale? Anmar baigan sabele, ¿ibigala idudimaladba anmar daed abelemoga?

⁹ Sogbogi, ¿ibigala anmar dummaganba igar imagbali? Baigan sabedba anmar dummaganba dabalid. Anmar mag iddogega soldadomargi sunmaggoena. Soldado, e dummadgi agbiddele, bela e sordagan eba galedoed, sun agga burgwed amimalad. Nabir urwelenaidgi nagmalaga e dummaganba igar imagmalar gebed. Soldadomargi anmar sunmadele ber emar oburgwed igargi sunmaglenaiyob iddolleged, auggi Bibliagi soglenaid, Jehová, soldadomar nigmoye, wemardi soldadomar nueganye (Isaías 13:4). Ángelmar, Jehová soldadomarsoggua, Jehová, ángelmar idumaidid. Anba Bibliagi soglenabalid, anmar, Cristo sordagana, Jehová soldadomaryob gumarmoye (Salmo 68:11; Ezequiel 37:1-10). Anmar idugega Jehová abar dulemar onugsasbalid. Anmar we dulemarba dabisulile sun anmar ular anmar sordagan oiddollemarmogad. Degsoggu dule wargwen, gwenagan idudimaladba dabisulile binsa bamalad eba galedmogoed (1 Corintios 12:14, 25, 26). Igi neg yagi mimmi wargwen e serganba dabisulile, bela eba e gwendgan galeddamoga, aayobmogad. Degsoggu anmar idudimaladba daele, sogledo, anmar, baigan sabmoye.

10, 11. ¿Ibigala nuedi dummaganba, geb idudimaladba daedi?

¹⁰ Sogbaagi, ¿ibigala anmar idudimaladba dabali? Anmar nued gudi gumogaga. Jehová anmarga soggalir dule wargwenba igar imaggoye, anmarga sogsadabalid, ibigala nuedi eba igar imagleger. Be daggena, ¿ibigala igar nuedye soglenai serganba daed? Soglenaid, degiile anmar undar suiddi  gudi guoye, geb anmar yeer iddodii gubaloye (Deuteronomio 5:16; Efesios 6:2, 3). Emisgi, ¿ibigala igar nuedbali anmar idudimaladba daele? Soglenabalid, degiile anmar Jehovági banguosurye (Hebreos 13:7, 17). ¿Ibigala nuedbali neggweburgi dummagan mamaidba igar imaglebalir? Soglenabalid, deyob anmar daele, anmar nueganbi gudi gudoye (Romanos 13:4).

¹¹ Anmar wissundibe, ibigala Jehová abege anmar idudimaladba daedi, bur anmarga ibigwensur guoed emarba igar imaggega. Emisgi anmar sunmaggoena ibmar sogbaagi, igi anmar dulemarba igar imagdii nanasale.

12. ¿Massergan neguyagi ibu imagdii guoe, geb igi neguya sedii gued abelege?

¹² Jehová igar nigga ibmar imagsoggua, abirgin niggued igar mesisgua, sogsabalid, igi neguyagi neg selegoe (1 Corintios 14:33). Masseredga igar uglesad, beedi, neguya seoye. Nabir  nuedgi neg seega, Jesucristo sogedba nanamogar gebed, ar Jesucristo massergan idumaidid. ¿Igi Jesucristoba damaloe? Durdagmalar gebed, igi Jesucristo gwenadgan buggwad aggwemamoga, aayobi na gwenadgan aggwemogaga (Efesios 5:23). Degsoggua, massered nabir neguya seega wiesuli arbaoed. Beg soglenaindo bee be neguya sedii guoye, auggi we soglesulid, be, ome sabsur imagdii guoye, geb mimmiganse urwedginbi arbadii gubaloye. Bur na nueggwa ome sabgudii gued, geb na mimmigan sabgudii gued abelegoed. Massergan bibbisaar ieged abelesurmalad, Jehová bur dule dummad mai, degsoggu, Jehovági obin obin daed abelesulid.

13. Nangan neguyagi ¿ibu imagdii gumogoye Jehová sogsa?

¹³ Jehová, ome obinyisad na sui bendagdii guega. Neguyagi nanganga igar uglesmogad mimmigan idugega, aaga, Bibliagi burwiganga soglenaid: “Be nan be odurdaggedba be dao” (Proverbios 1:8). Nanganga igar uglesmo inigwale mimmigan idugega, auggi omegan, massergangindina geg obin obin daed, bur na sui bendagdii guoed. E suibo arbadioed, yamo sui binsaed gasa gasa gudiosulid, e sogedba ibmar imaglegega. Massered igar aminonidibe igi ibmar guoe, auggi omedina binsaele ibmar weyob guedsurye, nuediled, nuedgi e suiga sogmogad, igi binsamoga, auggi suigindina agbined abelesulid. E sui, Jehová sordasulirdina, inbagwen sun ega neg undar gudagoed. Degi inigwale, ome na sui  sogedba nanadiile, sun ibagwengi e sui Jehovába aggadmogoed (1 Pedro 3:1 absogo).

