LECCIÓN 8
¿Ibigala Babdummad neg onugusuli?
1. ¿Doa neg oisgude?
Gobiernomar, dulemarga neg onugudisulid
Nia, dulemarga gaggansasgu neg isguded. Nia, ángel nuedmoganad, auggi “igar-nabbiragwadgi bangu[sad]” (Juan 8:44). Babyobi dummadga gubiguarmogadbali Eva gala gaggansasad; Eva binsaed gasad mer Babba igar imaggega, bur ebali igar imaggega. Adán, Babba igar imassurmogad, aagala neg gagaleded, geb burgwed igar nonibalid. Génesis 3:1-6, 19 absogo.
Nia, Babgi Eva obadsagua Jehovági agbidded. Weyob mag daglenoniggid budar Babdummad Jehová e dummadga imagge. Bur melu dulemar Niaba aggasmarmosoggua abesurmarmogad Babdummad, dummadga gued. Degsoggu Nia ‘we nabneg dummadga gunoniggid’. Juan 14:30 geb 1 Juan 5:19 absogo.
2. ¿Babdummad ibmar issaggwa obinyisdibe?
Bela Jehová ibmar nueganbi obinyisad. Jehová dulemar obinyisgua, geb ángelmar obinyisbargua nabir eba igar imagdii gumalaga imasanad (Deuteronomio 32:4, 5). Jehová, anmar imasad anmar na walagwen sogega ibu igarba anmar aggaoe, igar nuedbardibe igar issaggwagwadbardibe. Jehovába anmar igar imadele mag daglegoed anmar nue Jehová sabe. Santiago 1:13-15 geb 1 Juan 5:3 absogo.
3. ¿Ibigala Jehová gwae neg onugusuli?
¿Ibigala Jehová dulemar egi agbidsa buggwad obelosuli? Dulemar dagmalaga, gobiernomar dulemarga neg onudaggosurguoe (Eclesiastés 7:29; 8:9). 6.000 años gusad dulemar neg semamaidaggar, deginigwale bibbisaar ibmar isgana osulosurmalad, guerramar osulosurmarbalid, anba bonigan osulosurmarbalid. Degsoggu ise mag daglegardo dulemar geg neg onudagge. Jeremías 10:23 geb Romanos 9:17 absogo.
Babdummad, anmar idugedga anmar imaggele bur nued anmar gudiguoed (Isaías 48:17, 18). Undar nabsulid, Jehová, gobiernomar obelogega. Unnila dulemar, Jehová gobiernoba igar imagmaladbii nabbaneggi gudigumaloed (Isaías 11:9). Daniel 2:44 absogo.
4. Jehová anba yoo neg nudagsoggu ¿ibu anmardi imagmogoe?
Nia sogsad, Babdummad anmar bendagmaidba anmar Babga arbadiye. Anba yoo Babdummad neg onugusoggu, anmar daedba anmar nabir Niaga sogmogad, be gagganduleye, anmardi Bab gobiernoba naye, dulemar gobiernoba anmardi nasurye. Job 1:8-12 geb Proverbios 27:11 absogo.
5. ¿Ibu anmar imaggoe Babba naguega?
Anmar ibmar imagdiidbali mag daglegoed, anmar Bab gobierno sordaga gubimodibe
Anmar, Babba igar imagbiele anmar wisguer gebed, igi dulemar ega arbaed Bab abemai. Anmar, Bab igar sunsogedba naguer gebed, Bab igar sunsogedba nanaid Biblia sogedba dulemar odurdagmalad (Juan 4:23). Anmar Jesús yobi política igarba aggasurmogale, geb anmar guerramarba aggasurbalile, mag daglegoed anmar Nia gobiernoba agganasuli. Juan 17:14 absogo.
Nia gangued nigmosoggua imagnaid dulemar galagwensur daega, geb bela ibmar isganagan ibmar nuediyob daglegega. Anmar emaryob galagwensur dasurmogale, sun anmar aimar anmargi dododamaloed, isdar anmar dagdamalodibe (1 Pedro 4:3, 4). Anmargi dodoarmalar ¿ibu anmar imaggoe? Jehová sordaganba bur anmar aggaoed, geb Jehová igarmar mamaidba bur anmar igar imagbaloed. Weyob anmar ibmar imaggele dulemar wisguoed, Nia gagganduleye. 1 Corintios 6:9, 10 geb 15:33 absogo.
Jehová nue anmar sabsoggua anmar wisid undar neg isgunai guosuli. Dulemar, Bab bensurmaladi sadegu gudigumaloed. Juan 3:16, TNM absogo.
