LECCIÓN 11
¿Igi Bab igarmar anmar bendagge?
1. ¿Ibigala abelege Babdummad anmar iduged?
¿Ibigala nuedi Biblia sogedba igar imagged? (SALMO 36:9)
Jehová anmar obinyisadsoggua anmarba bur bule ibmar wisid. Anmar babsoggua gadi anmar binaled, aaga nueggwa anmar aggwemabalid. Walagwen ibmar imagdii guega anmar imassulid (Jeremías 10:23). Burwiganyobi, Babdummad anmar idumai gued anmar abemogad (Isaías 48:17, 18). Nued anmargi binsaedba Babdummad anmarga igarmar mesisad. 2 Timoteo 3:16 absogo.
Jehová na e igarmar mesisadgi anmar odurdagmaid, igi anmar emi ibagi nued gudigusale, geb igi anmar yoogidse sadegu yeer iddodii gusbalile. Ar Jehová anmar obinyisadsoggua, anmar eba igar imagged abelemogad. Salmo 19:7, 11 geb Apocalipsis 4:11 absogo.
2. ¿Igi Biblia anmar bendagge?
Abar Bibliagi ise sogar nasulid, bega neg aggargualir igi be ibmar imaggoe, auggi abar ise sogar nabalid, weyob be ibmar imaggoye (Deuteronomio 22:8). Biblia sogedba igar imaggegala anmar wis binsamogar gebed, igi nabir anmar aaba igar imasale (Proverbios 2:10-12). Bibliagi soglenaid Jehová dula anmar sediye. Degsoggu mer boni amigega anmar nueggwa arbanai gubied; neggi siile, agneb anmar gudidibe, anba anmar nueggwa ibmar imagdii gubibalid. Gusmalad 17:28 absogo.
3. ¿Ibu igar sogbogine Jesús sunmasa?
Jesús igar sogbogi sunmasad. Sogdii gusad Babdummad dulemar obinyisye e sabgudii gumalaga, ega arbadii gumarbaliga. Degsoggu anmar ibu imaddibe we ibmargi binsaed abeleged (Proverbios 3:6). Dulemar we igarba igar saele Babdummad aiga gumaloed, yeer iddodii gumarbaloed, geb sadegu gudigumarbaloed. Mateo 22:36-38 absogo.
Jesús dulemarga sogsabalid mer urwed amidii gumaloye (1 Corintios 13:4-7). Anmar we igarba ibmar imaggele, anmar Jehová yobi dulemar sabgudii gumogoed. Mateo 7:12 geb 22:39, 40 absogo.
4. ¿Igi Bab igarmar anmar bendagge?
Bibliagi soglenaid igi dulemar na neguyagi sabgudii gusmalale (Colosenses 3:12-14). Soglenabalid dule abirgin niggusale mer na meddemaloye, degsoggu webali igar imagmalale nued gudigumaloed. Génesis 2:24 absogo.
Anmar Biblia sogedba igar imaggele, anmar arbaedgi addursadii guosulid, geb anmar wie wie arbaosurbalid, degsoggu anmar arbaedgi ibgwensur onolegosulid, ar dummagana dulemar degi arbamalad abedaed. Degsoggu anmar arbaed saddedba buggib binsadii guosulid (Proverbios 10:4, 26; Hebreos 13:18). Uggine anmar doggus ibmar nigguedgi binsaosurbalid, ar Bibliagi soglenaid wis ibmar wilubba niggar bad unnibinye. Anmar Babga arbaedgi bur bule binsadii guoed. Mateo 6:24, 25, 33 geb 1 Timoteo 6:8-10 absogo.
Bibliagi soglenaid, mungued igar nuedsurye, aaga anmardi munguedba bonigan amidii guosulid, geb binsasun anmar burgwed amigosurbalid (Proverbios 14:30; 22:24, 25; 23:20). Babdummad sogsulid mer sisa goboye, auggi dule munguega sisa goberdina nued dagsulid (Salmo 104:15; 1 Corintios 6:10). Biblia anmar bendagbalid mer anmar ibmar isgana imagdii guega, geb mer anmar ibmar isganagi binsadii gubaliga (Salmo 119:97-100). Anmardi Jehová nug odummogega Bibliaba igar imagged, unnila anmarginbi binsaedbarsulid. Mateo 5:14-16 absogo.
