Bibbigwad aggar Samuel tabernáculogi gudi guded, aagi arbadii gusbalid. Tabernáculo sii gusad dulemar aagi Babse golega. ¿Be wisi ibiga Samuel tabernáculogi gudigusa? We ibmargi sunmagged iduale, bin anmar daggoloena, ibu ibmar, anmar, Samuel nangi durdaggoe.

Ana diggasur gus goe niggubi gudiinad. Aaga Jehováse egidsad, be an bendagye nabir an goe nigguega. Ana, Jehovága sogsad, an, goe massigwa niggussundibe tabernáculose an barmidoye, aagi gudiguega, aagi arbadi gubaliga. Jehová, Anaga goe massigwa ugnoniggid; aa goe Samuelye nuggunoniggid. Ana, Jehovága sogsadba ibmar imasad, Samuel birgabaa gusadgi, birgabagge gusadgindibe, Ana Tabernáculose Samuel sesad, aagi Babga arbadii guega.

Elí tabernáculogi sacerdote dummadga mainad. Elí masmala warbogwadi tabernáculogi arbamarmoganad. Ebinsao, tabernáculo Babse golega sii gusad, degsoggu aagi ibmar nueganbi imaglege wilubbinad. Auggi Elí masmaladi agga ibmar isgana imagdidi gusmalad. Samuel bela we ibmar dagdii gusad. ¿Samuel, Elí masmalayobi ibmar isgana imagdi gusmodibe?... Suli. Igi na e sergan Jehová sogedba odurdasa, aaba ibmar imagdii gusad.

¿Igi Elí, e masmala imagge wilubbina?... Binsa nuu dagdii gue wilubsulinad, tabernáculogi arbadidiid onoge wilubbalinad. Auggi Elídi deyob ibmar imagdidiid bai dagsasulid, aaga Jehová Elí oiddossunnad, geb e masmala oiddosbalid.

Ibagwengi, muddiggidba Samuel gabmai, Samuel, dule wargwen es gole iddoalid: ¡Samuel! Samuel, Elíse abarmaded, auggi Elídi abin ega sogsad, an bese godsasurye. Sorba deyob ilabo dule es gole iddosbalid. Ilabbaa gudedgi, Elí, Samuelga soggalid, dule deyob bes gole be iddoalile, be sogoye, Jehová, an be iddomaye. Degsoggu Samuel deyob imassunnad. Degidgi Jehová, Samuelga sogsad, Elíga sogoye, andi binsa nuu be masmala ibmar  isgana imagdidiid dagmai guosurye. ¿Samuelga ibigwensur gusdibe Elíga we ibmar sogega?... Ibigwensur ega gussulid. Samuel dobe iddosa inigwale, Jehová sogedba igar imasad. Jehová sogedba ibmar gusad, Elí masmala ebober oburgwilesmalad, Elí oburgwilesmogad.

Samuelyob nabir anmar ibmar imasmogaled. Samuel, Elí masmala ibmar isgana imagdidii dagsa inigwale, edina ibmar nuegan imagdii gusad. Bedina ¿igi ibmar imagmogoe? ¿Samuelyobi be, Jehová sogedba ibmar imagdii gumogodibe? Be ibmar nuegan imagdii gudele Jehová beba yeer iddomaoed, be sergan beba yeer iddodii gudmarmogoed.