Jehová igar niggaa Abrahán wagan urbisad, wemar Israel neggweburga gunoniggid. Ebali igar imagmalaga wemarga igarmar ugsabalid. Abrahán wagan, Bab gaya burbaba igar imagbuggwa gusmalad, degsoggu Bab igar sunsogedba nai gusmalad (Salmo 147:19, 20). Degsoggu Israel neggwebur bamalad odurdagmarmogoenad Bab igar sunsogedgi. Génesis 22:18 absogo.

Jehová, Israel dorgan susad e nuggi dulemarga sunmagdii gumalaga. Ebbenne Israel dorgan nued gudigusmaladba anmar wisid, Bab igarba daedi igar nuedi (Deuteronomio 4:6). Degsoggu Israel dorgan Bab igar sunsogedgi bamalad odurdagmarmogoenad. Isaías 43:10, 12 absogo.

Israel neggwebur isgudgua Jehová we neggwebur obadsasunnad, anale, Cristo sordagan urbisad e neggweburga guega (Mateo 21:43; 23:37, 38). Degsoggu emi ibagi Cristo sordagan Jehovága arbadidimaladi, Jehová neggwebursunnad; Israel neggweburdi, bar Jehová neggwebursulid. Gusmalad 15:14, 17 absogo.

Jesús na sordagan odurdasad negdirbimaggar Bab igargi sunmagdii gumalaga, geb sordagan aminamarbaliga (Mateo 10:7, 11; 24:14; 28:19, 20). Emi ibagi neg duggumosnaidgi bur bule Bab igargi sunmaglenaid. Aaga millónba dulemar Jehová igar sunsogedba aggamamaid (Apocalipsis 7:9, 10). Cristo sordagan nue igar niggaa bugsoggua nabir na mudsub mudsub bendagmalad. Bela negdirbimaggar na emarbi ibmar durdagbugmarbalid. Hebreos 10:24, 25 absogo.

Jehovági sunmagmalad 1870 gine igar niggaa buggudmalad. Biblia durdaggarmargua daggarmalad Bibliagi Bab igar sunsoged nai, aunni emala issegwanad. Wismalanad Jesús e sordagan urbisana, Bab igargi sunmagmalaga, aagala negdirbimaggar Bab igargi emarga sunmaggarmalad. Geb 1931 gine nuggunonimalad: Jehovági sunmagmalad. Gusmalad 1:8; 2:1, 4, 11 geb 5:42 absogo.

Siglo primerogi abar gwenagan, gwenagan idugega nug salesmalad, aaunni, wemar neggwebur irba gwenagan bugmalad idubuggwa gusmalad. Jesús sogedba igar imasmalad (Gusmalad 16:4, 5). Emi ibagi abar gwenagan anmar Idubugmarmogad, wemala neggwebur irba sucursalmar buggwad dagbugmarbalid. Sucursalmargi gardamar Biblia igargi sunmagmalad gaya baid baidba ogwalesiid, 600 gwena gaya aggar aggar sunmaglegedba. Jehovági sunmagmalad Idubugmaladi Biblia sogedba na bela sordaganga igar ugbuggwad, sordagan ogannogega. Jehovági sunmagmalad bela negdirbimaggar 100 mil congregacionmar gwena buggwad. Gwenagan buggwad irbali abar gwenagan anmar idudidimarmogad, mer anmar Babgi banguega. 1 Pedro 5:2, 3 absogo.

Jehovági sunmagmalad igar niggaa bugmalad nabir Bab igargi dulemar odurdagmalaga, sordagan amimarbaliga. Ebbenne apóstolmar imasmalayob neg yase neg yase dulemarga Bab igargi sunmagmarmogad (Gusmalad 20:20). Dulemar nue Bab igar durdagbimalale, Bibliagi odurdagmarbalid. Auggi Jehovági sunmagmalad binsa igar niggaa bugsurmalad, na gwenaddigwar dagmarbalid, na mudsub mudsub sabgumarbalid, ar Babdummad wemar bendagmaid (2 Tesalonicenses 1:3). Jehovági sunmagmalad alamagdidiid Jehová sogedba igar imagmalaga, geb bamalad bendagmarbaliga, aaga anmar bur dulemar bamaladba yeer iddodimalad. Salmo 33:12 geb Gusmalad 20:35 absogo.