14. Babgan yeer iddodii guega, geb Jehová yeer iddomai gumogaga, ¿mimmigan ibu imagger gebe?

¹⁴ ¿Ibigala nuedi mimmigan babganba daed? Degiile Jehová yeer iddomai guoed, e sergangi nued sunmaglemogoed, geb e sergan yeer iddodi gumarbaloed (Proverbios 10:1). Unnila be nanbii be sediile, be babbidibe, soglesulid be eba daosurye. Weyob be nan be sediile, bur bule be eba daed abelegoed, geb abelebaloed bee be nan bendagbalid. Neguyagi bemar, Jehová sogedba igar imagdididibe, nued bemar gudi gumaloed, yeer iddodi bemar gumarbaloed. Neguyagi weyob gudidiile Jehová nug dungumogoed, ar Jehová dulemar urbisadid (Efesios 3:14, 15).

15. a) ¿Ibu anmar imagger gebe Jehová sogedba anmar igar imagdii guega? b) Igi Bibliagi soglenai, ¿ibigala anmar idudimaladba daed abelege? (Recuadro “ Idudimal adba, anmar daed abeleged” aagi naid dagbalo.)

¹⁵ Jehová na e Massi onugsasad nabbaneggi e sordagan buggwad idumai guega (Colosenses 1:13). Jesús, “mai nued binsaed niggaa daed” onugsasmogad, nueggwa Jehová neggwebur  aggwesii guega (Mateo 24:45-47). Ebbenne siglo primerogi Gwenadgan Idubuggwa gusmaladi, gwenadgan idudii gusmaladga igar ugbuggwa gusmalad. Emi ibagi Gwenadgan Mergi Neggi Anmar Idubugmaladi, wemala “mai nued binsaed niggaa damaladye” sogleged. Inbaggwa idudimaladga gardamar barmileardaed, sulirdi, neggwebur irba gwenadgan buggwadse addagmaladga soglegodibe, igi ibmar imaglegoe, geb wemala, idudimamaladga sogmarmogaga, igi ibmar imaglegoe.Degsoggu gwenadgan idudimaladba anmar daele, sogledo, Jehová sogedba anmar igar imagdiye (1 Tesalonicenses 5:12 geb Hebreos 13:17 absogo).

16. ¿Ibigala Bibliagi soglenai, idudimaladi Jehová ganguedba onugsalemarye?

¹⁶ Ar bela anmar noedbisoggua, gwenadgan idudimaladi, geb gwenadgan bendagdimaladi inbaggwa noddamarmogad. Auggi mer anmar Jehovági banguega, Jehová sogmaid wemarba damaloye. Bibliagi soglenaid gwenadgan idudimaladi, Jehová sogedba, e ganguedba, onugsalesmarye (Gusmalad 20:28). ¿Ibigala Bibliagi deyob soglenai? Gebbedgi, ar Biblia, Jehová ganguedba narmaglessoggua, dule onugsaleged iduale, idumaladi bin Bibliagi dagsadamargweled, bur we dule, Biblia sogedba nanadidibe, aaga sogleged Jehová ganguedba onugsalemarye (1 Timoteo 3:1-7, 12; Tito 1:5-9). Sogbogi, dule wargwen onugsalesoggalile, idudimalad bin Jehováse godsadamarbargweled, Jehová gangued emar bendaggega, aaga soglebalid, Jehová ganguedba onugsalemarye.

17. Gwenadgan buggwad yaurgi, omegan massergan anar ibmar imagge daglealile, ¿ibigala omegan dunwar ibmar imagged abelege?

¹⁷ Gwenadgan buggwad yaurgi ibmar soggwenna imaglesurbalid, abar gwenadgan idudimaladi we ibmar imagnanaed, sulirdi gwenadgan bendagdidiidi we ibmar imaggoed. Dulemarga Bab igargi sunmaglenaed iduale, wis igar iddolledabarsoggua, idudimalad we ibmar imagbaloed. Idudimalad gudisurmalardi, gwenad bautizar galad gusiile, aaddi gwenadganga igar iddogoedid. ¿Igi gudbaloe massergan sadderdina? Degiirdi ome bautizargalad nabir we ibmar imaggele,  aa imagsunnoed. Gwenadgan buggwad yaurgi, massergan saddedba, omegan massergan anar ibmar imagge daglealile, dunwar imagged abeleged (1 Corintios 11:3-10). * Omeganga weg soglenagua dunwar ibmar imagmaloye, soglesulid ibgwensur omegan imaglenaye. Dunwar omegan ibmar imaggele, mag dagledo Jehová igar mesisadba damarmoga.

