LECCIÓN 2
Rebeca, Jehová sogedba igar imasad
Rebeca bela belad Jehová sabgudii gusad. E sui nuganad, Isaac. Isaac deyob Jehová sabgudii gusmogad. Anmar durdaggoed, bia Rebeca, Isaacbo na daggarmala, geb, ibiga Jehová Rebecaba yeer iddomai gusa.
Isaac bab nuganad, Abrahán; e nandi, Sara. Abrahán abegenad e massi, ome nued niggued, Jehovága arbaed. Auggi emardi Canaán yargi mamainad, ar aagindi dulemar Jehovága arbasurmalanad. Aaga Abrahán, dule ega arbaed (Eliezeranar gebed) Haránse barmisad. ¿Ibigala Haránse barmilesa? Ar aagi Abrahán gwenadgan mamainad, aagi Eliezer, Isaacga nabir ome nued amigoenad.
¡Rebeca, camellomarga dii weed na dagsar gebed!
Eliezerba bamalad Abrahánga arbamalad nadmarmogad. Bule digga nadmala. Camello anbe mergu sesmalad mas sedmalaga, regalomar sedmarbaliga. ¿Igi Eliezer wisguoena biddi ome, Isaac omega guoedi? Eliezer wisinsoggua omegan dia siidse di wenonidamala, aaga Harán mosgu dia siidse nadmalad. Dia mosgu Jehováse godded, ega sogsad, yaagwa wargwenga an sogoye, wis anga dii weye, aa yaagwa anga dii wesale, geb an camellomarga dii wesbalile, weyobi an wisguoye, we yaagwa, Isaac omega be susye.
Degiidgi Rebeca, dia siidse nonisunnad. Bibliagi soglenaid Rebeca yeer daglegenye. Eliezer Rebecaga sogded, wis be anga dii amisar sogeye, Rebeca abin sogded, eyeye, beg an dii weoye, be camellomarga an dii webaloye. Camellomar gadi dii gobmalansoggu, Rebeca dii weega dummad alamasar gebed. ¡Abarmaggwis gusar gebed camellomarga dii weega! Weg sobarnaidgi be daggena, ¿bule Rebeca alamagnai be dagsunna?... Eliezer geger dagged, Jehováse ibmar egidsad balilla ega ibmar gudgu.
Eliezer, Rebecaga issesur regalomar ugsad. Rebeca e gwenadganse we dulemar sesad. Eliezer soggalid, ibiga Abrahán, Harán neggweburse e barmiali, geb igi Jehová e ibmar egidsad balilla ega ibmar imasbali. Rebeca gwenagan we ibmar iddoarmargua yeer iddoarmalad. Eliezerga soggarmalad, Rebeca, Isaac nigguer gwen aggar anmar iddosurye.
Rebeca, Isaac nigguega Eliezerba nadabbid
¿Rebeca, Isaac niggubimogandibe?... E gwenagan ese egisdemargua, Rebeca sogsad, eyeye, an naoye. ¿Ibiga eyeye sogsa? Ar wisinad, Jehová, Eliezer barmialidi. Degsoggu Canaánse yog Eliezerba naaled. Canaán mosgu Isaac niggudabbid.
Rebeca, Jehová sogedba ibmar imassoggu, Jehová, Rebeca bendagmai gusad. Aaga nabir Rebeca, Jesús muu dummadga gusmogad. Be, Rebecayob Jehovába ibmar imagmogale, Jehová, be bendagmai gumogoed, beba yeer iddomai gubaloed.