18, 19. a) ¿Ibu nue Romanos 13:1, 7 segadgine obarnai be iddoge? b) ¿Igi mag daglegoe, anmar, dummagan neg dagmamaid ibgwensur imagsuli?

¹⁸ Bela anmar alamagdidiidbid Romanos 13:1, 7 sega (absogo) ibmar soglenaidba daega. Romanos 13:1, 7 sega anmar absodele, “dummagan neg dagmamaidgine” sunmagnaid. Jehová aggar sogmasulid dummagan na igar mesmamaidba, ar dummagan mamamogad nabir neg nued selegega, nabir neggwebur ibmar nigga bugguega. ¿Ibu anmar imaggoe nabir anmar dummaganba igar imagdii guega? Neggweburgi igar mamaidba anmar igar imagger gebed. Degsoggu dummagan anmarga soggardibe, ibmar imagye, anmar emarba igar imaggoed. Anmar, gardamar enoge daglearbardibe, sogega, ibu ibmar anmar nigga, negdibe, nagnudibe, ibu ibmardibe, nueggwa anmar narmagged abeleged, mer emar yardaggega, mer gaggansabaliga. Auggi neggweburgi dummaganga mamaid Bab igargi annaedga anmar imagbi guarmalardina, anmar dummaganba igar imaggosulid, bur anmar, Jehovába igar imaggoed. Apóstolmar sogsayobi anmar sogmogoed: “Anmar, dulemarba ibsaed iduale, bur Bab Dummad sogedba anmar ibsaer gebed” (Gusmalad 5:28, 29; recuadro “ ¿Bur doabali an igar imaggoe?”, aagi naid dagbalo).

¹⁹ Gobiernomar, dulemar onugsabalid dummaganga gumarmogaga, ibagwengi anmar, aamarga ibmar soggwen soge daglearsundibe, mer anmar ibgwensur imaggoed. Be daggena,  Apóstol Pablo nue wisinad rey Herodes Agripa, Festobo ibmar nued imagdidisurmalana, auggi ibagwengi wemar asabin sunmagge dagleargu, ibigwensur wemar imassulid (Gusmalad 26:2, 25). Apóstol Pablo daeyobi anmar daed abelemogad, ibagwengi anmar, dummagan asabin ibmar soge daglearmodibe, sulirdi, policía anmarse ibmar egissardibe, mer anmar wemar ibigwensur imagmogadid. Burwigan escuelagi nanamaladi, Pabloyobi daed abelemarmogad. Degsoggu escuelagi dummaganga gudidimaladgi, geb maestromargi dodoged abelesulid. Unnila dulemar nued anmar dagmaladbii anmar ibgwensur imaggosulid, anba isdar anmar dagdidimaladse baggale anmar ibgwensur saosulid. Degsoggu bela dulemar wisgumaloed, anmardi ibgwensur emar imaggedsurdamala (Romanos 12:17, 18 absogo; 1 Pedro 3:15).

20, 21. ¿Ibigala nuedi dummagan neg dagmamaidba daed?

²⁰ Unnila anmar, dule wargwennabii ibgwensur imagdii guosulid. Bur nuedid wegi Bibliagi soglenaidba anmar igar imagged: “Bela dulemargi binsaed niggaa [...] damar” (1 Pedro 2:17). Dulemar geger dagdamaloed anmar ibgwensur emar imagsulir, ar emi ibagindi dulemar ibgwendii emar imagsur gusmalad. Weyob anmar daele Jesús sogsadba anmar igar imaggoed: “Gwallu gaeyobi, bemar, dulemar asabin damarmogo, adi, dule[mar] baigan be[mar] ibmar nuegan imagdiid dagmalagar, degine, be[mar] Bab Dummad nibneggi maid e nug ogannomalagar” (Mateo 5:16).

²¹ Emi ibagine doggus dulemar isgusbugsoggua, dule wargwen daggalile, anmar emarbo aggar dae, anmarba nagubi gudamaloed. Degsoggu, anmar neguyagine na ibgwensur imagdisurdibe, dummagan neg dagmamaidba anmar igar sadibe, geb idudimaladba anmar bire bire dabardibe, sun dulemar anmar dagdimaladi, anmarba Bab igar durdagbi gudamarmogoed. ¡Ibiyob nued iddollegele weyob anmar daedba, dule wargwen anmarba aggadele! Anba dulemar Babba aggasulile, anmardi Jehová yeer oiddodii guoed, Jehová, anmar sabgumai guega.